اها يازول ثويبة وصلت للشركة.. وكانت شوية الليلة مبتهجة ومامتوترة ..وحاسة انو اليوم ده حلو .. وناوية تسأل قرشي من السبب الكان مضايق عامر ..
بس لقت قرشي ماف.. وما كانت عارفة انو قرشي قاعد مع عامر.. وبتشاورو في الموضوع الح يدمر ليها امالها ..
اها لمن جا قرشي .. قالت ليهو انا ماشة لي عامر .. معاهو زول؟ .. قال ليها براهو لكن ..عايزاهو في شنو؟.. قالت ليهو طبعا الزول ده بكون محرج من موقف امبارح ..ومن امس ماقادر يجي بي هنا ..
فانا ماشة اطيب ليهو خاطرو .. وافهمو انو الموضوع عادي .. واي زول ممكن يخطئ في تقدير الامور ..
لكن هي طبعا حتزف ليهو خبر عمر في اثناء الكلام .. عشان تفتح ليهو طريق قفلتو زمان ..
قام قرشي قال ليها .. والله الزول ده لاهسي متوتر شوية من الموضوع بتاع امبارح ..
قالت ليهو اها ماقلت لي يا قرشي ..
هو عامر امبارح المضايقو شنو .. الموضوع شكلو كبير ..لغاية هسي انتو بتتناقشو فيهو ..
قال ليها فعلا والله .. ياثويبة موضوع مصيري في حياة عامر ..
ياستي .. انا لمن مشيت بيتهم ابوهو قال لي حنس عامر يقبل ببت عمتو .
ابوهو مصر انو يزوج ليهو بت عمتو من النيل الابيض ..
ثويبة بعد ماكانت واقفة قعدت برااااحة ..وحست بانو كريعاتها ماتن .. وقلبها نزل في بطنها ..
وسرحت كدا وبقت تعاين للباب ..
وقرششي مافاكر للملامح المبكية.. الاترسمت في وشها.. وخيبة الامل الفظيعة ..
قالت ليهو اها ان شاء الله يكون بس وافق بيها ..
قال ليها والله هو مابقدر يرفض طلب ابوهو طبعا".. بس متضايق شديد .. لانو شكلو ماعايز البت .. وده ما اختيارو ..
اها طبعا ثويبة .. اتلاشت عندها اي امال .. وماتت الاماني في قلبها قبل ان تحيا ..
لكن غايتو البت دي عبارة جبل اصم .. سبحان الله عدت اليوم ده طبيعي ..
واشتغلت شغلها كلو .. فقط حاسة بي حمى غريبة .. وقلبها شدة ما محترق قربت تشم ريحة دخانو
ولسان حالها يقول كما قال اللبيب..
.
عصفور الاماني الكان مؤانس صوتو ..
اعلن حظي في نشرة حداشر موتو ..
لوكان تركو طار .خلاهو حي في فوتو.
كان خلا الامل عايشلي رغم خفوتو ..
.
الريد من حياتي ومن مصير اتخلا..
دنقر شال عصاتو ومني هجا وولى ..
مادام اصلو راحل وخيرو شحه وقلا..
ماكان يأذا قلبي ولي يســــبب عله..
.
كل ما اقــــول خلاص حظي البعيد اتدلا ..
القى الفرحة طشت والامل بتغـلا ..
من جمر الوجيعة الفي فؤادي مصلى ..
انهارت قواي وانا روحي دار تنشلا..
.
وهي في الحالة الغريبة دي نادتها دالية وقالت ليها ياثويبة .. انا طبعا" من بكرة ح ينقلوني لي فرع بحري ..
بالرغم من اني حافقدكم .. لكن بحري احسن لي لانها قريبة لبيتنا ..
وياثويبة انا ماعارفة اشكرك كيف .. انا خلاص خليت عامر .. وبقيت على حبيب عمري .. عزو ..وتاني مابتخلا عنو ان شاء الله نعرس بي بلح في الجامع ..
عارفة ياثويبة الليلة الصباح عامر جاني في المستودع وتف لي في وشي ..
وقاللي انتي اخبث من ابليس .. وقال لي انا ما حأرفدك من الشركة .. بخليك تقعدي هنا وتحرقي براك .. والظاهر ياثويبة .الموظفين اولاد الكلب ديل حكو ليهو .. انا متأكدة انتي مابتحكي .. لكن بكون ده عبد القادر العجوز الهايف ده ..
ثويبة قالت ليها خلاص خير في امان الله خلي بالك من شغلك ومن عزو .. ود احسن قرار ..
اليوم ده مر وثويبة ماشافت عامر بي عينها برضو هسي كدا يومين ماشافتو ..
وحاسة بكمية من الاحباط .. والحسرة ...
في نهاية اليوم وثويبة في قمة الاحباط والالم .. قرشي قال لي ثويبة.. انا ياثويبة والله كل يوم بكتشف فيك حاجة جديدة ..وبالجد انتي زيك في البنات قليل ..وانا عندي موضوع عايز اطرحو ليك ..لكن بس خايف من ردة فعلك .. ومع كدا انا مطمئن لانك انسانة متفهمة ..وما ممكن تظلمي ولاتحرجيني ..
قالت ليهو في شنو ياقرشي ..جبت لي خوفة بكلامك ده.. انت عائز تقول شنو بصراحة ؟
قال ليها والله ماعارف ابدا ليك الكلام كيف ..
