عمك البشرى استمع لكلام عمر بكل تروي وحكمة وقال ليهو .. ان شاء الله ربنا يسوي الفيها خير ..انت هسي كدي ركز لي في الشغل في الايام دي ..
وان شاء الله مايحصل الا الخير .. والبشرى اصلا ما ابدى اي انزعاج بالموضوع ..
وبالليل كدا طلعو سرايرهم بي غادي في الزقاق الفي ضهر البيت من الناحية الشمالية .. ودي اول مرة البشرى يقعد مع عمر فترة في الونسة قدر دي .. وشاف كيف الزول بفكر وشنو هي
طموحاته وحاجاته ..لانو كل مرة بلف الونسة وبجي راجع لموضوع رفض الوالد ..
قال ليهو يا عمر ياولدي انا شايفك شفقان .. انا عايز اقول حاجة بتعرف كيف تفوض امورك لله ؟
يعني خلي الامور على الله .. والحاجة الفيها خير ليك اتاكد انو ربنا بسهلها ليك .. واذا حاجة انت دايرها وماتمت .. برضو بكون لخير ليك ..
انا داير احكي ليك قصة ..
كان عندنا هنا في امدرمان جماعة انا بعرفهم .. المراة ست البيت كان نفسها ومناها في الدنيا تشوف السعودية .. عندها بت خالتها الظاهر في المملكة .. وبتحكي ليها ..
وهي دايره تمشي تحج وتسوي ليها عمرة .. وتشوف السعودية القالوها دي للزمان ..
اها عندها تلات بنات وزوجها راجل خير وعندها ولد واحد وماقاعد في البلد ..
اها يازول راجل المراة دي عمل المستحيل عشان مراتو تسافر وتحقق مناها .. وجهز ليها كل حاجة .. لدرجة المراة دي ماشة على المطار .. حصل ليهم حادث لامنو لا عليهو في الشارع ..
يعني واحد بتاع بوكسي .. خاشي الشارع بالغلط .. دقش الصدام بتاع العربية .. من الخلعة المراة دخلت في غيبوبة ومشو بيها على الحوادث الطيارة فاتتها ..
المهم في المستشفى لقوها كويسة خرشة ساي ماعندها .. جابوها راجعة البيت ..
وبقت تنقنق .. انا اصلي ماعندي حظ .. انا اصلي شوم ..
اها يازول بالليل كدي .بتها الوسطانية عيت عيا شديد ..
وقربت تموت ساقوها لقو دمها ضعيف شديد وحتاجة لنقل دم عاجل ولقو مافي زول بوافق فصيلتها الا امها .. وحالتها مستعجلة ..
شديد والحمد لله نقلو ليها دم من امها وربنا اتقذها ..
عمر بعد سمع القصة . قال ليهو سبحان الله .. هسي المراة دي تقول الحمد لله الطيارة فاتتني ..
ومرة قال اللبيب..
الاقدار غيوب والحكمه ديمه خفيه.
رب الكون مخــــير ونحن ليهو رعيه.
الحاجة التحبها قد تكـــون لك ازيـه.
والقدر الصعيب قد يبقى نعمه هنيه.
.
اها يازول من اول يوم مدرسة عم البشرى فتحت ابوابها لي عمر ود ميرغني وبقى من الطلبة المعتمدين ..
طيب باختصار وبمرور الايام اتعلم حاجات كتيرة من اسرار التعامل مع الحياة ..
وتاني يوم طوالي مشى الشغل مع عمو وعرفو على الناس ووراهو طريقة الشغل ..
وعم البشرى بقى ماخد راحة كويس؟
ثويبة لمن رحعت تاني يوم للشركة دالية قابلتها باسوأ مقابله وبقت تفتعل معاها المشاكل ..
وثويبة بس تضحك ..
اها مشت ليها في نهاية الدوام في المخزن براها . ولاول مرة تزور المخزن ..
ووبرضو داليا قابلتها بي طمام بطن .. ثويبة قالت ليها انا عايزة اطمنك .. عامر ليك ليك .. بس انتي هدي نفسك .. تعالي جاي نقعد برانا واحكي ليك ..
انا طبعا عايزة ود عمي وماعندي اي قضية بي عامركم ده ..
