المخزن كان واقع في الطابق الارضي.. من الناحية الغربية.. في شكل صالون كبير .. بابو فاتح في الممرجوة العمارة .. وبابو الكبير فاتح في الناحية الجنوبية على الشارع .. وباب الشركة الرئيسي فاتح شرق .. زي ماعرفنا في الحلقات الفاتت ..يعني المبنى بتاع الشركة واقع ناصية ..
عامر دور العربية .. وثويبة راكبة معاهو بكل اريحية .. التقول العربية بالله حقة ابوها ..
وتاكلة كوع يدها فوق الباب والقزاز كان فاتح ..
عامر وقف العربية قدام باب المخزن.. وثويبة مانزلت في واحد برة من عمال التحميل.. واقف متكل على الحيطة .. بصلح في سير سفنجتو .. شكلها اتقطعت وبعافر فيها .. زي الزول البفسخ ليهو في قنقرة ..
ثويبة قالت ليهو لو سمحتا .. عامر تاوق كدا تزل راسو عاين ليهو.. قال ليهو ياحامد .. قرب جاي ..
حامد جا بي نعال واحدة والتانية شايلا في يدو .. وقال ليهو مرحب بيك يا مدير آمرني ..
ثويبة قالت ليهو عليك الله نادي لي دالية سريع ..
خش جوة كلمها وجار راجع واصل مع نعالو ..
حامد ده من العمال المرابطين في المخزن هم اساسا اتنين بس .. يعتلو البضاعة من جوة للعملا البجو يشترو بالجملة .. الشركة دي شركة ماساهلة.. بتستورد الادوات المكتبية من الصين وماليزيا .. بالحاويات الكبيرة . وغير المخزن ده عندها مخازن في اللاماب في شكل جملونات امكن تلاتة وهي اكتر شركة في السوق شغالة .. واعتقد انو ده بفضل الله ثم تعامل الود عامر ..
اها يازول داليا جات مارقة ..
لمن شافت ثويبة راكبة مع عامر .. النار انطلقت فيها .. وصرت وشها صره كعبة خلاص .. النظارة الخاتاها فوق راسها دي قربت تقع ..
جات قالت ليها .. نعم ياثويبة في شنو؟ ولاسلمت على عامر ..
قالت ليها عايزة اسألك من الكلام الكنت عايزة تحكيهو لي .. عن سوزان .. لازم تقوليهو لي قدام عامر عشان يعرفها على حقيقتها ..
قالت ليها .. بالله ؟؟ عليك الله امشو امشو .. ده ما موضوع تسأليني فيهو هسي ..
ثويبة قالت لي عامر خلاص ياعامر ارح نمشي نحن اتأخرنا وانا جيعانة شديد ..
وعامر يعاين بعيونو .. ويقرب يضحك من الارنب البريئة دي ..بتتكلم مع دالية بكل افتراء ..
بس هو شكلو فاهم ومتكيف .. وحاسي انها دي معركة بنات فوقو ..
دالية رجعت وتنفض في يديها ..
اها يازول لمن دورو .. قال ليها نمشي علي وين .. قالت ليهو شوف لينا حتة ناكل فيها حاجة انا فعلا جيعانة ..
قال ليها جدا مايسعدني ..
قالت ليهو يا عامر انا عايزه اسألك وياريت تكون صادق معاي في كل كلمة ..
دالية دي قصتها شنو معاك ..
الموضوع ده بهمني شديد ..
قال ليها طيب ياستي احكي لك ..
داليا دي ابوها حاج الامين الله يبارك في ايامو كان ابوي شغال معاهو في المكتبة حقتو في السوق ام درمان .. وكان الزول ده ليهو الفضل في دعم ابوي وهو الوقف ابوي على حيلو وابوي اتفصل بي شغلو براهو..
وشغله اتوسع وبقت عندو تلاتة مكتبات .. وبعد داك شغلو مشى وعمل الشركة دي وتعبب فيها تعب شديد ..
بس للاسف كان ابوي ماشي لي قدام وحاج الامين ماشي لي ورا .. ودخل في ديون ومشاكل
لغاية مابقى على الحديدة .. وكل الفترة دي ماكان بوضح لابوي اي مشكلة
في النهاية ابوي عرف الموضوع .. وفك ليهو رهن البيت حقو .. وسدد ليهو باقي الديون ..
وهو تعب وانشل .. وعندو ولد سافر السعودية وشغال كويس الحمد لله وعندو دالية دي ..
حاج الامين طلب من ابوي طلب انو يشغلها في الشركة ..
وابوي شغلها بامتيازات .. يعني بتصرف مرتب قدر تلاتة موظفين وده طبعا وفاء من ابوي لي حاج الامين ..
وفي الفترة الاولى انا حاولت ابني معاها علاقة .. لاني بالجد اتمنيت انها تكون شريكة حياتي ..
ويكون عمي الامين نسيبي وبي كدا بكسب رضا ابوي .. مع اني اعجبت بيها .. بس للاسف ياثويبة .. اكتشفت انها بتلعب على حبلين ..
انا عايزاني كزوج وعندها حبيب .. تاني غيري .. ماعندو معاها مستقبل زواج ..
وطبعا ياثويبة دي حكاية بقت تحصل كتير في الايام دي ..
