مهما قاومت سيؤخز قلبك في كل مرّة.
.
.
.
في المطبخ منذ الصباح تقف على تجهيزات و ترتيبات رحلة المخيّم بحماس بصحبة نيفادا و الشموس تجلس هنالك على طرف الطاوله تشرب كوب زهورات كالعاده/ام رواد لا تتعبين نفسك كلها ثلاث ايام وراجعين
ام رواد وهي تغلف علبة بيدها/ماعليه، يمكن يعجبنا الجو و نقعد يومين زياده او اسبوع، من زماان ماطلعنا للبر و لا خيمنا
نيفادا وهي تساعدها بالتغليف/والله من جد ذبحتنا الغلقه هنا، بداخلي صحراويه صغيره تحن لأصلها
ضحكت ام رواد/الحمدلله تغلبت هالصحراويه عالعرق الثاني
نيفادا/شوفي انا أحب البر و الخيام بس عاد بالصيف لا والله انحااشي، يووووه قد طلعني قاسي مره نصيد ضبان بعزز القايله، آااه مستحيييل انساها ياااع
ضحكت الشموس و تذكرت أمراً لتسألها/اي صحيح شخباره، من جيت من الشرقيه و انتي عندنا، هو مسافر؟!
حركت كتفها الأيسر بتردد/مادري.. على حد علمي موجود
استغربت/وشو اللي ماتدرين عنه؟ متزاعلين أجل؟
تحدثت ام رواد /انتم يا بنات راكان مستحيل تريحون قلبي نزينها منا تنفلت منا!!! ، نيفو يمه فيه شيء و ما قلتي لي؟
اصطنعت الإبتسامه/لا يعني امززح.. وشو اللي زعل و ما زعل، هالفتره كان عندي اختبارات و الا نسيتي يام رواد!
تذكرت/ايييه صح.. اشووى علباالي بعد.. يلا عقبال تجي ليال و ننبسط كلنا مجتمعين. وهند معنا.
الشموس بإبتسامه/ليال البارح تقولي انهم بيكونون هنا خلال يومين ثلاثه بالكثير.. وليد قرر يرجع، جابته بنت النايفه
فرحت بهذا الخبر/كنت شاايله هم ليال اكثر وحده فيكم، البنت تغيرت لدرجة خوفتني عليها... بس يا ترى وش غير الوضع هناك
اتسعت إبتسامة نيفادا/ماعندي شك بليال.. اختي تعرف تحل مشاكلها بنفسها و بصمت
رفعت الشموس حاجبها بإبتسامة/إيه تعلمي منها.. لا تهرّبين
ابتسمت بخفوت، تعرف ان الشموس لا يفوتها شيء، و انها لم تصدق عذر الإختبارات الذي سردته قبل قليل..،
أم رواد/الشموس رحتي موعدك؟
ببرود/أنا قررت ما أروح مواعيد، يعني الحمدلله مهتمه بنفسي و انتظر الولاده
حاولت التذكر/بأي شهر انتي؟
ارتشفت من كوبها وهي تمثل الهدوء رغم الريح التي تعصف بصدرها حينما يكون الحديث عن حملها/المفروض أولد قبل شهد..
