طبعا الام والابو وثويبة ..كلهم حصلت ليهم خوفة عجيبة على يوسف .. لانهم لسع مابردت عنهم نار ابوحميد .. وبقو خايفين انهم يتحرمو من يوسف كمان .. ثويبة جرت عليهو جوة ..وبقت تهبش فيهو يوسف حبيبي مالك؟ .. قال ليها انا عيان .. عندي حمى في راسي .. راسي واجعني شديد ..
وتاني يتوع .. والام والابو كل واحد ماسك يوسف من كتف ..
عمك البشرى لبس نعلاتو بالقلبة ..وقام جاري على الشارع ..يشوف ليهو ركشة . عشان يوديهو المستوصف .
وزينب دخلت دخلت تجيب موية ..عشان تعمل ليهو مكمدات من الحمى الشديدة دي ..
دقايق بس والبشرى جا بره ..وقف ركشه جمب الباب ..وكورك ليها ياثويبة جيبيهو ..
قالت ليهو دقيقة يا ابوي اغير ليهو .. قال ليها لالا جيبيهو سريع بهدومو اللابسها ..
كف ختفتو ..وختتو فوق كتفها .. الود ماشاء الله ..طويل وصحتو حلوة ..لمن وصلتو الشارع بقت تناهد ..وركبو ..
زينب لبست التوب وجاتهم جارية .. قالت ليهم اقيفو امشي معاكم .. البشرى قال ليها مافي داعي يازينب خليك هسي نحن بنجي .. امشي ياولدي دور ..والركشة فرررر ..
البشرى هبش جيبو لقى ماعندو تعريفة حمرا ..
حق الركشة ده ماعندو ..خلي الجزارة الراجياهو في المستوصف ..
بس ان شا الله الربيكة يتلقي فيهو رصيد .. طلع تلفونو المسهوك المدعوك حالو بالبلا..
وضرب لي محجوب .. واحد صاحبو وشغال معاهو في الطرمبة قال ليهو انت وين ؟..
قال ليهو انا في البوسطة .
قال ليهو معاك قروش ؟ ..
محجوب قال ليهو اي في عايز كم ؟ قال ليهو اركب سريع تعال بالمعاك بس ..
ثويبة عرفت انو ابوها مامعاهو قروش العبرة خنقتها .
مع انو في نص الشهر.. بس برضو الوضع يحكي عن حالو .. في ظروف العمال والموظفين .. اصحاب المرتبات الشهرية ..والمعاناة البتقطر الدم من القلب ..
مهما كان المرتب كبير في حجمو.. لكنو قدام اي دكان المرتب ببقى خيبان ..
ويسوح سوحان الودكة في النار ..
اما اذا حصل عليك مرض لاقدر الله .. واضطريت تمشي لدكتور ..
فالمرتب بعضي قميصو في خشمو وبقوم جاري بالشوارع ..
لكن في بلدي الناس بتقول (الله كريم ).. وبتقول .. الله بسهلها .. عشان كدا . الناس عايشة والحمد لله ..اها .في الشارع يوسف بدت تحصل ليهو بعض التشنجات الطرفية .. في يديهو واقدامو ..
وعيونو بقو صغار كدا ..وقلبو بضرب بسرعة شديدة ..
البشرى قال ليها والله يا ثويبة انا خايف الولد ده يكون (قرص) يعني لدغو دبيب او عقرب ..
الله يستر بس . ثويبة خافت على اخوها لمن وشها اتخطف ..
الجماعة وصلو المستوصف.. وطلبو من بتاع الركشة ينتظرهم .. وهو طبعا لانو قبيل سمع المكالمة وعرف انهم ماعندهم قروش ..
قال ليهم بمشي وبجيكم بعد نص ساعة ..
وكت داير يمشي قال للبشرى.. اسمع ياعمك انا لو اتاخرت عليكم ..شوفو زول تاني .. وربنا يشفي الولد .
البشرى شايل الولد وداخل على المستوصف وبقول لي بتاع الركشة .. لالا ..لازم ترجع .. عايزنك ترجعنا .. ونديك حقك القروش جاية ..
المهم دخلو وانتظرو في الدور ..وشغالين للولد مكمدات ومحجوب اتاخر .. وهم دورهم جا .. ودخلو قدامهم نفرين .. عشان هم ماعندهم حق الدخول .. وماعايزين يتعرضو لاهانات ..بس بقو منتظرين محجوب .. اها بعد شوية محجوب وصل .. ودفع حق التذكرة بتاعة الدخول ..
والدكتور عمل الفحوصات والتحاليل ..
قروش محجوب خلاص قربت تنقرض .. لغاية الفحوصات كلها خلصت.. الود ما ظهرت عندو اي حاجة واضحة ..
الدكتور قال ليهم احتمال يكون الولد ده اتعرض لضربة شمس ..
