ثويبة انزعجت جدا من ردة فعل سوزان .. وابوها كان قاعد في السرير وبراقب.. قال ليها عيدي الرقم ودقي ليها تاني.. ثويبة عادت الاتصال .. وادها جرسين وتاني عمل مشغول ..
ثويبه قالت لابوها .. والقلق ظاهر عليها.. ماحترد تاني يا ابوي.. اوووب علي انا هسع اسوي شنو؟ دايره اكحلها عميتها..
عم البشرى قال ليها هدي روحك كلو بتحلا ..تعالي احكي لي. جات حكت ليهو الحصل من طقطق للسلام عليكم .. البشرى قال ليها .. انتي ماغلطانه لانك قريتي الورقة فاكراها ليك صح؟ .. وهي زاتها ماغلطانه اي زول في مكانها . يحس بانو في زول قرا رسايلو الخاصة بهيح وبزعل..
ثويبة قالت لابوها.. طيب الحل شنو يا ابوي .. انا مابقدر اقعد كدا لي بكره..
قام علي حيلو ولبس طاقيتو وعندو شبشب كدا اكل عليه الدهر وشرب من ابو اصبع داك ..كشتو .وقالها هي ساكنة وين سوزان دي ..
قالتلو ساكنة في العرضه بس ماعارفة وصف بيتهم بالضبط.. قال ليها قولي يارب نتوفق.. البسي تعالي..
طلع بالشارع التاني في واحد بتاع بقالة .. البشرى قاليو.
عليك الله ياخالد اتصل لي على الرقم ده .. قال ليو حاضر ياخال من عيوني .. ضرب للبت وسمع الجرس وسلم التلفون لي البشرى وثويبة واقفة مربعة يدينها تتفرج..
سوزان فتحت الخط . قاليها انا البشرى والد ثويبة. انا جاييكم في البيت زيارة ممكن؟
قالت ليهو تتفضل طوالي قاليها وصفي لي البيت ..
وصفت ليهو .. قفل السماعة وقال لثويبة .. مع البشرى موش حتقدر تغمض عينيك .. يلا يابت على العرضة . انا بوصلك ليها وتاني انتي وفلاحتك ..
وشكرو خالد بتاع البقالة ومشو ركبو على العرضة ..
اها يازول في الشارع بوصي فيها قاليها عارفة ياثويبة .. اي حاجة في الدنيا دي بتتحل بالهداوة وطولة البال.. وطال ما الانسان بعيد من الغضب والانفعال بحل الامور باسهل مايكون..
سمعتي ود اللبيب قال شنو؟ اها قال شنو ..؟
قال . غرضك بنقضى ويتنفذ المطلوب ..
أكان هديت كلامك وقلتو بي اسلوب ..
الطالبلو شي . وقال الطلب مغضوب .
بصد شايل قماحو وربما مضروب ..
بعدين ياثويبة سوزان دي معاها حق ..يعني حست انك اتجسستي على خصوصياتها مهما سمعتك من كلام جارح ماتغضبي . وتنتصري لنفسك . يكون هدفك الانتصار الاكبر وهو تحقيق الهدف الجيتي ليهو ..
قالت ليهو حاضر يابروف .. المهم وصلو واستقبلهم اخو سوزان ..ضعيف زيها كدا ولابس ليهو برموده وسفنجة .. ومعلق السماعات في اضنيهو ..
اتفضلو ودخلو ثويبة خلت ابوها برة في البرندة مع الود..
ودخلت على سوزان .. سوزان سمراء نحيفة نخرتها سيف عيونها حلوة بتلبس نظارات نظر. كلامها بسيط وجادة جدا.. واصلا مافتحت موضوع مع ثويب لغاية صلو المغرب
وختو ليهم الشاي .. وابونسة كانت . عادية وجميلة مع سوزا وامها واخواتها . بعد الشاي ثويبة قالت لي سوزان عايزاك في كلمتين..
دخلت معاها على غرفتها.. وبدت سوزان ..قالتلها..ثويبة ده شنو العملتيهو ده.. كيف تقري رسالة خاصة.. انا والله ما كنت مفتكراك بالمستوى ده..
