البت تبكي ..ودموعها تتشتت فوق خدودها زي العيش .. وقرشي متمحن يعاين ليها .. وماعارف يقول شنو؟.. اول حاجة فكر فيها ..انو يمشي يبلغ عامر بالسرقة.. قبل عامر مايطلع .. عشان عامر الوحيد البقدر يحقق مع الناس ..
خلاها في حيرتها وبكاها داك ومشى .. لي عامر سريع .. اول ما عامر شافو ..قاليهو مرحب قرشي.. مالك منزعج كدا .. انت من تمشي سريع كدي .. واشوفك بتكشت .. بعرفك وراك مصيبة ..
قرشي قاليهو والله فعلا مصيبة ياعامر .. في قروش اتسرقت من الخزنة ..
قاليهو تتسرق كيف .. وانتو قاعدين في المكتب؟ ..قاليهو نحن كنا مافي .. ثويبة كان طلعت جات قبل شوية ..
عامر قاليهو وانت ؟؟.. قاليهو انا زاتي طلعت .. قاليهو طلعت مشيت وين ؟؟
قاليهو ضربت لي دالية لي موضوع ؟..
ولمن رجعت لقيت ثويبة منزعجة وتبكي .. لانو السارق شال المفتاح من شنطتها .. يعني بصراحة السرقة حصلت نتيجة اهمالها هي .. وهي مقتنعة بكدا ..
عامر قال ليهو القروش كم ياقرشي ..؟ قال ليهو 8,230قالت ..
قال ليهو .. ايوااا .. بس القروش دي شلتها انا ياقرشي .. ماتشتغلو بالموضوع .. ارجع لي شغلك ..
قال ليهو بس مادونتها يا عامر.. قال ليهو امشو دونوها ..
طبعا مفاتيح الخزنة تلاتة نسخ .. نسخة عند قرشي .. ونسخة عند ثويبة.. ونسخة عند عامر نفسه ..
اساسا في نهاية اليوم محصلة اليوم كلها بتتورد في البنك .. والبنك لصق الشركة من الناحية الجنوبية ..
المهم قرشي ارتاح نفسيا .. وشال نفسو وختاهو .. وقال ليهو ياخي والله جرستنا جراسة ..اسكت خليها ساي ..
قام قرشي بس جاري جري ..عشان يبشر ثويبة ..بانو القروش اتعرف مكانها ..
وكت وصل لي ثويبة .. قال ليها ثويبة ابشري القروش اتلقت .. قالت ليهو اتلقت وين؟ ..الشالا منو؟
قال ليها شالا عامر ..
قالت ليهو شنو؟ عامر ؟؟ مستحيل !!.. لاني انا كنت مع عامر ..
ولمن مشيت ليهو خليتك انت قاعد هنا .... وانتظرتو لمان انتهى من الاجتماع .. ودخلت اتكلمت معاهو ..
وطلعت منه وجيت على طول .. انت القال لك منو شالا عامر ؟..
.... قاليها ..قال لي عامر براو ..
قالت ليهو .. معقول؟ .. دي تجي كيف .. ؟ دقيقة انا امشي اتأكد من عامر .. قرشي قال ليها تتأكدي شنو يابت؟؟.. مادام قال شالا هو.. يبقى نحن تاني ماعلينا اي مسؤلية ..
قالت ليهو بس انا ما مقتنعة من جواي بالكلام ده .. كيف يشيل قروش بدون يدينا خبر ولاحتي يدونها ..؟
قال ليها طيب .. احتمال قال كدا .. عشان يرمي الزول السارق .. نحن علينا هسي نلزم الصمت ..
هم بتكلمو كدا في عامل جا .. قال ..قرشي مطلوب في مكتب المدير ..
قرشي عايز يطلع .. ثويبة قالت ليهو ..امشي وتعال سريع.. انا طالعة ماشه ليو ..
اناشكلي تاني ماحشتغل في الشركة دي .. انا الخوفة الحصلت علي دي عمري ماشفتها ..
قرشي طلع مشى لي عامر تاااااااااني .. عامر سألو .. قاليهو.. ياقرشي انت زول اخوي.. والوحيد البثق فيك في الشركة دي .. ممكن اسالك سؤال .. ؟وتجاوبني بصراحة ؟وسرك في بير ..
قال ليهو.. الله اكبر ياعامر ..انا عارفك صميم والله.. اسأل وانا بقول لك ..
عامر قاليهو قصة داليا دي شنو ونادتك لشنو؟
قاليهو رسلت لي رسالة ..وقالت قالت .. وتاني ضربت لي عديل .. عشان توصيني ما اتكلم ..
