شَمـسُ وَطني

البارت الثاني والثلاثين

طلعت من عدنا واني عقلي مشوش يالله هسه من وين الكيله عروس
يلااا المهم حصلت على الموافقه وعود الله كريم اهم شي قبل
حضرت الغدا واجا خالي اللتمينا اكلنا وخلصنا رحت غسلت المواعين وخلصت تعزيل المطبخ تصطحت عالقنفه جنت داتفرج عالتلفزيون ماحسيت الا غفيت بمكاني
حلمت حلم غريب شويا وجانت زهراء وياي يعني اغلب الحلم جان على زهراء كعدت وبقت ببالي زهراء شجابها هسه ببالي وصارلنا يمكن شهرين محاجيين ويا بعض
مادري شون طخت ببالي اخطبها لهمام
بس لالا ماريد اجتمع ويا ايهاب بس والله زهراء حبابه ويستاهلها همام ويلوكون لبعض
طلع من الغرفه وانتبه عليه كاعده واصفن بالكاع
همام: هاا شبيج
شمس: هماام
همام: هاا
شمس: لكيتلك عروس
همام: مني؟
شمس: زهراء بنت اخو عبد القادر
همام: هاا لا شمس لا
شمس: لييش لا والله خوش بنيه
همام: مادري
شمس: اكوول لايكون عندك منا منا ومتريد تحجي شبيها ليش زهراء والله ورده مالله والف واحد يتمناها
همام: مو هيج بس
شمس: بس شنو
همام: تريدين الصراحه
شمس: اي احجي شكو
همام: مادري بس اخاف تصير قسمه وانوب نصير كرايب ويا ابو وطن واني مصدكت نسيتيه
شمس: باوع همام اني منسيته وبحياتي ما انساه ولتوكف نفسك علمودي زهراء جانت اقرب شخص اليه وبعدين مو عبد القادر اقرب شخص الك ودائما اشوفه عادي نفس الشي هم اذكر ابو وطن على الاقل هذا اخوه
همام: مادري والله ياشمس

طلع خالي احنا ودانحجي
ابراهيم: هاا سالمين شبيكم
شمس: خالو ساعدني حتى نخطب لهمام
ابراهيم: صددك اني حاضر بس منيا سعيدة الحظ
شمس: بنت اخو صديقة عبد القادر
ابراهيم: كرايب الشيخ عثمان؟
شمس: ايي حفيدته
ابراهيم: يعني هم حتناسبينا ويا هذول الجماعه اني عبد القادر اضوج منا لان ويا همام
شمس: هسسسه شبيييكم تره نااس شيوووخ ومعرووفين وانسوو الماضيي عاااد
ابراهيم: يعني تقنعيني انتي ناسيته؟
شمس: ولو مرره اسمعوني وريحوني بدون متناقشون وبعدين البنيه بحياتي مشايفها ولازاشوف مثل ادبها واخلاقها وحرامات تروح من عدنا وفوك كل هذا معدها ولاد عم كبار حتى يحطون عينهم عليها
ابراهيم: وانت همام شرائيك
همام: والله خالو مادري بس حجي شمس فر دماغي ادري بيهم خوش ناس ويكفي اهل عبد القادر
ابراهيم: بيها الخير لعد حضرو روحكم باجر نروحلهم مادام باجر بس معندي شغل وانت انطي خبر لعبد كله جايين يمكم
همام: تمام
شمس: يبووووووي واخيرااا كلللللللويش

رحت حضرت العشه وكلش فرحانه لان صدك اتمنى زهراء تصير مرت همام
او يمكن فرحتي الاكبر لان حشوف ايهاب مشتاقتله
صبيت العشه وتعشينا وخلصنا ورحت عزلت ونظفت ورحت لغرفتي من فرحتي ما اجاني نوم طولت يلا نمت نصبت المنبه بالثمانيه
كعدت سبحت وشسورت شعري ونزلت حسست خالو وهمام  كعدو يحضرون روحهم واني هم لبست فستان حصر على الجسم لونه اسود قصير لي جوا الركبه بشويه ولبست جواه كالون شفاف اسود ولبست جاكيت كابوي ولفيت حجابي توربان والحجاب هم اسود وطلعتلي بوتين احمر وشلت جنطه حمرا هم وحطيت مكياج خفيف يعني حمرا وايلاينر وماسكارا بس
باوعت على روحي بالمرايا طلعت اخبلل حاته
نزلت هما هم مخلصين نزلنا وصعدنا بالسياره ومشينا وصلنا نص الطريق كلللشي نعادلي لمن اجينا هنا اول مره خليت الهدفون بذاني وكعدت اسمع اغاني واباوع عالطريق واذكر ايامي وياهم
وصلنا گلبي تسارعت نبضاته اباوع عالشارع وباوع عالفرع مالتهم ياربيييييي شون ايااام جانت
مشاعري امتزجت خووف على حب على كلشي
نزلنا وجان الباب مفتوح دائما بابهم مفتوح عالنص
دكيناه شويا واجا زيد باوع عليه وفتح عيونه
زيد: شممس؟؟
شمس: شوونك زيوودي
زيد: ياهلا يا هلاا تفضلو تفضلو
طبينا اجا بوجهي الاخ اسعد بقى يتهلا بينا طبو اخواني عالديوان واني يم النسوان اول مطبيت البيت كله مر كدامي شريط فلم ونعااد عليه اويليييييي
بوست النسوان الحجيه جانت داتصلي اجت تركض عليه وحضنتني وتبوس بيه
ام عبد: يمممه ردت بيه الرووح يولو اوووف شكد مشتاقتلج يمه البيت مطيب من دونج
شمس: يروحي فدوه اروحلكم شكد مشتاقتلكم
شفت زهراء توها داتنزل الدرج شافتني بقت ضاربه دالغه واجت تركضض عليه ووكعت بحضني وبقينا متحاضنين
طببوني عالاستقبال وبقو يسولفون وياي واني هم سولفت وياهم بعدهم نفسهم نفس بساطتهم نفس حجيهم نفس روحهم الطيبه ماتغيرو
بقيت حايصه روحي على ايهاب لحد هسه مشفته وگلبي وعيوني بقو يدورون عليه هسه وكول شويا ويطلع او شويا وينزل من الدرج واشوفه بس كلت لاا رايح لدوامه خرررب انه يسويها الحظ والبخت