والزول ده حباك انتي الوحيدة بس انتي تصرفاتك هي الخلتو يبعد منك ..
عامر لسه بعزك وبعز ناس بيتكم .. بس انتي الحاجات البتعملي فيها دي .. هي البتفشل ليك مواضيعك .. البنات الاتنين الكانو شغالين هنا .. انتي طيرتيهم بلاسبب صاح؟..
وقطعتي ارزاقهم بي سبب انانيتك .
انا عارفة كل الحاصل بس ماحكيت لي عامر اي حاجة . لاني بالجد عايزة المكم مع بعض ..
قالت ليها عليك الله بالجد ياثويبة ؟؟ .. وفجأة مسكت ثويبة من يديها .. قالت والله انا اسفة ماكنت فاهماك .. طيب انتي ركبتي معاهو ليه .. قالت ليها عايزة احرق قلبك لانك انتي عارفة عملتي شنو يامتخلفة ؟ عايزة ترميني في مشكلة صح؟
دالية قالت ليها والله بس انا خايفة انو عامر يكون كشفني .. حكا ليك حاجة عن الموضوع؟
قالت ليها ابدا" .. هو احتمال يكون شاكي .. لكن انا بقدر أطلعك منها براحة ماتشيلي هم ..
قالت ليها كيف حتعملي شنو؟
(لاحظ دالية اعترفت بالسرقة بكل سهولة )..
ثويبة قالت ليها بس انتي باكر سلميني المبلغ . وتاني ماتشتغلي بالموضوع .. ولاعايزة اسألك عملتيها كيف ..
المهم الحصل حصل ..
بس عندي معاك شرط واحد .. اي حاجة اقول لك اعمليها تعمليها وتنفذي اي كلام اقولو ليك ..
قالت ليها خلاص كويس .. تعالي جاي اديني خدك ابوسك ..
واخدو ليهم ونسة كدا ..طبعا الوقت ده نهاية اليوم والعمال فاتو والغالبية من الموظفين مشو ..
ودالية اطمأنت شديد جدا لثويبة .. لكن ثويبة ما مطئنة ليها .. ولسه بتتكلم مع دالية عن الاخلاص .. وانو الزول لمن يكون عندو رغبة في حاجة المفروض يمشي بالطريق الصاح عشان ربنا يوفقو ويلقاها ..
وثويبة بتتكلم ودالية بتعاين ليها .. فجأة كدا دالية قالت لي ثويبة ..
انا عايز اسألك سؤال ياثويبة .. انتي وشك ده عاملة ليهو شنو؟
قالت ليها ليه يعني السؤال؟ .. قالت ليها انتي شكلك بتستعملي حاجة بتخلي الوش مضوي ..
والله انا قدر ما استعمل حاجة ..تعمل لي حساسية .. لامن جاتني نفسيات ..
قالت ليها العاملاهو انا ده ..كريم ..اسمو (ضياء الماء) ..
قالت ليها موية شنو يابت ؟؟ قالت ليها موية الوضوء .. انتي ماعارفة الوضوء سموهو الوضوء ليه ؟؟
قالت ليها اها ليه ؟؟
قالت ليها لانو بدي الوجوه وضاءة .. ونور .. انتي بس واظبي على الصلاة وتاني مابتحتاجي لاي كريم ..
اها يا دالية ماعايزة تحكي لي عن علاقتكم انتي وعامر وبدت كيف .. والحاجات الحصلت .. وكدا.. نفسي اسمعا ..
قالت ليها طبعا ياثويبة هسي الوقت اتأخر .. لكن بوعدك احكي ليك بالتفاصيل ..
قالت ليها بس سؤال واحد جاوبيني عليهو .. وتاني نمشي ..
يعني انتي هسي في زول في حياتك غير عامر ؟
قالت ليها برضو بوريك بكرة ... هسي انا عندي مواعيد ضرورية .. عشان ما اتاخر على البيت .. قالت ليها طيب نطلع مع بعض .. قالت ليها بس انا ماشة على الصحافات ..
في اللحظة دي عامر جا خاشي لقاهم قاعدين مع بعض .. وسمع طرف الكلام ..
قال ليها اسأليها ياثويبة .. قول لي ليها ماشة الصحافة لشنو؟
الى اللقاء ..
..
