شَمـسُ وَطني

البارت الثامن

بقينا على طول الريوك يسولفون ويتشاقون واني بس اضحك سوالفهم كلش حلوه وبساطتهم هم يعني حتى الشيخ عثمان رغم برا ويا العالم هيبه وثكيل وشخصيه بس داخل بيته وويا عائلته يتشاقه ويضحك هناك ويجي ببالي همام ويضيق صدري
خلصنا ريوك وكامو الزلم طلعو والحجيه طبت جوا وبقينا بس النسوان كمت اعزل وياهم عيب بس كاعده واكل صح اكو كومه بنات بس هم عيب ما اساعدهم بشي
سعديه: يمه عليج الله تعوفين شداتسوين
شمس: يااااا خاله شكو بيها خلي اساعدكم
اسراء: خليها ام زيد خليها خلي شويا تساعدنا
سعديه: ام ايمن شهل حجي البيت بي كومه نسوان مو اجت على شمس
شمس: ميخالف خاله ميخالف ماكو مشكله اصلا اني ميعجبني ابقى كاعده

حسيت هاي اسراء مرت الاخ مجيد لا هيا ولا بناتها حبوني مدري شون يباوعون عليه يبقون خازريني من فوك لي جوا..
خلصت ومادري وين اروح وحتى زهراء ملكيتها بالمطبخ شفت كرسي يم باب المطبخ رحت كعدت عليه وباوعت على الحوش من الباب جان مفتوح جانت الشمس داتضرب بعيوني فا داصفن بالكاع حسبة تجيبني وحسبه تاخذني وين جنا ووين صرنا جنت ببيت عمي بس اريد اطلع وهسه لمن اجيت اهنا هم بس اريد اطلع..... اني وجايه اصفن كطع صفنتي صوت ابو وطن ديكول
ابو وطن: يولو مو وياااج
شمس: اييه شبييك
ابو وطن: مو صار ساعه نحجي وياج
شمس: اييه مجنت داسمعك شكو
ابو وطن: طبي جوا راح تجينا زلم هسه
شمس: شو اربعه وعشرين ساعه زلم طابه طالعه عتكم
ابو وطن: مو بيت شيخ شتريدين لعد
شمس: ادري بيت شيخ بس مو هيج طابه طالعه من عتكم الزلم
ابو وطن: يلا ام عيون طبي جوا هسه گبل ميجون
شمس: رفعت حاجبي وكتله... ماشي بس تره كلنا عدنا عيون مو بس اني
بس حجيت هيج كام يضحك بصوت عالي راسا استحيت وطبيت بسرعه

سعديه: والله بيج بخت
شمس: ليش
سعديه: لو وحده بدون حجاب هيج مثلج وكاعده تعاند وتجاوب ويا الشيخ ابو وطن والله جان جنزها بكاعها بس انتي الحمدلله كعد يضحك وياج ولاول مره
شمس: خاله انتو مدري ليش تخافون منا يعني زهراء ولاتباوع عليه لان تخاف منا وهسه انتي همات مستغربه لان تراددت وياه
سعديه: يمه ابو وطن عصبي كلش وانتي مشايفته من يتعصب ويكعد يصيح واحنا نخاف منا يا يمه ونحترمه لان شيخ نسويله الف حساب مانعانده ولا نعصبه
شمس: اهاا ايي

رحت من يمها وبقيت افكر مدري ليش هيج يخافون منا بس لا صدك هو ضخم اهواي وحدة صوته بس بالكفايه
رحت طبيت للاستقبال جانو تقريبا النسوان كلهم كاعدين ويا الحجيه رحت كعدت على طارف القنفه جان اكو طفل يطلع عمره سنه ونص هيج دايزحف بالكاع وصل يمي ورفع نفسه عليه شكله كلش حلو رفعته وخليته بحضني بقيت اللعب وياه واناغيه وهوا مكييف ابد ماستغرب بالعكس بقى يلعب وياي وادغدغه وهوا يضحك بصوت عالي وعلى ضحكه الكل جان ديضحك ويانا وشويا وما الكي الا ابو وطن فوك راسي وصافن بينا ومبتسم بسرعه عدلت كعدتي هو هم بسرعه كطع صفنته ودار وجها على الحجيه وكال
ابو وطن: يمه ابويه يكول لاتحسبون حسابنا اليوم بالغدا لان راح نطلع معزومين عند الشيخ ابو حسين
ام عبد: حاضر يمه وليدي