تلقي البت عندها زول متفقة معاهو على الزواج ومعاهو بتكون مهذبة جدا .. وتظهر كل علامات العفة والاحترام .. لكن بكون عندها عشيق بتقضى معاهو الاوقات وتعيش معاهو اللحظات ..
فانا لمن اكتشفت القصة دي في داليا بقيت باعد منها وكمان صارحتها ..
قلت ليها انا مابقدر اتزوجك .. انتي من الليلة اختي وبس .. وهي ماقادرة تتقبل القصة دي ..
وغير كدا انا اكتشفت فيها طبائع كتيرة مابتنفع معاي ..
يعني زولة انانية عشان مصلحة نفسها ممكن تأذي اي انسان ..
اها عشان كدا انا حذرتك منها لاني شايفك انتي انسانة طيبة ومسكينة وممكن تتخدعي بسهولة ..
ثويبة قالت ليهو طيب .. هسي هي بي حالتها دي ممكن تضر الشركة ولا ما ممكن ..
قال ليها فعلا .انا والله كل مرة انا بتكلم مع الوالد على اني عايز اسرحها من الشغل .. وبحكي ليهو عمايلها ..بس ابوي بيرفض ويقول لي
الا داليا .. وطبعا ابوي راجل كبير . ومريض بالسكري والضغط وقاعد البيت .. وانا بخاف شديد من زعلو .. لانو لو زعل ممكن انا افقدو ..وهي كمان عارفة دي نقطة ضعفي .. لو يوم من الايام ساي .. شافتني اتكلمت لي مع موظفة تتصل علي ابوي وتفتني معاهو ..
.. والله انا بالجد ماقادر اعمل حاجة ..وبحاول ارضيها بكل السبل ..
ثويبة قالت ليهو خلاص فهمت .. عندي سؤال تاني ..
القروش الاتفقدت هل فعلا" شلتها انت ..؟؟؟
قال ليها الحقيقة ماشلتها انا ومتأكد من نزاهتك انتي ونزاهة قرشي .. وماخدني شك شديد
انو السرقة مدبرة من داليا عشان ترميك انتي في مشكلة معاي ..
لانها زي ماانتي عارفة مضايقة جدا من تعاملي معاك ..
قالت ليهو والله فعلا ياعامر انت في وضع لاتحسد عليهو ..لكن لازم تفكر ليك في حل للموضع ده ..
قال ليها حلي الوحيد اني اتزوج ..لاني لو اتزوجت تاني بتقنع مني ..
لانها هسي بتعمل كل المستحيل عشان ارجع ليها زي زمان ..
وانا بالجد لمن اتعرفت عليك عن قرب وعرفت شخصيتك حسيت انو ربنا رسلك لي منقذ..
طبعا هنا ياجماعة ثويبة اتفاجأت مفاجئة شديدة ..
لانها اصلا ماكانت بتعتقد انو مكن عامر يفاتحها بي كلام زي ..
بقت تقول ليهو .. لالا.. لكن .. انا .. انت .. أأ أأ ..
كدي انت فكر في حل عاجل .. الزواج ده بدري عليهو ..
قال ليها يا ثويبة .. كدي دقيقة ..
نزل في كان كدا جاب ليهو اتنين سندويتش وبارد ..
وقاليها هاك انسندي شوية .. وواصل في الكلام وهو ماشي بالعربية ..
قال ليها انا ياثويبة اتعرفت بي كل انواع البنات .. والحمد لله ربنا حافظني من الحرام ..
ولقيت الامن والطمانينة في البت العفيفة المربية والمهذبة ..
ياثويبة نحن رجال .. والشي البنفكر فيهو كلنا يكاد يكون واحد ..
كل ماكانت البت بعيدة من الادب والالتزام كل ما بعدت من تفكير الرجل كزوجة ..
ممكن يستمر معاها لاغراض تانية .. لكن مستحيل يرضاها تكون رمز الكرامة لي بيتو وام لاولاده .. عشان كدا البنات غالبيتهم بفشلو في الزواج .. والخطوبات تتفسخ كل يوم ..
اول علامات الفشل للبت قدام خطيبها انها تنصاع للانحراف ولو بسيط ..
عشان كدا انا الشي العاجبني فيك انك انسانة ماعندك اهتمام بجذب الرجال ..
واخلاقك وضميرك هو كل اهتمامك ..
وانا اتشرف انك تكوني ام اولادي ..
والزول ده اتكلم مع ثويبة دي جنس كلام اظن بتكلم معاها اكتر من ساعة ومشى امدرمان وجاء مرتين ويطلع بشارع الحرية
وهو بتكلم معاها ومندمج في الكلام عاين ليها كدا لقاها بتعاين ليهو وعيونها ملانة دموع ..
قال ليها مالك يا ثويبة ؟؟
قالت ليهو ياسبحان الله ياعامر .. المابعرفك بجهلك .. وحقيقة قالو الزول مايحكم على الناس قبل ما يتاكد..
انا كل يوم بتاكد انو تعاليم الدين الربانا عليها ابوي هي البتخلي الحياة تمشي صح ..
بس يا عامر انا عندي مشكلة بتخليني ارفض عرضك ورفض بشدة كمان .. قال ليها المشكلة هي شنو؟
ـــــــــ
الى اللقاء .
.
