انا العراق

بارت ٣

مساء الخير حبايبي
اتمنى لكم قراءة ممتعة لا تنسون التصويت وترك رأيكم بلرواية بلتعليقات

أن شهداء العراق يزدادون يوماً بعد يوم
كأن الله يريد أن يجعلهم جند في السماء 💔..

حسيت نفسي يبست مكاني يمه اخوي سودة عليه رحت اركض لاخوي شلته حرارته مرتفعه صحت ع نوران تجيبلي ماي ووصله نظيفة وكلت لرزان لبسي حجابج وروحي دوري ع امي جيبيها بسرعة والنوب صيحي لعمي روحيله بمكان شغله تندلي مو؟ هزت براسها وكالت _راح اشوف امي واخذ مرة عمي واروح لعمي
جانت رزان تندل شوي لان تطلع ويه امي ساعات تبيع ... صرت اسوي لاخوي كمادات واحاول اصحي ماكو ... باوعت لنوران وكلتلها
_كومي حضري اغراضه اكيد ناخذه لمستشفى
راحت حضرتهم بسرعة واجت كالت وهي تبجي
_جمان اخوي ما راح يصير بي شيء مو ؟
_اي لتخافين مابي شيء ... جنت احجي وانه ارجف وميته خوف ع اخوي الي ما راضي يكعد وره شوي اجت امي تركض ولون وجهه مخطوف صاحت بيه _شبي ووين جنتي عنه ..
سكتت حقها ادري بيهه ميته خوف عليه ... حاولت امي تصحي ماكو حرنه شنو نسويله وبعد شوي دخلو عمي ورزان ومرة عمي ..
اخذهم عمي لمستشفى لان امي ماتندل وين صايرة ضليت اغلي وافتر وارجع يم الباب منتظرة احد منهم يرجع ويطمني ماكو.. لا عندي موبايل اتصل ولا شيء ... مرت ساعات واخواتي مثلي محتارات لا احنه الي نندل جان رحنه وراهم ولا احنه الي مطمنين عنهم ... صارت الساعة ب ٨ بليل واجه ابوي جنه ع نفس حالتنه كاعدين ننتظر يم الباب بس دخل كمنه بوجهه ... اباوعله وجهه جان مظلم سالته
_هاا بابا جود شلونه وانه ادعي بكلبي يكول كلمة يطمني ... باوعلي والدموع تلالي بعيونه وكال _ بابا اخوج مشمور حسب كلام الدكتور هو انشمر نتيجة ضربة ع راسه
لطمت ع صدري وكتله _شلون يمه صخام بعيني يعني بابا هو ما مضروب ع راسه شلون انشمر
_ماادري بابا ماكو احد مطيحه شيء او هو طايح ع راسه؟
_ماعرف والله بابا هو طول الوقت احنه وحده منه يمه ما طاح من انه يمه .. زين هسه هو شلونه وشنو كال الدكتور
_هسه هو كعد الحمدلله وحرارته انخفضت شوي بس الدكتور كال يبقى بلمستشفى خاف يرجع ينشمر اسم الله لان اخذله اشعة وطلع عنده فطر بجمجمة
_اسم الله عليه ... ابوي فات شوي بدل وطلع وكال قفلن الباب وكعدن بلغرفة وسدن بابها شوي وتجي مرة عمجن وعمجن و وصانه ع ماجد وراح...
سويت مثل ما كال ابوي كعدنه بلغرفة وجان دكول نوران
_بنات مساع جود جان يلعب ويه ماجد وطاح وانضرب راسه بلكاع بس الضربة مو كلش قوية معقولة هاي السبب
_رزان: سودة عليه يمكن.. هسه احنه بيهه عليهه
من سمعت كلام اخواتي لمت بنفسي انه السبب امي امنته يمي وراحت جنت اندعي ربي يكومه بسلامة...
مرت الايام وجود طلع من المستشفى وبين فترة وفترة يرجع ينشمر ... جنت يوم عن يوم اتاذه اكثر من شفت حالته هيج جنت دوم الوم بنفسي امي جانت ملتهية تركض بي لدكاترة و المستشفيات تاخذله اشعات ومفراس هم دخلته وعلاجات هواي وهل شيء كلفنه هواي ... وبيوم جنه كاعدين ع العشه ابوي كال _ شوفو انه راح ارجع لعراق واشتغل وضع ابني صعب ومستحيل اعوفه بلا علاج وجاي تشوفون هاي صارلنه بس اسبوعين نعالج بي وصرفنه كلشي عدنه لازم ارجع اشتغل هناك ...

يتبع

حبايب اعرف البارت قصير بس صار عندي ضرف طارئ ولعلم انه البارت كاتبته اطول من هيج بدفتر وكاتبه تقريبا ل ٨ بارتات ليكدام بس كلش مشغولة وهذا الكدرت انقله ع الواتباد منه وما حبيت اعوفكم بدون بارت ... ان شاء الله اذ صار عندي مجال بعدين بليل حتلو ب ١٢ انزللكم الباقي اذ لحكت ان شاء الله واذ ما لحكت عذروني ..