قال ليهو خلاص.. بس ده سؤالي امشي انت ..
اول قرشي مارجع مكتبو لقى ثويبة وافقة علي حيلا منتظراهو ..
قالت ليهو اقعد ياقرشي تابع الشغل انا بجي هسي ..
ثويبة مشت لي عامر .. ودقت الباب كعادتها .. عرفها طوالي (هي بتدق الباب براااحة كدا) قال ليها اتفضلي .. دخلت السلام عليكم ..
قال ليها عليكم السلام .. والله انا الليلة بسحروني تجيني مرتين ؟؟
قالت ليهو ياعامر هل فعلا انت شلت القروش من الخزنة؟ .. قال ليها ايوة نعم في شنو؟ .. ما انا طوالي بشيل قروش . الحصل شنو يعني ؟؟
قالت ليهو بس انا كنت معاك ورجعت مالقيتهم.. يعني شلتهم كيف ؟
ومالقيت ليهم اي تدوين .. ولا اشارة في سجل اليوميات .
قال ليها ايوااا .. دي الاشكالية يعني ؟.
انا اديت المفتاح لي ليلى ومشت جابتهم لي ..بعدين سجلوهن ..
قالت ليهو بس انا لمن جيت ولقيت معاك الجماعة ..انت سألتني من ليلى .. موجودة ولالا ؟؟.. قال ليها ايوة كنت قايلها جات ..الظاهر اتاخرت بس ..
قالت ليهو ايوة خلاص.. كان كدا مافي مشكلة .. والله صراحة انا خفت ..
قال ليها بس ياثويبة لمن تطلعي من المكتب ماتخلي المفتاح وراك ..
قالت ليهو والله ما بتخيل انو ممكن زول يشيل المفتاح من شنطة زول .. قال ليها النفوس ماواحد يابت البشرى ..
المهم البت يادوب ارتاحت ونفسياتها هدأت .. ورجعت لي شغلها عادي ..
وقالت لي قرشي انا يادوب ارتحت ..عامر قال رسل ليلى جابت ليهو القروش ياقرشي ..
في اخر اليوم داليا جات لي ثويبة في المكتب .. ولقت قرشي لسع ماطلع .. ولقتهم شغالين ..
قعدت في الكرسي وقالت .. أححي .. والله الليلة كترة شغل.. انا حاسة حيلي اتهدا ..
كيف الليلة يومكم يا اولاد ؟
قالت ليها والله تمام احسن يوم .. قالت ليها ليه؟ الحصل شنو اصلو خلاك سعيدة كدا ..
قالت ليها بس كل بكتشف انو ناس الشركة ديل صفوة من البشر ربنا يحفظكم ..
ثويبة بتتكلم ومركزة في الاوراق .. وداليا . منتبهة شديد لكلام ثويبة ..
وقرشي بقى يعاين لي داليا بطرف عينو كدا ..
عامر جا داخل فجأة .. لقى داليا قاعدة مع ناس ثويبة .. سلم وعاين جاي وجاي.. وما اتكلم اصلو ..
مشى على الخزنة وقال ليهم اها ياشباب .. تاني ماتتوترو بلا سبب ..
اصلا انا دايما بجي بشيل قروش لي احتياجات خاصة وعامة ..
هسي يا ثويبة سجلي معاك ال8.230 الشلتها انا قبيل دي في المنصرفات ..
قالت ليهو حاضر يا استاذ ..
داليا ختت ايدا فوق خشمها .. وبقت تعاين لي عامر .. وقرشي متابع الموضوع وبس بعاين لداليا ..
وثويبة طبعا المسكينة وداقسة .. ماخاتة بالها في اي شي .. وحاسة بانو في جبل انزاح من اكتافها وبس ..
قامت داليا وقالت عن اذنكم ياجماعة.. انا تعبت والله ماشة البيت .. عامر ما اتكلم معاها ..
ثويبة قالت ليها الله يسلمك ياداليا ..
بعد طلعت . عامر قال لي ثويبة لو سمحتي ياثويبة اديني سجل اليوميات ..
سلمتو ليهو.. قعد يراجع فيهو .. وقال ليها .ياسين النور . دا دفع القروش لمنو فيكم؟ (ده الزول الاشترى الاقلام)..
ثويبة قالت ليهو دفع لي انا .. قال ليها وقرشي ماحاضرو؟
قالت ليهو لا .
قالت ليهو لا .. قال ليها دي طبعا اول قروش استلمتيها .. وياها الجابتها لي ليلى موش؟؟ ..
قالت ليهو نعم ..
بعد طلع عامر قرشي قال لي ثويبة ..