هنا الولد يوسف بدا يتكلم باخر نفس .. وتعبان جدا .. قال ليهم ايوة يا ابوي دي الشمس الفي الفصل .. ابوهو قال ليهو ياتو فصل .؟
قال ليهو فصلنا مخروم من فوق خرم كبير ..والشمس قصادي انا بس ..
انا قلت للاستاذ الشمس حارة قال لي ياولد سيب الدلع ..
الدكتور قال ليهم ..بس ياهو ده الكلام ياحاج .. الولد ماعندو اي مشكلة مرضية ..بس اتعرض لشمس شديدة ومباشرة مع انعدام اي هواء .. بكون الفصل مقفل والشمس ضاربة فوق راس الولد ..
ودي اخطر حاجة بالمناسبة ..
..
معلومة ..
ــــــــــــــ
ضربة الشمس حالة طارئة حادة ..تحدث نتيجة التعرض المباشر لحرارة الجو .. خاصة اشعة الشمس المباشرة في فصل الصيف ..
وسببها اختلال في المراكز الحساسة بالمخ ..وبصفة خاصة مركز تنظيم الحرارة Heating Regulating System ، فيعجز عن حفظ الحرارة عند معدلها الطبيعي ..وتحدث أكثر لدى الأطفال ..و كبار السن ..ومرضى القلب و السكري ..و مدمني الكحول و المخدرات ..والذين لم يألفوا الاجواء عالية الحرارة ..
إذا لم يسعف المصاب فورا" . فإنها قد تؤدي إلى هبوط يؤثر على كافة أنسجة وأعضاء الجسم المختلفة ..خاصة الحيوية من خلايا المخ . وتتوقف خطورة الحالة ومضاعفاتها على سرعة الاسعاف ..
و علاج المصاب ، التي تعتمد أساسآ على تبريد الجسم ، وإعطائه السوائل الوريدية لمنع حدوث الوفاة .
الاعراض و العلامات :
- ارتفاع في درجة الحرارة إلى أكثر من 40 درجة مئوية ، مع صداع و دوخة و احمرار الجلد و توقف العرق
- قوة النبض ثم سرعته و عدم انتظامه خاصة مع تقدم الحاله
- اجهاد في التنفس ، مع ارتفاع ضغط الدم في المرحلة الاولى ، ثم إنخفاضه في المرحلة المتقدمة
- ضيق حدقة العين ، مع اعياء شديد ، ثم اغماء و تشنجات عصبية..
الاسعافات الاولية
- نقل المصاب إلى ظل أو إلى مكان بارد
- خلع ملابس المصاب الخارجية
- استلقاء المصاب مع رفع رأسه إلى أعلى من مستوى الجسم
- عمل كمّادات بادرة على الاطراف . ويمكن استعمال قطعة اسفنج أو فوطة مبللة بالماء البارد لتبريد رأس وأطراف المصاب
- لف المصاب بخرق أو شرشف مبلل بالماء البارد، أو رشه باستمرار بالماء البارد، ويمكن وضع المصاب في مغطس يحتوي على الماء البارد (مع تجنب استخدام الثلج خوفآ من حدوث تقلصات في الأوعية الدموية)
- يمكن استخدام مروحة هوائية لتهوية المصاب
- ملاحظة العلامات الحيوية ( التنفس ، النبض ، الحرارة ) مع اعطاء المحاليل الورديديه إذا أمكن ذلك
- اعطاء الاكسجين عند اللزوم ، وفي حالة توقف التنفس يجرى له التنفس الاصطناعي على الفور ، مع ملاحظة العلامات الحيوية كل خمس دقائق
- في حالة حدوث التشنجات ، يُعطى عقارآ مهدئآ مثل الديازيبام Diazpam 0.3 ملجم / كجم
- عدم التعرض للجو الحار أو أشعة الشمس المباشرة مرة أخرى ، مع نقل المصاب إلى أقرب مركز طبي لإستكمال العلاج .
ـــــــــ
وفعلا ياجماعة سرعة الاسعاف الحصلت من ناس البشرى .. والمكمدات خففت من خطورة الوضع ..
عشان كدا اي حرارة تحصل للطفل .. المكمدات الباردة دي اهم حاجة .. قبل ماتعرف اي حاجة ..تبدا
المكمدات .. وصدق الرسول الكريم عليه الصلاة والسلام حيث قال ..(
الحمى من فيح جهنم فابردوها بالماء) ..
والحمد لله .. الدكتور كان من المعدودين في بلدي اصحاب الخبرة والضمير .. وسريع دخل يوسف في غرفة فيها مكيف .. وبدا معاهو الدربات ..
الناس ديل لغاية المغرب .. ماقعدو ..
وثويبة عرفت انو الحصل لاخوها ده كلو بي سبب الاهمال المتعمد في المدرسة الحكومية ..
