صباحات الله بي خيرا .. والقدر برضو مامعروف مخبي شنو؟.. البشرى مشى على شغلو .. وثويبة الليلة طلعت براها ..وخلت يوسف في البيت .. لانو امبارح قالو .المفروض ياخد راحه على الاقل يومين .. ثويبة مشت المدرسة بدري .. وبلغت المدير بالحصل على يوسف ..بي سبب الفصل المقدود ..
وفي اثناء ما بتتكلم مع المدير بكت .. وغلبها تكمل الكلام ومشت ..
البشرى مشى الطرمبة .. وكان قاعد جوة في غرفة واجهتها من القزاز .. كانو بشربو في شاي ..والمسدس بتاع البنزين .ماسكو واحد اسمو خليل ..والجماعة بكفرو لي البشرى على العلة الحصل لي يوسف .. المهم في اللحظة دي .. البشرى جاهو تلفون ..
البشرى رد : الو مرحبا عليكم السلام ..
قال ليهو .. البشرى اخوي كيف حالك .انا ميرغني ..
قاليهو : حبابك يا ميرغني كيف الصحة والاحوال .. والوليدات ان شا ءا الله انتو طيبين ..
قالو الحمد لله في امن وامان ..
اسمع يا البشرى انا طبعا" اتكلمت مع عمر ولدي.. في الموضوع الاتكلمنا فيهو .. وقعد يطنطن .. المبدول.. اظنو قايل بت خالو المسنوحه . اخير من ثويبة بتك ..
بس انا عندي فكرة .. وداير اشاورك فيها .. انا داير ارسلو ليكم ..ياخد ليهو اسبوعين تلاتة معاكم ..
يمكن لامن يعرف البت كويس يغير رايو .
البشرى قاليو .. الف مرحب بيهو في اي لحظة ..بس انت عارف البيت ضيق .. ومابرتاح معانا ..والحريم عندي بكونن مقيدات .. وهو زاتو احتمال مايقبل .. يقعد في البيت عاطل لاشغل ولامشغلة ..
ميرغني قال ليهو خلاص انت رسل لي ثويبة تاخد لها معانا كم يوم ..
البشرى قال له .. والله برضو كدي ما جاية.. اول حاجة ثويبة يادوب اشتغلت .. وما ممكن تغيب من الشغل .. لكن انت اصبر لي ..انا بحاول ادبر الموضوع في الايام الجاية دي باي فكرة ..
قاليهو خلاص انا راجيك ..
والحمد لله ميرعني ماسال البشرى .. هل كلم بتو ولالا .. لانو البشرى ماجاب سيرة الكلام ده لثويبة نهائي ..
والمكالمة انتهت ..وده هم جديد نزل على راس البشرى .. بس الراجل ده راجل صنديد.. انهى المكالمة يتبسم ..وقال الخير فيما يختاره الله نحن في يدنا شنو؟
ربنا هو البدبر الامور ..
ثويبة وصلت الشركة .. واول مافكرت فكرت تلاقي عامر لموضوع البارح .. وشغالة بتراجع في الاوراق والمستندات .. بتاعتها ..
في عميل جاء يشتري عدد كراتين اقلام رصاص .. وادوهو سندات التحويل للدفع عند ناس الحسابات.. وبي دورهم طبعا ناس الحسابات بستلمو منو المبلغ او الشيك ..ويدوهو وصل يستلم بيهو البضاعة ..
اها دفع القروش ..وثويبة حررت ليهو الوصل بالاستلام ..
والزول ده كان نظراته غريبة ..وبتلفت وفي المكتب ..وبعاين جاي وجاي بطريقة غريبة شديد ..
لغاية ثويبة لاحظت ليهو ..
شال الوصل بتاعه وطلع .. وثويبة شالت المبلغ ووردته في الخزنة على طول .. ونزلت المعاملة في السجل اليومي ..
في الوقت ده كان قرشي مافي .. بعد عشرة دقايق قرشي جا .. وقال لي ثويبة .. ياثويبة طالبك في خدمة .. البت الاسمها دالية دي والله مسكينة شديد الله يعينها ..