حقيقة زعلت منك شديد . وكرهت قرشي زاتو . هو ليه مايسلمني الورقة براهو .وثويبة ساكتة خلتها لامن خلصت كلامها .. قالتليها . عارفة يا سوزي حبيبتي . انا قبيل كنت. مستاءة وحزينة وقرشي فتح معاي موضوع .وبدت تحكي ليها. كيف قرش زول مهذب وبستحي . وانا كنت فاكراهو . قاصدني . واتضايقت جدا لاني صراحه بحب زول تاني . مع انو علاقتنا مستحيله بس مابقدر افكر ف غيرو في الوقت الحالي .. وكنت شايله هم كيف ارفض قرشي وهو زول حساس .. فلمن شفت الورقة افتكرتها لي ولمن قريت. اسمك الاخر .. بقيت اضحك على غباي..
انا عليك الله الدايرني منو ..؟.
سوزان سكتت ساي .. وكانت مدنقرة وتسمع .. لمن خلصت ثويبة.. قالتلها ياريت ياثويبة انا قبيل سمعت كلامك للاخر.. وخليتك تفهميني براحة ..يازولة ولايهمك.. بعدين قرشي والله متيمة بيهو اكتر بس المخوفني منو حماقتو ولتاختو .. قالت يا سوزي مافي زول مكمل..
قرشي حقاني وزول واجبات و اخو اخوان..وبعرف ربنا .وان شاء الله مايظلمك.. بس بخاف من الحريم قال..
سوزان قالتلها .خلاص انا باكر برد ليهو ..واهرشو ليك من اول يوم ..
بس عليك.. احكي لي ده منو الشايل قلبك ياثويبه..
ثويبة اتنحنحت و قالت : طبعا انتي عارفة انو دالية كانت عايزة تموت في عامر .. وانا لمن جيت اول ايام عامر بدا ليهو معاي موضوع .. وانا
ماكان عندي نفس في اي حاجة .. اخوي متوفي يادوب.. وحاسة بي دالية متمسكة بيهو فحاولت اجمعهم .. وقلت ليهم الاتنين عايزة
ودعمي .. وخلاص عامر صرف النظر مني ..لكن اكتشفت دالية غاشة عليهو وبتحب واحد تاني ..
سوزان قالت ليها انا عارفة كدا وهي حكت لي كل شي .. دي زولة مكارة وعمرها ما بتتعدل .. اها وتاني الحصل شنو؟
قالت ليها الحقيقة انا ود عمي ماعايزني ولاشي . ةحسيت نفسي متعلقة بي عامر ده بدون ما احس .. وبقيت لاقادرة اصارحو
ولاقادرة انساهو .. لكن هسي الباب اتقفل في وشي . وقالو حيتزوج بت عمتو ..
شفتي يا سوزان الحاصل علي هه واخدت ليها ضحكة .. انتي احمدي ربك انو في زول مغرم بيك وشاريك .. انا كان عرضوني في
الدلالة مابجيب قرشين .. سوزان قالتلا ..يازولة قسمتك بتجيك..
ثويبة" :ونعم بالله .. اها ياسوزي حبيبتي انا بمشي ان شاء الله ربنا يتم ليك على خير وعليك الله زي ما وصيتك القرشي ده واهو زي اللبن ..
بس انتي افهمي شخصيتو زول اتجاه واحد ..
قالت ليها ماتشيلي هم يا زولة انا قادرة عليهو والله اظبطو ليك ظبيطة..
اها يازول طلعو من ناس سوزان وكانت ثويبة فرحانة زي الكانها عرسوها هي .. عكس المشاعر الجات بيها من هناك .. وحكت لابوها طبعا .. والبشرى مبسوط يعاين لي بتو تتبسم فرحانة ..
قال ليها مبسوطة ياثويبة .. قالتلو معقول زول يكون برفقتك مايكون مبسوط .. انت يابوي ربنا يخليك لي ..
وفي البيت وصلت مبسوطة لدرجة انو العملية القامت بيها دي.. خففت منها بعض العذاب والاسى الوجداني من فقدان عامر ..
المهم يازول وصلت البيت .. والليلة مامشت على الدفتر ..
اصلا .. بس قبلت علي الحيطة .. واخدت ليها بكية كدا ونامت..
صحت الصباح بدري .. وقالت امي ابوي تعالو .. احكي ليكم شفت شنو في النوم .. امها قالت ليها .. يالطيف من حلمك انتي ياثويبة .. عليك الله كان حاجة كعبة ماتقوليها لينا ..
الى اللقاء .. ان شاء الله ..