قالت لابوها والله يا ابوي الحكاية بقت لاتحتمل .. عند ناس المدارس ديل ..
ليه يعني التعليم في بلدنا بقى .. زيو وزي التجارة .. يعني يا اما نقريهو في مدرسة خاصة يا اما يمرض ويموت ؟؟ .. يعني شنو لو في زول خسر ليهو 30 جنية وقفل الفتحة الفي سقف الفصل ..
وليه الجهات الحكومية المسؤلة من التعليم .. مابتعمل تفقدات دورية وتشوف الحاصل في المدارس دي .. يعني الاساتذة في يدهم شنو ؟؟
لوهم انفسهم مرتباتهم مامكفياهم شاي سادة .. غايتو ربنا يلطف بالعباد ..
قال ليها .. الله كريم يابتي .. سبحانه وتعالي قادر يحمي عبادو ويرزقهم .. نحن نحمد الله احسن من كتير من الناس .. في ناس حالتهم اصعب مننا .. محجوب قاعد بعيد .. ومنتظر معاهم اصلو ما فارقهم ..قال لي البشرى قوم يا ابشري في ناس بصلو برة نصلي ونجي ..
قامو طلعو برة وثويبة دخلت على اخوها وصلت جوة ..
محجوب راجل اخو اخوان وهو من عمال الطرمبة واقرب اصدقاء البشرى وبينهم تعامل ..
وجيبهم واحد .. والاتنين فلسانين لكن بعينو بعض وبتدينو من بعض ..
يوسف بشرى .. بقى احسن الحمد له وفتح عيونو .. وقعد على حيلو .. وجابو ليهو عصير شرب ..
ثويبة بقت تفكر جادة في انها تشوف ليها طريقة لاخوها الوحيد .. وكل مرة تتذكر العرض المغري العرضو ليهم عامر .. وكيف انو اخوها حيرتاح .. ويبقى من رواد المدارس الخاصة ..
ويمشي ويجي بالترحيل .. بس ياترى تمن الخدمة دي حيكون شنو؟
وهل ممكن ثويبة تفشل في الامتحان ده .. وتمشي توافق على على الخدمة المقدمة من عامر ..
نشوف .. لمن ابوها رجع .. قالت ليهو يابوي انا عايزة اتكلم معاك كلام .. في موضوع عامر القالو ليك ..
بالنسبة لدراسة يوسف .. انا ماعايزاك تقول ليهو حاجة .. خليني انا بكرة بلاقيهو واتكلم معاهو ..
وان شاء الله مايحصل الا الخير ..
قال ليها طيب .. ان شا الله .. كدي نصل البيت ونتشاور في الموضوع برواقة ..
وطلعو بالولد .. وبتاع الركشة القبيل ماجا .. وشكله من اولاد الحلال البعرفو يقدرو ظروف الناس ..طلعو ..وودعو محجوب وركبو ركشة تاني ومشو على البيت ..
وزينب هناك لافة بالحوش زي الملدوغة.. لغاية مارجعو ليها لقوها قربت تموت من الخوف على ولدها .. اها لمن وصلو البيت ..
ويوسف الحمد لله كويس .. وكلمو زينب بالحاصل .. زينب قالت لي ثويبة.. اها ياثويبة ده العايزاهو لي اخوك ؟؟
الود امبارح جا وبراهو عايز يخدمنا .. ونحن لاشحدناهو ولاطلبناهو .. مالك انتي عايزة تبقي لاخوك سبب عذاب ..
قالت ليها يا امي زي ما انتي خايفة على يوسف.. انا برضو قلبي مقطوع عليهو ..
لكن انا خايفة انو خدمة عامر دي .. يكون طمعان في تمن من وراها ..
قالت ليها ايوة خلاص فهمتك .. لكن انا حسب معرفتي بالناس.. الزول ده ما من النوعية دي ..
قام البشرى قال ليها .. طيب ياثويبة نحن عشان مانظلم الزول ساي .. المفروض نمد ليهو حبل المهلة لامن يظهر لينا منو الشين .. ولا انا غلطان ..؟؟
يعني نحن لو رفضناهو طوالي هسي .. معناها اتهمناهو اتهام ضمني .. زينب قالت ليهو اتهام ضمني كيف يعني؟؟ اتكلم عديل يا البشرى .خلي فلسفتك دي انا مابفهم كلامك المقلبن ده . ثويبة كتمت ضحكة وختت ايدها فوق خشمها .. البشرى قال ليها اتهام ضمني يازينب يعني اتهمناهو .. اتهام ظريف .. ما اتكلمنا عديل .. لكن تصرفنا بدل على اننا متهمينو ..
ثويبة قالت ليهم خلاص ياجماعة مادام انتو واثقين فيهو قدر ده انا بكرة ..
حاتكلم معاهو ..
الى اللقاء ..
