اها يازول لمن عامر سمع الرد القاتل ده من ثويبة ..حس بي جسمو مات.. واعصابو انهارت . وحاول يتماسك . عشان يسمع السبب البتقولو ليهو .. وجواهو ستين الف صوت من الضجيج . اظهر صوت بقول يارب يكون سبب بتحل وفيهو امل ..
قالت ليهو السبب حاجتين . الحاجة الاولى .. بالنسبة لداليا ..
انت عارف ياعامر داليا صغيرة في السن . ولسع ما عقلها مااكتمل . بدليل التصرفات البتعمل فيها دي .. وفي النهاية الانسان معرض للغلط في اي لحظة .
فكونك انت تخلي داليا .. لمجرد انو مثلا كان عندها واحد بتحبو .. الكلام ده فيهو عدم عدل منك ..
وانت اساسا مابتقدر تثبت عليها جريمة شفتها بي عينك صح ؟
انا بشوف الحاجة دي عجز منك انت وتقصير ..وانا مابقدر الومها في الحكاية دي .. عارف ليه؟ .. لو انا مثلا شفت الانسان البحبو اتعلق بشخص غيري ..قبل ما اقبل الخسارة واتخلى عنه .. المفروض اجرب المحاولة للنجاح ..وتحاول تنزع اي دخيل من قلب حبيبتك .. بي اخلاقك وتصرفاتك .. صدقني ممكن انت بي شطارتك تخليها تكرهو عمى .وتحبك انت موت ..
لكن انت استسلمت طوالي وخسرت حبيبتك الاولى ..
وما حاولت اي محاولة.. انك تظهر ليها بالافضل.. عشان تعرف تقارن بينك وبينو ..
وحتى بعد اتخليت عنها .. هي فضلت ملاحقاك.. وبتزيل من طريقك اي واحدة ..
بي طرق غير صحيحة وبالمكايد وبالضرر ..
ده بدل على انو الزولة دي شارياك .. وبتحبك ومتمسكة بيك .. كفاية انها ارتضتك تكون بالنسبة ليها رمز الحياة ومستقبل الاحلام ..
يعني العلاقة ديك علاقة عرضية وهشة .. ممكن بتصرف بسيط منك تشيلا من طريقك.. وتمشي لي قدام ..
وبي كدا انت تكون كسبت حبك الاول.. وكسبت عم الامين .. وارضيت ابوك ... فانا عشان ما اكون قطاعة نصيب ومصدر خراب. اديني فرصة اقرب من داليا .. واتكلم لي معاها.
واغسل ليها دماغها..
السبب التاني .. امبارح ابوي اتكلم معانا.. وقال انو عمر ود عمي ميرغني جاي يمسك الطرمبه بدلو .
وانا حاسه بان ابوي عندو راي ..وعايزني اتعرف على عمر من قريب .. .وشكلو ابوي بتمنى انو يزوجني لود اخوهو .. .ولو بقت دي امنية ابوي.. تبقى دي امنيتي برضو .. .نفسي احقق لابوي كل امانيهو في الحياة..
عارف ياعامر .. طبعا" ابوي اصلا ماصرح لينا بي هدفو .. لكن ابوي عمرو ماممكن يخلي زول يشتغل ليهو شغلو .. وهو يقعد في البيت.. الا يكون عندو هدف ..
ابوي بمشي يشتغل وهو عيان .. عشان مايخلي الناس يشتغلو بدلا عنو ..
عشان كدا .. مافي اي فهم .. غير انو عايز الموضوع ده ينطبخ بيني وبين ود عمي ..
انت فهمت الحاصل يا عامر ..
قال ليها ايوة فهمت تماما" بس في حاجات محيراني ..
انتي مادام عايزة تصلحي بيني وبين داليا .. دي شنو الحركة العملتيها دي ..
كيف تركبي معاي .. وتصري انها تشوفك ..
قالت ليهو .. لاني ماكنت فاهمة القصة كدا .. الافكار دي كلها جاتني بعد ما انت حكيت لي عنها وعن التداخل الاسري الحاصل ..
قال ليها بس انا ذنبي شنو يا ثويبة.. انا حاسي انك انتي البتنفعي معاي ماهي ..
قالت ليهو لازم يكون في تضحيات كمان شوية من أجل الناس البنحبهم والناس البحبونا ..
وفي االنهاية يا عامر مافي زول في الدنيا دي كعب ..
بس الاجواء المحيطة هي البتدفع الزول لانو يستقيم ولا ينحرف .. وكل البتعمل فيهو داليا هو دفاع مستميت عن حبها ..
بس انت اديني فرصة في الموضوع ده انا احتمال انجح ..
قال ليها لالا .. انتي ماتحاولي معاي في داليا دي انا تاني ماعايزها .. لاني حسيت اني بشك فيها وما واثق فيها ابدا" ..
قالت ليهو طيب نحن البنات بتعرف بعض اكتر.. انا بحاول اتقرب منها .. واكون صاحبتها ..
اذا لقيتها انسانة خاينة فعلا" بنصحك تبعد منها ..
واذا لقيتها مخلصة ليك فعلا" صدقني ما تفوتها .. وده اعتبرو طلب مني انا وماتردني .. قال ليها ..
