شَمـسُ وَطني

البارت الرابع والثلاثون

كعدو يمكيجون زهراء جانت هم خطيه متوتره اهواي واني يمها شويا واجت طبت اسماء يبووو ركضت عليه وتحاضنا شفت ابنها علي اذكرت يوم الي جابه ايهاب من جنت ويا احسان ببغداد
بقينا يم ام الصالون ندك ونغني صار دوري مكيجتني ام الصالون وسوولي تسريحه بسيطه لفلفت شعري سويته مثل كيرلي وشلت شويه من كدام صار مثل بوف ونزلت خصلتين طلع كلش حلو
لبست فستاني جان طويل من فوك حصر ومن يم الخصر يصير تول وينزل لي جوا الركبه بشويه من كدام قصير ومن خلف طويل بدون ردان يعني مصلخ بس بي التعلاكه مالفستان تنزل جوا الجتف لونه احمر دم الغزال متقصدا اختاريته مصلخ على قسط ايهاب هيج بس جنت رايده اقهره ايدي وركبتي كلها طالعين ولبست حذاء كعب اسود وخليت حمرا حمرا بس باقي مكياجي اسود اختاريته بس مطوخت اهواي اخاف همام ولا خالي يرزلوني هو الفستان مادري شون حعبرها عليهم
خلصت اباوع على روحي بالمرايا يمممه شنو هاااي ولكم والله اخبل البنات الي جانو كاعدين بالصالون كلهم فتحو حلكهم عليه
الله اكبر محروسه ان شاء الله بس لا يصيرلي شي عيونهم عليه عشره
لبسنا زهراء الفستان جنا اني وامها واسماء كلش جان فستانها حلو وبسيط ومستور ومكياجها هم ممطوخه اهواي لان اصلا زهراء حلوه تفاصيل وجها ناعمه
خلصنا كلنا جان ساعه خمسه وشويه
سمعنه صوت الهورنات عرفنه اجت الزفه طلعنا وطلعنا زهراء جنا اني وامها بس متولييها اول ما طلعت وكعت عيني بعين ايهاب جان هو جاي بما انو عم العروسه وشيخ لازم يجي يعني لابس دشداشه والعكال مالته والحيه العدله والغمااازه يربي الغمازاات تمووت جان من صدك طالع يمووت بقى صافن عليه بسرعه وحرت عيوني من عليه ماريد حتى اشوفه
اجا همام فدووه لله جان لابس القاط ومزين صدك طالع عريس صاك وكف كدام زهراء وبقى يباوع عليها ويبستم وهاي ذايبه من الخجل كلش جانو حلوين كعدت اخذلهم صور ومن صدك لايكين لبعض
كامو يهوسون ويصفكون كلهم جانو شباب ومن بينهم عبد القادر هم جاي والنسوان تهلهل
صعدناهم خلف بالسياره اني ركبت وياهم كدام بسيارة الزفه ممصدكه روحي اخت العريس عاد
ولحسن حظي ايهاب هو الي حيسوق السيارة مالزفه خرررب انه
صعد باوع عليه استغرب لبس مناظره الشمسيه وساق

همام: اكول ابو وطن معندك اغاني بجهازك مبايلي اني بقى يم خالي مدري يم عبد بس المهم ضيعته
ابو وطن: هاك الزم شغل اغنيه
انطاه مبايله وكعد همام يدور اغنيه على غفله طلعت اغنيه بس لو تدري بيه شكد احبك ثنينا اني وايهاب باوعنا على بعض
شمس: همام ديرها لهاي الاغنيه
ابو وطن: لا بقيها حيل حلوه
همام: يمعوده هاي مالعلي العيساوي تخبل غير
خلاها للاغنيه وكل كلمة منها ترجعني لكبل سنتين من جنا سوا انداريت عالجامه وبقيت ادندن وياها

بس لو تدري بيه شكد احبك..... جبت گلبين حتى اكدر الگلـبك.... لان حبـك جبـير يعذب گلوب.....وگلب واحد عندي وخايف يذوب.... واذا ذاب الگلب.... ولك وين اضمك

بزور حبست دموعي حتى لاتنزل ياربي كل كلمة منها تعصر بروحي جنا نسمعها سوا وجان دائما يشغلي اياها
اباوع على الشارع سدو اصدقاء همام مادري شكد جان عددهم بس كومه والشارع ترسو ويهوسون ويصفكون حتى يعرفون يهلهلون احسن مني كلش حلوه جانت الاجواء
وصلنا القاعه نزلت واجت وياي خاله سعديه ننزل زهراء اباوع ساره ومنال هم جايين خطيه مبين عليهم فرحانين حيل وخالي متولي القاعه والمعازيم 
نزل الكل وكمنا نهوس نزفهم للقاعه مخبوصين ونهوس دانزفهم وهوسه ما احس الا واحد حضني من حصري من خلف يممه جمدت ويهلهل بأذني كمت ارجف عيوني غووشت واجا بخشمي عطر رجالي انداريت وشووف؟؟
ياربييييييي هشاااام؟؟ لاااا ممصدددكه كمت اعيييط حضنته حييييل يمكن احلى لحظه بحياتي هيا هاي حسيت روحي بحلم لااااا مستحيييل معقووله بعد كل هالغياااب اشوفه كدامي واكف
لزمت وجها واباوع عليه اريد اتمعن بعد بتفاصيل وجها جان كبران حيل وصاير نسخه من بابا هنا وبعد مكدرت نزلو دموعي غصب عني وهوا مبتسم بوجهي ويمسح بدموعي سحبته ورحت وديته على همام خطيه همام استغرب طفه شحنه بعدين واحد وكع بحضن الثاني صار من صدك مقطع يبجي صارلنا شكد مشايفييه
كمنا نهوس اني وهشام وصلو همام وزهراء للكوشه وكعدو الشباب يركصون ويهوسون
رحت كعدت واصفك عيب اكوم اركص كلها جانت شباب واصدقاء همام اجا هشام يمي بقيت احضنه وابوسه كلشويا ممصدكه روحي شفته واخيرا الحقير وهو ييكرص بيه ويكلي سمنانه وكلما تطلع اغنيه يسحبني يركصني وارجع اكعد
بقيت كاعده اباوع عليهم شون يركصون احلى شي خالي وعبد القادر وهشام ركصهم يضحك من يركصون سوا
بدون وعاتي راحت عيني على مكان جان ايهاب كاعد ويما فاطمه يربيييييي هسه شكو حاشكه روحها بالنص بين الزلم ولا فوكاتها امها يمها يمكن لو ما زواج اخويه جان سحلتها سحل من صماخها ومسحت بيها القاعه كلها بس حرامات ماريد اخرب زواج اخويه علمود شكولها الزفره وكلشويا تروح عيني عليهم كاعده يما ومدري شيحجون وتتمضحك هيا جنها عودة نشافه كلش انقهررت احس روحي داتنطبخ عالناار من اشوفهم سوا