شَمـسُ وَطني

البارت الثامن والثلاثون

احنا ودانمشي على غفلا الكل وكف على حيله وكام يصيح الله اكبر تعدلت اريد اشوف شكو
وششوف كدامي؟؟
اللللله اكببر سياره مكلوبه ومحتركه
الكروبات كلها وكفت والشباب نزلت نشوف الحادث
كلبي نغصني كلت خلي انزل اني هم
دانزل وجرتني سمر
سمر: ويين
شمس: عوفيني اريد اشوف
سمر: شتشوفيين
شمس: هسه دوخرري حبابه

نزلت اريد اشوف السياره شي بداخلي يدفعني اسوي هيج رحت تقدمت باوعت وياريتني ماتقدمت
عيوني غووشت نفس سيارة ايهاب اعرفها جانت مونيكا من هاي العاليه لونها اسود
نفس هاي السياره العالم كلهم ملتمين حوليها اريد بس اسال احد الي بداخلها وين صارو لان مجان اكو احد بداخلها
شمس: الساايق الي جان بيها ويينه وجان وياه شخص لو لا
جاوبني رجال شويه جبير
الرجال: اي يكولون جان بيها شابين
شمس: شووون وششصاار بيهم
الرجال: السايق جان منتهي من طلعنا بس الولد الي يما بي روح خفيفه نقلناهم للمستشفى
شمس: شكاااعد تحجييي انتتت ياهو منهم السااايق ممكن توصفلي شكله
الرجال: والله يابنتي وجها كله جان رايح شون اكدر اوصفلج شكله داكلج منتهي
وكفت بيه الدنيا احس اكو غيمه سوده فوك راسي لااا مستحييل ايهااب ماات معقوله لااااااااا اريد استوعب الي ديصيير ولكم والله نفس سيااارته بس ممبين الرقم ولا مبين شي حتى اعرف اذا صح مالته لو لا بس تشبها هواي وهم بيها ثنين جانو هو واحمد اخو سمر
اييي احمد كال جان ديسوق سرييع ايي جان متعصب مني
ولج شمس اللله لاينطيييج العاافيه
اتصل عليه ميرد مقفل الموضوع زيد توتري بسرعه صعدت على سمر
شمس: سمررر اتصلي بأحمد بسررعه
سمر: ليش شكو
شمس: بس اتصلي اروحلج فدوه بسرعه
سمر: تمام تمام
اتصلت عليه واني على اعصابي نفس الرنه طلعت طووط طوط طووط يعني مقفل
هنا حسيت انو روحي خلااص ذابت بعد مالي حتى قدره اوكف بسرعه وكعت لزموني العالم
سمر: شمممس شبيييج
شمس: الله لاينطيني العاافيه ليش خليته يروح متعصب ليييييش ادري بيي مخبلللل بالسياااقه لييييش خليته يرووووح ضاايج منييي سمرررر اني وحده حقييييره

