مساء الخير حبايبي هذا بارت تعويض الكم عن بارت امس لانو قصير
عندما اتحدث عن والدي
فأنا اتحدث عن المحبة
والحنان
والامان
انا اتحدث عن وطن كبير
مع الاسف هلمرة محد كدر يقنع ابوي حتى امي جانت بس تستمع يمكن حالة جود خلتها تسكت ... مرت يومين وابوي قرر يسافر قبل لا يسافر صاح عليه وكالي
_ بابا جمون امج وخواتج واخوج خليهم بعيونج صيري انتي سندهم ولا تخلين الدنيا تلوي ذراعكم ... خليج مصدر قوتهم الى إن ارجع ان شاء الله... شبكته وبسته من راسه وكتله
_لا توصيني يا غالي بس دير بالك ع نفسك ودعنه ابوي وقبل لا يطلع وصه عمي علينه وباوع علينه وكال _بابا جمون انتي ووحده من خواتج ابقن بيعن خبز ويه مرة عمجن مكان امجن وان شاء الله انه اوصللكم فلوس ..
النوب باوع لعمي وكاله _اي شيء يصير دربالك تعوفهم وترجع لعراق وما اوصيك حطهم بعيونك ... جان كلام ابوي مؤلم ووداعه صعب اول مرة نبتعد عن ابونه
اما امي فجانت شايله جود وتبجي ودعهم ابوي وراح ... بكلبي كتله _ الله يرجعك النه بسرعة يغالي...
بعد مرور ٨ شهور //
جنت حاطة الطبك فوك راسي و امشي باتجاه البيت بعد ما بعت الخبز الي عندي شفت ماجد كاعد بباب البيت بس شافني اجاني يركض ويصيح
_جمان جمان انطيني الطبك انه اشيله نطيتهياه حطه ع راسه و مشه وكال من اكبر ما اخليجن تبيعن انه ابيع مكانه ابتسمت ع كلامه...
فتت للبيت رحت لغرفة كبل بست جود ع راسه لكيته نايم حبيبي جنه ملاك ..
رحت لمطبخ لكيت امي و نوران جاي يطبخن سلمت و كعدت اساعدهن امي كالتلنه
_ يله بنات خفن ايديجن اليوم جود عنده مراجعة عند الدكتور
كملنه الغده اجت مرة عمي و رزان الي كوه جانت تمشي من التعب بس فاتت للبيت صاحت
_جوعانه شنو الغده .. ردت عليهه نوران _ ام بطن سلمي اول
_تعالي اشتغلي مثلي و كولي ام بطن
انتظرنه عمي يجي وكعدنه نتغده غصيت بلكمه وانه اكل كبل اجه بالي ابوي سودة عليه يمكن جوعان ...
تذكرت وسالت عمي
_ عمو شنو صديق بابا ما اجه هذا الشهر؟
_ لا والله عمو بعده
(جان بابا يدزنه فلوس بيد صديقه تاجر)
_ جمان : زين ماكو خبر عنه
_ لا ماكو بعدني انتظر جية صديقه
_ ام جود : ابو ماجد شصار ع الموضوع الكتلك عليه ؟
_ حجيت ويه ابو هاشم ووافق بس باقي يجي صديق ايوب وانطي خبر علمود يوصله لايوب لازم اخذ رايه
_ لا يا ابو ماجد اخذ هذه الفلوس و انطيهن لابو هاشم بس يجي صديق ابو جود تنطي خبر يكول لابو جود يرجع
_ نوران : شنو يمه يا فلوس؟
_ يمه ابوج مو جان يدزلنه فلوس جنت اشيل منهن فلوس علاج و مراجعات اخوجن و شوي لايجار والباقي اضمه وشهر ع شهر صارن عندي جم فلس و سمعت من ام هاشم انو ابو هاشم يدورله ع واحد يدخل شريك وياه بمشروعه فانه كلت لعمج يكله واحنه ندخل وياه علمود ابوجن يرجع كافي وتعب يشتغل شغلين علمود يوفرلنه الفلوس
كلحنه تونسنه من كلام امي يعني ابوي واخيرا راح يرجع جنه منتظرين جيت صديق ابوي بأحر من الجمر
بدت الايام تمر وصار اسبوع و صديق ابوي ما بين كلحنه جنه قلقين ع ابوي بس جنت دوم اكلهم يمكن راح يجي لسوريا لهيج ما دز صديقه هلمرة.. التهينه بمراجعات اخوي وبلمشروع الي فتحناه ويه عمو ابو هاشم و بلأخص عمي جان ما يلحك ... حاول يحصل خبر ع ابوي بس ماكو ... بلاول راد يروح لعراق يشوفه بس الظروف حكمتنه ماكدر يعوفنه مرض اخوي والمشروع ما كدر يروح ويعوف كلشي وراه اضافة لهلشيء مرة عمي الي رفضت تخلي يروح خوفا عليه... جنت هواي خايفه ع ابوي لان اسمع انو الوضع بلعراق مو تمام و نذرت للامام الكاظم "ع" اذ رجع ابوي بسلامة اوزع ثواب ... رغم ما زايرة الامام الكاظم "ع" بس امي جانت تسولفلي ودكول عنده سبع بيبان لهيج جانو يسمونه ابو سبع بوب و ينطي الحاجه بلأيد و سبحان الله ال البيت مجرد ان تذكرهم كلبك يرتاح ...