قالت ليهو ليه مالا في شنو ياقرشي؟ .. قال ليها قبل شوية رسلت لي رسالة ..قالت لي انا عايزاك في المخزن ..لمن مشيت ليها قالت لي محتاجة لي 200 دين لاخر الشهر .. قالت عندها حصوة في الحالب .. والدواء بتاعها خلص ..وماقادرة تقول لناس بيتهم .. عشان كترت عليهم الطلب ..
ودي اول مرة تطلب مني طلب زي ده .. ومابيني وبينها اي تعامل .. بس مرة واحدة حكت لي حركات عامر معاها .. وحكت لي عنه قصص .. لكن المشكلة ياثويبة انا ماعندي ال200 وهي ماعايزة تقول لي عامر ..لانو قبل كدا استغلاها بي سبب القروش .. لو عندك ياثويبة قريشات لاخر الشهر ..نفك ليها كربتها ..
ثويبة قالت ليهو ماعندي والله للاسف .. ان شاء الله ربنا يشفيها ..
قالت ليهو عن اذنك ياقرشي .. خلي بالك من الشغل .. عندي مشوار ضروري .. وجاية .. مشت طوالي لمكتب عامر .. ولقت عامر معاهو نفرين .. من ناس القروش الظاهرة عليهم الترطيبة ديك ..
واحد لابس بدلة .. والتاني جلابية وعمة ..
ثويبة دقت الباب .. قال ليها منو؟ .. قالت ليهو السلام عليكم يا استاذ انا ثويبة ..
قال ليها ثويبة دقايق بس معاي ناس.. ليلى برة مافي ؟ قالت ليهو مافيشة (ليلى دي زي سكرتيرة بتاعة عامر ) النوعية البتقول ليك انتظر شوية المدير عندو اجتماع .. كانت مافيشة ..
اها عامر قال لثويبة .. ا انتظري دقايق بس ..
قعدت برة منتظرة .. ومتمحنة .. وخايفة .. ومتوترة .. وبترتب في الكلام المفروض تقولو ليهو ..
وبتشجع في نفسها .. وكل مرة تشيل نفسها وتدعك يديها ..
المهم لمن الجماعة طللعو وهي دخلت عليهو .. قال ليها حلت البركة في مكتبي .. قالت ليهو البركة فيك يا عامر تسلم ..
انا كنت عايزة اتكلم معاك في موضوع ..
قال ليها تشربي شنو؟ .. قالت ليهو لا لا مشكور ربنا يجزيك خير ..
قال ليها اتفضلي طيب الموضوع شنو؟
قالت ليهو طبعا .. انت اتكلمت مع ابوي في موضوع تحويل يوسف اخوي ..لمدرسة خاصة .. وطبعا ابوي كلمني بالموضوع ..
قال ليها ياثويبة.. حرام يوسف يقرا في المدرسة المنتهية دي .. ياخي دي مدرسة هكرة .. وحيطانها مشققات .. وعبارة عن مباني اثرية وتتلقي كلها عقارب ودبايب ..
ياجماعة حاولو الطفو بحال الولد ..
غير كدا ..انتي يا ثويبة كل يوم لازم توصلي يوسف المدرسة ..حتى تجي الشركة ..والقصة دي متعبة ليك ..وبتاخد من وقتك ..
وفي النهاية ده عرض لخدمة ليكم مني ..انا وبي محض ارادتي ..وانتو ماشحدتوني ولا طلبتو مني ..
اعتبروها دي خدمة لاخوي الصغير ..
قالت ليهو .. طيب يا عامر ليه نحن نفكر في يوسف اخوي براهو .. وبقية الطلبة الموجودين في المدرسة ؟؟
ديل برضو ماعليهم خطورة ؟؟
يعني نحن اي زول يهتم بي طفله ..ومايفكر في باقي الاطفال ؟؟
قال ليها طبعا نحن ماممكن نحل مشكلة السودان كلو ..