احجي واعيط بكل هستيريه مجنت مستوعه الي ديصير الي ابالي ايهاب راح من ايدي خلاص لا وراح ضاي ومقهور مني عسااا بي ولا بيه يااارب ارجعه اليه يامن تحيي وتمييت رجعلي اياااه ياارب والله شمايريد اسويله بس يرجعلي بخير وسلامه والله اعيشله خدامه بس يرجعلي يااارب انت وحدك تعلم اني شكد احبه
يااارب رجعلي ايهااب ابن
عزاااا نسيت اسم ابووو يارب رجعلي ايهاااب يارب
عقلي فتر روحي ماعت بالكاع من كد البجي والعياط محسيت على روحي الا واغمى عليه
حسيتهم ديضربون وجهي ضربات خفيفه ونكعو وجهي بالمي فزيت كلهم ملتمين فوك راسي بس شنو راسي احسه طبلل عيوني مداكدر افتحهم
تعدلت الكل بقى يسال عليه بس مبيه حيل ابد اجاوب احد سمر جانت تجاوب دكللهم ارتفع ضغطها من الحراره وهيا احسها نفسي متوتره اخوها هم جان ويا ايهاب بس ايهاااب مااات حسب مديكولون
بقيت كاعده بالكاع واصفن باوعت السياره طافييها جانت داتلهب والعالم شوية قلت باوعت لكيت سيارة اسعاف جايه بسررعه نطزت كمت وكفت بوجها اريد اوكفها
سمر: لج خبللللله تعااااي شداتسووووويين
وكفت السياره الاسعاف نزل واحد منها
شمس: انتو الي نقلتو المريضين الي سوو الحادث بهاي السياره
الولد: اي اختي
شمس: على يا مستشفى نقلتوهم
الولد: اقرب شي وديناهم لبغداد ماكو هنا مستشفيات قريبه
شمس: فدوه لكلبك وديني على المستشفى الي نقلتوهم بيها
الولد: ليش واحد من المريضين يخصوج
شمس: اييي واحد منهم خطيبي والاخ اخو صديقتي
الولد: تمام تمام تفضلي ويانه
بسرعه رحت صعدت بالباص سحبت جنطتي ونزلت اريد اروح وياهم سحبتني من ايدي بنين
بنين: ولج ويين
شمس: حبابه وخرري اريد اشووف ايهاااب
بنين: ولج المدييير محيقبل تروحيين اجيتي ويانه لازم ترجعين ويانه
شمس: يابه مطيرين انتي والمدير بس عوفيني خليني اروح حتى لو يفصلني
جريت ايدي منها وبسرعه ركض رحت صعدت بالاسعاف من خلف
دورت على مبايلي بالجنطه صخااااااام مموجوود جان يم سمر كاعده جانت تاخذ بي صوور خرررب اننه
كاعده على اعصابي خلف بالاسعاف بس وياي دكتور واحد كاعد
بقيت روحي معصوووره اذكرت كلشي عشته ويا ايهاب من زين سبحان الله لمن يصادف هيج موقف او تحس انك فقدت انسان متتذكر الا الشغلات الي حلوه بينكم تنسى الزعل تنسى كلشي ماتتذكر الا لحظات الفرح والسعاده الي جانت بيناتكم
اذكر حجيه اذكر دفو كلماته... غيرته جنونه من يعصب كلشي حلو عشته ويا اذكرته
بقيت اردد ياربي رجعلي اياه... يارب يسر ولا تعسر... يارب ان مسني الضر وانت ارحم الراحمين
مادري شكد طولنا بالطريق كاعده واعصر بروحي اريد بس اوصل
واخيرا بعد ماتلفت روحي وصلنا عالمستشفى الي نقلوهم بيها جانت ببغداد يعني واخيرا طبيت بغداد الله وكيل ونسة اربيل مو من خشمي طلعت لا من بين عيوني عالبجي واللطم الي سويته
بسرعه نزلت اركض هنا واركض هنا شفت دكتوره سحبتها
شمس: عفيه دكتوره اكو ثنين سوو حادث على طريق بغداد وينهم نقلوهم كبل ساعه هيج يمكن ماذكر شكد
الدكتوره: والله مادري ياحبي اني هسه توني اجيت
عفتها واركض هيج واركض هيج الله لايراوي احد الي شفته ولا يحس احد بلي كاعده احس بي
حالتي جانت لاتسر عدو ولا صديق
مادري شون جنت اركض لو اطير من هنا ومن هنا حتى عيوني مابعد اشوف بيهم من كد التوتر وخلص انتهيت كلت ايهاب راح
شفت دكتور هم سحبته
شمس: فدوه لكلبك دكتور اكو ثنين سوو حادث على طريق بغداد نقلوهم هنا كبل ساعه هيج مادري وينهم الله يخليك دكتور بس طمني عليهم
الدكتور: هذولا الولدين
شمس: اي اي ثنين
الدكتور: واحد منهم توفه الي جان سايق والاخ حالته خطره عالاجهزه يادوب دنكدر نوصله الاوكسجين وممنوع الزيارات منكدر نطبب احد عليهم
سودت الدنيا بعيني اذا جان ايهاب المتوفي فا هاي نهايتي واذا لا معناها هو هم بحالته خطره وهم يا يعيش يا لا هنا من صدك انكطع عني النفس اجرره بالكوه عيوني خلص بعد اريد ابجي ماكدر
الدكتور عافني وراح اريد اسند روحي انتجيت عالحايط هههههههههه لا لا ايهاب ميعوفني اي اكيد
بس المشكله انو سمر كالت هو الي جان ديسوق وسريع اي وهسه الدكتور كال السايق الي توفه هههههه معقوله لااا لااا ايهاب ميعوفني اي يجوز بعدين بنص الطريق نزل احمد يسوق اي ايهاب مستحيل ما مات
جنت كاعده بالكاع واحجي واضحك ويا روحي خلصت دموعي بعد ماتنزل احس روحي تخبلت بعد مابيها مجال
يمكن ساعه كامله اني على نفس وضعيتي على غفلا صحيت على نفسي بسرعه كمت وطلعت ركض من المستشفى وكفت تكسي ارريد اذكر المركز الي يداوم بي ايهااب عصررت دماغي ياربببب اريد اذكره اروح عليه حتى معندي مبايل اسال سمر او اخابر احد
اخر شي كتله للسايق شيخ ابو وطن ابن شيخ عثمان بنطقتهم بفلان مكان معروفين وهيج كعدت احجيله اااخر شي عرفهم وهو عرف المركز ووصلني عليه بس جان بعيد كلش لان المستشفى الي جنت بيها جانت ببداية بغداد