ثويبة لغاية ماطلعت البيت . عامر ماكان جاء .. ولاول مرة تحس انها فقدت وجودو .. وكانت مستغربة من عدم جيتو في الشركة .. وكانت مستحية انها تسأل منو زول .. على كل حال وصلت البيت .. وكان البشرى لسع ماوصل من الشغل .. خشت سلمت على امها في المطبخ بتعمل في رز مفلفل ..
ويوسف الحمد لله بصحة جيدة وكان بيلعب بي قندران بتاع بلاستيك قديم كدا اشتراهو ليهو ابوهو .. في العيد الفات .. وقاعد متفن في نص الاوضة .. وماسك القندران وبمشي فيهو كدا في المشمع المفروض في الاوصة .وبعمل عننج .. عننج ..
ثويبة لمان جات شافتو قعدت تتبسم فجأة كدا وقفت ليها عبرة في حلقها .. وحست بي نار بقت في قلبها .. لمن اتذكرت احمد اخوها . الكان مالي البيت بهجة وفرحة .. وحست بانو يوسف وحيد .. وانو البيت بقى هادي وصوت يوسف براهو ..
ما مكمل معزوفة السعادة ..
اترمت في السرير كدا ودموعا كبن .. يوسف ماجايب ليها خبر ومشغول مع اللعب ..
اتنهدت وقالت .. ياحليلك يابوحميد ..الحمد لله على كل حال..وقشت دموعها سريع كدا وقامت .. وغيرت ومشت صلت وجات دخلت المطبخ مع امها ..
امها قالت ليها شالتني نومة واتاخرت قطعي لي السلطة دي سريع ابوك هسي بجي ..
قالت ليها نوم العافية ياست الحبايب .. قالت ليها مالك ياثويبة .. وشك محمر وعيونك مورمة ..
قالت ليها مافي يا امي بكون من الشمس ..
اها يازول بعد البشرى جا واتغدو كلهم الاربعة مع بعض .. البشرى قال ليهم انا اتصلت على ميرغني اخوي وقال حيكلم عمر وبرد لي بعدين المساء ..
المقصود هنا انو وتيرة البيت كان طبيعية .بس في حاجة غريبة . بتفكر فيها ثويبة ..
وماقادرة تصدقها او تكذبها ..
ياربي هل فعلا عامر شال القروش دي ..؟وللا هي فعلا اتسرقت وهو عمل كدا عشان مايحرجني ..
المهم انا لازم اصبر واتأكد من الحقيقة دي ..
اصبح الصباح وثويبة قامت بدري شديد وصلت وعملت الشاي وصحت اخوها ولبستو .. وقالت ليهو يوسف حبيبي انا سافة الليلة قومتك بدري .. لكن لازم تاني تنوم بدري عشان تصحى بدري .. عشان انا احصل الشغل وبوعدك اخر الشهر لمن اقبض المرتب اشتري ليك لعبة حلوة ..
قال ليها حاضر انا عايز عريبة بوليس بالرموت ..
قالت ليهو انا الليلة مابخليك تقعد جنب الخرم حق الشمش .. ولازم نغير ليك مقعدك ..
قال ليها وسفيان برضو ماتخليهو يقعد في الشمش .. قالت ليهو سفيان منو . قاليها سفيان صحبي ..
قالت ليهو حاضر وسفيان زاتو مايقعد في الشمش ..
اها يازول وكت وصلو المدرسة .. ثويبة اتفاجأت ببعض التغيرات لقت في خمسة ازيار جديدة ..
وحكاية بتاعة عشرة كيزان مربطة في الازيار ..
وحنفيات المواسير جديدة زي تلاتة او اربعة .. والحوض منضف ..
وفي جماعة شغالين صيانة في المنافع ..
ولمن دخلت يوسف للفصل لقت الفتحة مقفولة .. والشبابك .. مصلحة .. حست انو ده عامر عمل العمايل دي كلها .. وقالت يارب يكون ده عامر العمل كدا ..
لاقت المدير قال ليها ربنا يجزيكم خير .. والله ود خالتك ماقصر ..
قالت ليهو ود خالتي منو؟
قال ليها .. الاسمو عامر قال انا ود خالة المرحوم احمد بشرى ويوسف ..
ده امبارح جا هنا بي نفسو وقف عربيتو برة و معاهو العمال من الصباح واقف بي نفسو على الشغل اليوم كلو مامشى جاي ولا جاي بس شغال تلفونات الظاهر عليهو ولد حي وود ناس ..
وعمل الحاجات دي كلها في زمن قياسي ..وامس قال بشتغل المنافع بكرة .. وهسي رسل العمال وشغالين في المنافع ياريت لو الناس كلهم زيكم كدا ..
كانت المدارس الحكومية شوية بقت صالحة للتعليم ..
اطمأنت على يوسف وركبت طوالي مشت الشركة .. ولقت الوضع عادي والناس شغالين زي المافي حاجة .. ادت التحية لي قرشي قعدت كدا .. قرشي قال ليها .. لاقاك عامر ؟
قالت ليهو لا .. قال ليها جا الصباح بدري قبل ناس الشغل هنا .. وقال لي كلام غريب .. ساط لي راسي سواطة ..
قالت ليهو قال ليك شنو؟
قال ليها ياستي جا عامر الصباح وانا كنت برتب في المكتب قال لي الحمد لله القيتك براك ياقرشي ..
تتخيل ياقرشي دالية ماعندها اي حصوة .. وانا تصلت علي ابوها .. وسالت امها .. وقالو ماعندها الحبة ..