ممكن اسالك سؤال ..انتي شنو؟ انتي مخلوقة وين ؟
انتي جاية من وين ؟ قالت ليهو جاية من السودان ..
قال ليها انتي عارفة انو داليا بتكرهك.. وعايزة تدمرك وتطيرك من الشركة ..
برضك هسي بتحنسي فيني لصالحها .. انا ماقادر استوعب .. البنات في زمنا ده كل واحدة بتحفر للتانية وهن صاحبات .. والله الواحد بتحفر لاختها شقيقتها .. بس انتي ؟؟ سبحان الله .. ان شاء الله ربنا يحفظك ياثويبة ..
المهم يازول ده الكلام الحصل كلو .. ولاحظ .. ثويبة ماحكت ليهو عن البنات الاترسلت ليهم رسايل ولاسألته من القصة دي .. لانها فهمت الحصل شنو بالضبط ..
وماعايزة تكبر الهوة بين عامر وداليا ..
اها يازول لمن قربو يصلو للبيت .. قال ليها على كل حال ياثويبة انتي امنية حياتي .. وفي النهاية كل شي قسمة .. لو ربنا قاسم لي داليا حتكون لي .. ولو ربنا قاسمك لي كل الكلام القلتيهو ده يطلع ونسة في العربية ..
قالت ليهو فعلا كلامك صح.. نحن نقول قول وربنا يقول قول .. والخير اصلا فيما يختاره الله ..
اها نحن قربنا من البيت .. لازم توصلني البيت وتخش معاي .. وتلاقي امي ولا ابوي .. ويعرفو انك وصلتني .. انت عارف ناس الحلل والكلامات .. لو نزلتني ورجعت .. علامات الاستفهام بتكتير ..
ضحك ..وقال ليها.. كلامك صح وكما ممكن يألفو شمارات ..
المهم يازول نزل معاها .. ودخلو البيت ولقو الحاجة ..وفرحت جدا بجية عامر.. وقعد شوية شرب موية واستاذن طلع ..
امها قالت ليها يا ثويبة ؟ انت الولد ده عندك معاهو حاجة؟ .. قالت ليها ابدا يا امي.. ده مديري ووصلني يعني فيها شي؟
قالت ليها لالا انا ما معترضة.. كنت دايرة افرح ليك شوية ..
قالت ليها ربنا يفرحك بكل خير يا امي .. ابوي ما جا ؟ قالت ليها مواعيدو قربت ..
اها لمن البشرى وصل من خشم الباب يتبسم .. وقال ياناس البيت .. ماكن طيبين .. يوسف وينو
جبت ليهو معاي حاجة ..
قالت ليهو نايم يا ابوي .. قال ليها احسن تعالي انتي ياثويبة .. اقعدي هنا طبعا يابتي انا الليلة رسلت انا قبيل الصباح ضرب لي ميرغني اخوي وقال عمر حيجيكم الليلة ..
وامكن بعد شوية يصل عليك الله عايزة تهتمي بيهو شوية .. وماتحسسيهو بانو غريب .. واهتمي بي كل حاجاتو غسيل هدومو ووو ..
عشان امك انتي شايفاها تعبانة .. والمصيبة لسه مأثرة عليها.. لدرجة انها اكل زي الناس ماقادرة تاكل ..
قالت ليهو يا ابوي .. انا اصلا ح اعمل كدا لكن وصيتك لي تبقى لي بركة ..
ان شاء الله ماحنقصر فيهو.. في النهاية ده ود عمي وفي مقام اخوي ..
قال ليها اناعارفك وعارف عقلك.. بس طبعا قال الابو عندو هوس في راسو اسمو الوصاية والتوجيه .. عشان يحس بانو هو اب ..
قالت ليهو وكمان احسن اب في الدنيا .. ربنا يطول عمرك ..
المهم يازول القصة ماشة عادي .. قريب العصير كدا الباب دقة.. ووصل عمر ود ميرغني .. وسلم وواتغدى فضلة خيركم .. وقعد يتونس مع عمو البشرى في الغرفة الغربية ..
ويحكو في حكايات البلد .. وعمر يحكي بصوت عااالي وقع قع قع يضحك ..
وطبعا ثويبة حضرت ليهو الحمام.. والبشكير وكل اللوازم .. وشالت هدوم السفر على طول.. وختتهم مع الهدوم المفروض تغسلا بالليل ..مع لبس يوسف وعبايتها وحاجات بسيطة بسيطة كدا ..
بس من بعض الحكايات الكان بحكي فيهم عمر لي عمو البشرى قال ليهو ..
والله يا عمي انت زول قريب للقلب.. وانا داير احكي لك مشكلتي .. انا واسما بت خالي مترايدين من نحن في المدرسة الابتدائية ..
وابوي مابدورها كلو كلو .. عشان عندو مشكلة قديمة مع خالي .. يعني انا والبت ذنبنا شنو؟ ..
البت صلاية وصوامة .. وبت حلال ومطيعة وحالفة ماتتزوج غيري ..
وانا زاتي متعاهد معاها مابتزوج غيرها .. انا والله ياعمي املي الوحيد بقى فيك انت ..
وانا وكت ابوي قال لي تمشي لي عمك فرحت.. انك حتكون لي سند .. لانو ابوي بسمع كلامك انت الوحيد في الدنيا ..
الى اللقاء
.