ملاحظة حاجة ؟ قالت ليهو ابدا" في شنو؟ قال ليها .. في موضوع انا ماقادر افهمو بين داليا وبين عامر ..
انا اشك انو عامر ماشال القروش دي .. وانو متهم داليا ..
قالت ليهو يا قرشي انت انسان نضيف .. وانا خاتاك قدوة .. ياخي ماتتهم الناس بمجرد الظنون..
حتى لو جاك شك في انسان.. انت ماتتكلم بيهو.. الا يظهر الشي واضح قدام عينيك ..
قال ليها تفتكري ليه عامر بسأل في الاسئلة دي ..؟
وبستفسر عن الزول ده .. انا من قبيل شكيت في انو داليا نادتني مرتين ليه..
قالت ليهو .. فكر انت في المواضيع براك انا الفيني مكفيني .. قال ليها غايتو انتي عندك شوية دروشة بتضيعك يوم صدقيني ..
لكن الحقيقة انو ثويبة بدا ينتابها شي من الشك في الموضوع ..
وهي بتحاول تتجاهل المواضيع الزي دي ..اها يازول اليوم انتهى والناس كلهم مشو ..
اها بعد وصلت البيت .. ابوها قال ..ياجماعة انا تعبت من شغل الطرمبة ده ..
وفكرت ارسل لي عمر ود ميرغني اخوي .. يمسك لي الشغل اسبوع كدا.. اخد لي راحة في البيت ..
وكلمت ناس الطرمبة ووافقو .. عايز ارسل ليهو رايكم شنو؟
زينب قالت ليهو مرحب بيهو يجي طوالي .. ثويبة قالت ليهو فعلا يا ابوي.. والله انا حاسة بيك ..
ودي فكرة كويسة الاسبوع بديك جمة شوية ..
اها يازول ده اليوم التاني اصبح .. وبرضو ثويبة ما ساقت يوسف للمدرسة.. ومشت الشركة بدري
واليوم ده كانت قابضة في مفتاحها قبضة قوية ..
واليوم ده عامر ماجا الشركة نهائي ..
بس في اليوم ده حصل تعارف بين ثويبة وبين سوزان بتاعة الكمبيوتر .. الوصاها عامر تتعرف بيها .. بت ضعيفة كدا ولابسة نظارات نظر .. ومابتتكلم كتير .. وشكلها جادة جدودية شديدة خلاص ..
بس طول اليوم مكبسة في الكي بورت بتاع الكمبيوتر ..
وشغالة جك جك جك جرك ..
في اثناء الونسة معاها .. سوزان قلعت نظاراتها وقالت ليها اسمعي يابت ..
انا شايفة الشيطانة دي دايما بتدخل ليك في المكتب .. وانا بحذرك البت دي افعى ..
البت دي سيئة .. ثويبة قالت ليها بس انا ماشفت منها شر ..
سوزان قالت ليها .. يا استاذة حبوبتي كانت بتقول لدغة الدبيب الزول ما بحس بيها لكن بتقتلو ..
هسي دالية يا ثويبة مطلعة دعاية في عامر الانسان النبيل .. انو زول بتاع بنات وسممت عقول الموظفين كلهم .. اي واحد بتحكي ليهو بطريقة .براهو.. وعامر المسكين ماجايب خبر ..
بس انا مابتقدر تكضب علي .. لاني كاشفة الاعيبها لانها كانت صاحبتي ..
وفجأة سوزان قطعت الكلام .. شافت داليا جات مارة بي قدام مكتب الكمبيوتر ماشة على مكتب الحسابات ..
ثويبة سريع قامت مشت مكتبها لانها بقت شاكة فعلا في داليا ..
اها لقت قرشي قاعد .. اطمأنت شوية .. دالية طوالي بدت تتكلم مع ثويبة ..
اسمعي ياثويبة المقعدك مع الثعلبانة دي شنو؟
انتي ماعارفاها دي الجاسوسية بتاعة عامر .. عامر بدفع ليها عديل عشان تتكلم عنو كويس ..
وكلمتني براها ..
ثويبة قالت ليها .. داليا .. والله انا عندي شغل كتير خلينا نتكلم في المواضيع ي بعدين ..
انتي همك فاضي يا الحبيبة .. قالت ليها خلاص بجيك بعيدن ..
بس ثويبة ماقادرة تجمع في الشغل من الدراما والالغاز الحاصلة في الشركة دي ..
وقررت انها تكتشف الامور بنفسها .. عشان ماتبقى ضحية .. خداع من زول ..
وكدي نشوفها حتعمل شنو؟
الى اللقاء ..