جنت انتظر رجعت ابوي بلهفه امي جانت ملتهية ويه اخوي بس الخوف والقلق والاشتياق لابوي واضح عدها ... اما اخواتي حالتهن مثل حالتي مرت الايام والاسبوع صار اسبوعين واحنه بانتظار رجعت ابوي بحيث كلما يندك الباب نتأمل انو هو وامالنه تخيب لمن يطلع مو هو ع الباب ...جنت انسه غربتي من احضنه ..
جريت حسرة و دعيت يرجعنه سالم .. رحت اشوف امي لكيتها كاعده لوحدها كلتلها
_ يمه ليش كاعده بحدج هنا؟
_ هلا جمونه والله يمه ابوكم ما جاي يروح عن بالي اريد اعرف وين صفه بي الدهر تدرين متندمة ع الساعة الخليته بيهه يروح لو لازمه بي بس اااخ
امي كالت هذا الكلام وانه كلبي انعصر سودة عليه تلوم نفسها لان خلته يروح كلتلها
_ يمه انتي شبيدج بابا جان معند ... هسه انتي ادعيله يرجع سالم وان شاء الله يجي اليوم الي يفوت من الباب ونكحل عيونه بشوفته ...
بس طلعت من يم امي كبل رحت لعمي وحاجيته كال _ عمو انه حاجيت جدكم من تلفون بيت ابو هاشم وكال راح يروح لبصرة ويشوف ويرجعلي خبر ان شاء الله
(جدو ابو امي ويصير عم بابا هم ... سابقا جان عايش بلبصرة وحاليا عايش بلحلة بعد حرب ايران راح عاش هناك ++ احنه مجان عدنه تلفون لهيج عمي تواصل ويه جدو من بيت ابو هاشم ع الدولي )
مرت يومين وماكو خبر من جدو عن ابوي جنت احسب الدقائق لرجعته ومنتظرته يجي ونفرح ونرتاح
بعد مرور ٣ ايام //
بعدني اذكر تفاصيل هذا اليوم الي اعتبره اليوم الاسود بحياتي ... جنت كاعده بلهول مدده رجليه بعدما تعبت من الشغل سمعت الباب اندك رحت اركض فتحت الباب شفته عمي سلمت عليه وانه عيوني جان بيهن سؤال شخبار ابوي
لان عمو ابو هاشم دز ابنه هاشم علينه يكولنه اكو مكالمة الكم من العراق
سألت عمي وانه الكلام كوه يطلع من عندي
_ هاا عموو بشر المكالمة الي من العراق من جدو شكال ؟ شخبار بابا شافه؟ شوكت يجي ؟ كاله فتحله مشروع خل يرجع؟
كل هاي الاسئلة طكيتهن دفعة وحده وانه اترقب جواب عمي
_ ابو ماجد: منو بلبيت؟
تعجبت من سؤال عمي رديت عليه بسرعة
_كلهم نايمين وانه من اجه هاشم ما كلتلهم رحت علمود مكالمة كلت تجي انت وتبشرهم باخبار ابوي
رجع شعره ليوره وجر حسرة وكال
_ تعالي بنتي نكعد عندي حجي وياج
رحت بسرعة وكعدت كبال عمي وانه منتظرته يحجي
_ عمو جمونه انه رحت وجدج هو الي خابرني ورايح لبصرة وسأل عن ابوج ... وسكت ما كمل كلامه انه حسيت ما ظلت قطرة دم بيه هواي افكار سودة اجتلي كتله _ اي عمو وشنو ما لكاه لو شنو فهمني عمو الله يخليك ...
_ شوفي بنتي اريدج تبقين قوية و صابرة ...
يتبع
اسفة حبايب تمنيت اكتبلكم اكثر بس كلش مقهورة وضايجه ع لعبة منتخبنا لان تعبو وجنه محتاجين الفرحة ولواعيبنه ما قصرو بس شنسوي الحظ ما كعدنه الحمدلله ع كل حال ان شاء الله نعوضها بلبطولات الجاية
لا تنسون التصويت وترك رأيكم وتوقعاتكم بلتعليقات
دمتم برعاية الله
أنت تقرأ
انا العراق
Genç Kız Edebiyatıرواية واقعية تحكي عن جزء من معاناة الشعب العراقي بعد عام ٢٠٠٣ حيث تعاني عائلة البطلة من الهجرة بسبب الضروف انذاك وتعاني من مرارة الغربة وفي اسوء تلك الضروف تقع في حب شاب موصلي الاصل ...