طيب انا عايز اسالك سؤال.. انا بحب لي واحدة شديد.. وهي ماعارفاني بحبها ..وكل يوم بعاين ليها واسرق النظر وهي ما ملاحظة .. وانا ماقادر اصارحها ومابقدر اوسط لي زول عشان يوريها .. تفتكري اعمل شنو عشان تفهم مشاعري ..
ثويبة دي قلبها بدق يدق وخافت من كلام قرشي شديد.. وبقت تفكر انها ترد عليهو كيف وهو زول حساس وما بقبل ا?حراج.. وهي ماعندها ليهو ولاصفر في المية جواها .. وحست بالكلام انو قاصدها .. بقت تبلع في ريقها ..
وقالت ليه والله فعلا يا قرشي السؤال صعب .. طيب انت بس حسسها باي حركة من بعيد لابعيد ..وشوف ردت فعلها لو اتجاوبت ..معناها موضوعك ظابط ،، ولو عملت رايحة معناها شوف غيرا ..
قال ليها ثويبة انتي اكتر زول بعرفني.. انا الحركات دي بتاعة الشفع دي ما بعرف ليها نهائي ..
لازم افكر لي في حاجة بتاعة رجال وناس ناضجين ،،
قالت ليهو طيب فكر ووريني فكرتك.. لو ظابطة بقول ليك .. ولو بيش بقول ليك ..
قال ليها بصراحة انا فكرت اكتب ليها ورقة ،، وابوح ليها فيها بكل مشاعري،،
لكن المشكلة انا مابقدر اسلمها الورقة دي كلو كلو .. انا جبان قدام الحريم ماتشوفي هوشتي دي ..
لو اديتك الورقة بتخليها تقراها وترد لي .؟
قالت ليهو نعم كدا تمام واوعدك الرد يجيك .. قال ليها اتفقنا ،
اها يازول ثويبة بقت مربوكه ربكة غريبة . قرشي ده اخر من تفكر فيهو..واليوم خلاص بقى في نهاياتو.. وقرشي مستجل عايز يطلع سلم ثويبة ملفات قال ليها قبل ماتطلعي راجعي الملفات دي،،
اها لمن قرشي طلع فتحت الملفات وبقت تراجع فيها لقت الملفات كلها قرشي مراجعها مرتين وماضي عليها ..
طيب ياربي اداني ليها ليه الاوراق دي ..؟
لفت نظرها في نص الاوراق في ورقة مطبوقة .. فتحت الورقة لقت قرشي كاتب فيها كلام كدا وحولو راسم ليهو وردتين .. سمحات سماحة ..
كاتب .. الى الانسانة الانيقة التي سرقت احاسيسي.. على حين غفلة مني ..
الى الانسانة التي اشعرتني ان في الدنيا هنا ..نساء تستحق الحب والغرام .. انا اكتب اليك هذه الاحرف لاني امتلئ بالامل ان تكوني اميرة احلامي وشريكة حياتي ..
انا لا أعرف العلاقات الملتوية ..
ولا هاوي قصص حب عقيمة انا اريد العفة لنفسي ..
فلو كنتي كما اتمنى واشتهي فردي لي على الورقة دي ..
وان كنتي ترفضين يكفيك ان لاتردي علي
عارفة ياحبيبتي (سوزي ) ؟
انا بقيت كان داير انادي اختي في البيت بقول ليها تعالي ياسوزان..
في امان الله وانتظر ردك ..
.. المعذب قرشي ..
ثويبة كتمت ضحكة وختت ايدها فوق خشمها .. طبعا الطبعة دي شايلاها من امها .. وكان بعملا احمد كتير ..
ثويبة طبعا كانت مفتكرة انو قرشي خاتي عينو عليها ..لكن طلع الزول مكسر في سوزان بتاعة الكمبيوتر ..
المهم شالت نفسها وختتو وقالت الحمد لله اني ما استعجلت وسبقت الحوادث ..
وقالت براها كدا بينها وبين نفسها ..حاضر ياقرشي اوعدك اني اخدمك في الموضوع .
شالت الورقة سريع ومشت لي غرفة الكمبيوتر عشان تلاقي سوزي ..
بس لقت سوزي طالعة تصلح في نظاراتها ..
سلمت عليها ..
ثويبة قالت : انا حالي ده جاياك في موضوع لكن .. ما مشكلة الورقة دي مرسلها ليك قرشي ..
اقريها في سرية تامة .. وانا منتظرة ردك ..
قامت سوزان قالت لثويبة اديني رقم تلفونك .. ثويبة قالت ليها يخربني تلفون ماعندي ..
لكن بديك تلفون ابوي .. ادتها تلفون البشرى ..
ومشو ..وفعلا العصرية كدا سوزان اتصلت ..على ثويبة في تلفون البشرى .. سوزان ساكنة في امدرمان العرضة .. المهم البشرى سلم التلفون لبتو وقال ليها زميلتك اسمها سوزان ..
وسوزان سلمت عليها .. وقالت ليها يا ثويبة انا عايزة اسألك سؤال ..
انتي قريتي الرسالة الرسلها لي قرشي ؟ قالت ليها ايوة قريتها ..
قالت ليها .. انتهينا خلاص .. وانا قرشي لو بقى اخر راجل ماعايزاهو .. لانو جاني من طريقك ..انتي انسانة حقيرة ..
ثويبة قالت ليها دقيقة يا سوزان انفهمك ..
قالت ليها اسفة .. ماعندي معاك كلام تاني .. وقفلت الخط ..
الى اللقاء ..
