انا العراق

بارت ٥

مساء الخير حبايب
يارب الصبر و السلوان لاهالي شهدائنا

حبايب اذ صار البارت قصير عذروني لأن كلش تعبانه وكتبت بلواتباد الي اكدر عليه  ... اتمنى الكم قراءة ممتعة ولا تنسون التصويت وترك رأيكم بلتعليقات ... لانو الرواية مجاي تاخذ حقهه والتفاعل كلش قليل ...

جلست ع طرقات المأسي ...
اعاتب غيوم أوجاعي متى تزول ؟! ...
ويتوقف مطرها عن سقي جذور الحزن في قلبي ..
لتشرق شمس الأمل من جديد  ...
و تحطم ظلام الليل الذي غطى أعماقي ...

#بقلمي

_ابو ماجد : شوفي بنتي خليج قوية و صابرة ... عموو الموت حق وكلحنه ع هذا الطريق ابوج طلع مقتول...
ما حسيت ع نفسي صرت ألطم و ابجي واصارخ لا يابه وين عفتني ورحت لا يابه ما كافي احنه بغربة وحضنك جان النه وطن وهسه انت رحت شكالت روحك لمن طلعت ااخ يابه كلشي جنت متوقعه بس مال نمت جوه التراب هاي ما حسبتهه صرت اضرب بنفسي واصارخ وعمو يحاول يهديني

_ عمو جمان هدي نفسج ما يصير تضعفين انتي لازم تكونين قوية علمود امج وخواتج واخوج الصغير ... واعرف مكان الاب محد ياخذه بس انه ان شاء الله ابوكم وانتو امانه بركبتي ليوم الدين ...

_عمو شكل الامي هسه وانه كل مرة اكلها ابوي راح يرجع عمو بابا راح وعافنه لدنيا الماترحم جنت متحملة الغربة والمعاناة والم فراقي اله وكلشي في سبيل انو يجي يوم ويطب من هذا الباب وتالي اكتشف ابوي نايم جوه التراب وانه دوم جنت اعاتبه بغيابه الطول علينه

_جمان بنتي انتي جبيرة وتعرفين هذا امر الله وصار وانه حالي من حالج هم انكسر ظهري بأخوي المالي غيره ... هسه انه وانتي لازم نوكف ويه امج واخواتج لان راح يحتاجون سند
_ بس اريد افهم يا عمو ليش قتلو ليش حرمونه منه ويتمونه ليش ليش شذنبنه؟
شفت عمي سكت كمت وكفت كدامه وكتله

_عموو جدوو متأكد بابا مات؟ يمكن غلطان عموو عموو يعني هوو راح وبعد ما يرجع عموو جاوبني
شبكني وضل يبجي وكال
_عموو هذا قضاء الله وقدره وأنتي مؤمنة

(اعتذر حبايب ما اكدر اذكر سبب قتله تحفضا لهواي امور  وما احب ادخل بأمور بيهه نقاشات ... بس هواي اساليب قتل انتشرت بهاي السنين وتكدرون تسألون اهاليكم عن اسلوب القتل الي انتشر ب ٢٠٠٥ تحديدا وراح تعرفون ... و بلاخير اكلكم ابو جمان انسان مسالم وبريء وانقتل باطل)

_ اااخ يابه سودة عليه كله علمود لا يخلينه بعازة احد ... ياليتني متت ولا سمعت الي سمعته ليش رحت يابه ياليت ما خليناك ترجع لعراق
_ بنتي هذا الحجي ما يفيد صيري قوية ابوج جان دوم يكلي جمان سندي بلحياة ويكول ما عبالك بنية تسوه عشر زلم

جنت اسمع كلام عمي والدموع تنززل من عيوني ماعرفت شحجي دموعي جانت كفيلة بوصف ألمي واخترت اسكت واخلي جروح كلبي هي التحجي جنت اتمنى انه بحلم اتمنى يطلع كابوس واكعد منه ....

باوعت لعمي وكتله
_عمو ابوي جان شمعة الامل التضوي حياتي وهسه انطفت هاي الشمعة...
بهاي اللحظه فقدت وصرخت بصوت عالي
ااخ يابه ... جانت امي نايمة وجود بصفها كعدت ع اصوات صراخي اجت تركض تريد تعرف شنو الصاير باوعت لعمي كاعد بلكاع ومنصي راسه والدموع تجري من عيونه وانه الجنت ابجي واصارخ بدون ما أحس ع روحي
_ الله يساعدك ابو ماجد خير شبيكم ايوب بي شيء ؟!
جانت تحجي وهي منتظرة الجواب ع الرغم من المنظر الشافتة بس أمي جانت تريد تطرد من عقلها كل الافكار السلبية وتبقى معلكة بخيط الامل القصير...
_البقية بحياتج ام جود
عمي كال هاي الجملة وهو منزل راسه بدون ما يباوع لأمي ... باوعت لامي وشفت وجهه صار اصفر بعد الكلام الكاله عمي ما عرفت شسوي اواسيها لو اواسي روحي ... ماعرفت يهو الشعور الاصعب انو تفقدين زوجج وابو بيتج وتكونين ارملة ... لو يروح منج ابوج وسندج بلحياة وتكونين يتيمة وجماله الغربة وبعدنه عن وطنه معناها حتى قبر ابوي ما نكدر نزوره ونريح قلبنه ... ماعرف شلون طلعت مني هاي الكلمات وكلتلها _ يمه كعدي خل نحجي .. جنت احجي والدموع تنزل من عيني اباوع لامي ماكو اي ردة فعل بقت ساكنه بمكانها كأنما تصنمت وما أحس الا امي طاحت بلكاع هنا حسيت الدنيا وكفت كمت اصارخ بحيث الكل كعدوا ع صريخي ...

يتبع

حاولت قدر الامكان اقلل من وصف الحالة تقديراً للي فاقد ابوه 💔 بس الحالة صعبة والموقف صعب وما اكول غير الله يصبر العايش هذا الالم ... الرحمة لجميع امواتنا والله يطول بعمر اباءنا...

حبايب لا تنسون التصويت وترك رأيكم بلتعليقات اريد تفاعل على الرواية حتى تنطوني واهس اكملهه