نحن بنعمل البنقدر عليهو من الولد المسؤلين منه ..
قالت ليهو انا عندي ليك اقتراح لو عملتو بتكون حليت المشكلة ..
المدرسة محتاجو لي مزيرة وكيزان شراب .. ومحتاجة لي مواسير وحنفيات ..
ومحتاجة .. صيانة بسيطة في المنافع ..
وفي كم فصلين محتاجات لصيانة بسيطة .. يعني القصة دي مابتخسرك كتير .. وبتلقى اجر في كل الطلبة .. وربنا بفتح عليك .. وخلي يوسف يواصل في مدرسته ..
التوصيله ماعندي فيهو مشكلة انا بحاول اقوم بدري واوصلو واحصل الشغل ..
عامر سكت مسافة .. وعاين ليها كدا .. قال ليها غايتو .. انا كل يوم بزداد اعجاب بي شخصيتك ..
يابت انتي جاية من وين ؟ قالت ليهو جاية من السودان ..
قال ليها والله نعم التربية والعقل .. ربنا يحفظك .. حاضر ياثويبة ..وانا مستعد اقبل اقتراحك ..ومن بكرة ببدا تنفيذ ..
ثويبة دي فرحت فرحة التقول الزول ده اداها مال الدنيا ..
قالت ليهو خلاص انا ماشة احصل شغلي.. ودعتك الله وان شاء الله ربنا يبارك ليك.. ويجزيك خير ..
وقامت عايزة تمشي ..عامر قال ليها ثويبة ممكن اقول كلام؟؟ .. قالت ليهو اتفضل طوالي ..
قال ليها انا معجب بيك شديد والله !! . وبتمنى في حياتي انسانة زيك كدا بالضبط ..!!!
قالت ليهو ربنا يكرمك يا استاذ .. وده من زوقك واكيد ربنا حيحقق ليك مرادك .. وان شا الله احسن مني كمان .. وطلعت طوالي ..
لمن مشت لقت قرشي مافيش .. وواصلت شغلها عادي .. في عميل برضو جاء يدفع قروش .. لي بضاعة معينة .. استلمت منة القروش وحسبتها .. وشنطتها كانت في درج الطربيزة الكبير ..
طلعتها وشالت منها مفتاح الخزنة .. عشان تدخل المبلغ ده ..
اتفاجأت بي انو القروش الختتها قبل شوية مافي .. بتاعة العميل الجا يشتري الاقلام ..
وبقت مرتبكة ياربي القروش دي الشالا منو ؟ قرشي ..ما المفروض يشيل قرش من هنا ..
وعامر كان في المكتب وانا كنت معاهو ...
كدي يجي قرشي اسألو .. المهم استلمت وحررت الوصل وسلمتو للزول الاخير ده ..ومشى .
بعد شوية قرشي جا .. قالت ليهو قرشي في مبلغ كان موجود في الخزنة.. انا وردته قبل نص ساعة ..مالاقياهو ..المبلغ 8.230 مليون .. والخزنو مقفولة في قفلتها ..
قرشي قال ليها انا مفتاحي من جيبي ماطلعتو والله .. ولاشفت القروش دي اساسا .. قالت ليهو ايوة
انت كنت مافي .. يعني الحيكون شالا منو؟..
هسي انت ياقرشي .. هسي انت مشيت وين ؟
قال ليها دي دالية ضربت لي تاني وقالت لي عايزاك ..
ولمن مشيت ليها قالت لي ماتحكي لزول اني طلبت منك كدا ..
ثويبة راسها ضرب وبقت تلف زي المجنون ..وخاتة يديها في راسها .. وبتقول كان كدا دي مسؤليتي
انا ..في زول خش بيورانا ..وشال المفتاح من شنطتي ياقرشي .. وفتح الخزنة وشال القروش ...
هسع انا اجيب القروش دي من وين ؟؟ وبقت تبكي زي الشافعة ..
الى اللقاء .. —