وقال لي لازم نعرف دالية دي رسلت ليك لشنو؟
وهسي هو متوتر جدا .. قالت ليهو الموضوع ده كلو عشان القروش بتاعة امبارح ؟
قال ليها انا بقول ليك كلام سر شديد .. وواثق انك حتكتميهو .. بس عشان تعملي حسابك ..
القروش دي بالتاكيد سرقتهن دالية .. وعامر شكلو اكتشف الموضوع ..
قالت ليهو بس كيف يقول شالن هو ؟؟..قال ليها احتمال ماعايز يسبب لينا احراج .. وعايز يرمي الزول الشال القروش ..
وفعلا الزول ده شكلو نجح .. لانو من الصباح مشى المخزن مرتين ..
قالت ليهو الصباح متين يادوب اليوم بدا ..
قال ليها ياخي الزول ده الليلة جا قبل عمال النضافة ..
قالت ليهو ياقرشي .. ممكن اسالك سؤال .. ؟؟ انت القال ليك منو انو عامر زول تافه وبتاع بنات ..
بدليل انك وصيتني اعمل حسابي منو ..
قال ليها اولا هو كان عندو علاقة بي دالية .. وفجأة كدا خلاها وهي قالت لي .. اخد الحاجة العيزها مني وخلاني ..
وقالت الكلام ده لي كم واحد من الموظفين ..
بعدين في بت جات تشتغل هنا قبل فترة.. اسمها اسماء ..عامر رسل ليها ورقة فيها كلام قلة ادب ..وكلام تافه شديد.. تاني يوم قدمت استقالتها ..
وفي برضو واحدة تاني برضو رسل ليها رسالة في الموبايل ..وديك تاني ماجات الشركة اساسا" ..
وغايتو ... لكن غير كدا والله زول كريم واخو اخوان ومافيهو كلمة ..
قالت ليهو وعامر عارف البنات ديل سابو الشركة عشان كدا؟
قرشي قال ليها والله ماعارف يا ثويبة .. لكن طبعا" دالية بتكون كلمته لانو دالية دي لاصقة فيهو لصقة غريبة ..
قالت ليهو الله يجزيك خير يا قرشي.. والله نورتني تنوير شديد .. والله انت نعم الاخو ..
يازول ثويبة حست انو عامر مظلوم .. ودالية موسخة سمعته بغير ادلة .. لكن ماعارفة سبب الحقد الحاصل من دالية ده شنو؟
وراسها جاط جوطة شديدة خلاص .. معقول دالية تكون سرقت القروش عشان ترميني في مشكلة ؟
مغقول ..
المهم يازول في نص اليوم كدا .. قالت لي قرشي لو سمحت ياقرشي خلي بالك من الشغل انا مارقة وجاية ..
مشت لي عامر في مكتبو .. ودقت الباب براااحة كدا ..
قال ليها اتفضلي ياثويبة .. خشت لقتو براهو .. سلمت عليهو وقالت ليهو ..ربنا يجزيك خير ويبارك لك في مالك ..
واكيد عطفك على الاطفال واحسانك فيهم حيبارك ليك في مالك ..
قال ليها اها عندك شنو هسي اي خدمة ؟؟
قالت ليهو .. انت الليلة بعد الدوام ماشي وين .. ؟عندك اي مشوار جاي ولاجاي ؟
قال ليها ماعندي شي ؟ اي خدمة ؟ قالت ليهو انا عايزاك توصلني البيت ..
قال ليها معقول ؟؟ انا مامصدق اضاني .. يا سعدك الليلة يا عامر ود فاطمة .. هه
قالت ليهو والله انا سعيدة بيك .. انت زول تستاهل الخوة والموده ..
قال ليها طيب انتي هسي عندك شنو؟ .. خلي باقي الشغل على قرشي .. ونطلع هسي عشان يكون عندنا وقت كافي نكمل فيهو كلامنا ..
قالت ليهو .. بس في شغل كتير وصعب على قرشي يقوم بيهو بارهو ..
قال ليها قبل ماتجي انتي .. شهر ونص كان شغال براهو ....
استأذني منو وخلاص .. قالت ليهو كويس اشوفو واجيك راجعة ..
مشت كلمت قرشي.. قالت ليهو انا طالعة موضوع ضروري انت اشتغل لي شغلي وانا بشتغل ليك شغلك بكرة ..
قرشي قال ليها حاضر ياثويبة خدي راحتك مافي مشكلة ..
جات راجعة لي عامر تاني .. وعامر حس انو البت دي الليلة ماطبيعية.. وبتتعامل معاهو بي كل اريحية .. مازي الايام الفاتت كانت بتتعامل بحذر شديد ..
ياربي البت دي القلبها كدا شنو ؟؟وبقا راسو يودي ويجيب ..
احتمال البت دي تكون متكيفة مني ..ساي كدا عشان شغل المدرسة ياربي ؟..
المهم يازول قبل مايطلعو .. ثويبة قالت ليهو لحظة بس اقيف لي قدام بوابة المخزن .. عايزة دالية في كلمتين ..
قال ليها دالية عايزة بيها شنو؟ خلينا منها عليك الله ..
قالت ليهو لالا .. انا مصرة .. وعامر عرف انو ثويبة قاصدة انو داليا تشوفها راكبة مع عامر ..
ياربي البت دي الحصل عليها شنو فجأة كدا ..
قال ليها كويس حنغشاها .. وتعال شوف .. هههه ..
..
الى اللقاء ..
