انا العراق

بارت 28

السلام عليكم حبايب

اعرف مقصرة وياكم بس شسوي اوضاع العراق والي جاي يصير ماخذ كل وقتي تخيلو حتى الواتباد صارلي يومين ما فاتحته طول وقتي ع التويتر والله بس اعوضكم عن كلشي ان شاء الله بس خل تخلص هاي الازمة ...

هذا بارت الي كدرت اكتبه تعبيرا عن فرحتي اليوم الحمدلله رجعت ساحة الاعتصام بيد شبابنه ..

اتمنى لكم قراءة ممتعة

____________________

جمان//

بعدما زرنه قبر بابا يوم ثاني رجعنه لبيت جدو جنت حيل مشتاقة لامي واخواتي وجود الي جانت روحي تفتر ع شوفته .. اول ما دخلت ركضت عليه حضنته وهو نفس الشيء بقى حاضني ويبجي ويكلي بعد لا تعوفيني .. بلفترة الي ابتعدت عنهم عرفت بنفسي شكد احبهم .. ونفسيتي تعدلت بعدما زرت الامام الكاظم وقبر بابا .. صحيح اللجمة بعدهه بداخلي بس بديت اتعود وكذلك حسيت جزء من الالم انتشل بعدما شكيت همومي بلامام ... وبلشت الايام تمرر ويوم عن يوم بلشت اتعود ع فراق مهيمن وعدم وجوده وما انكر اقتنعت بفكرة انو هو تخلى عني وتركني .. كل يوم جان يمر وانه ما اعرف خبر عنه والاسئلة الي تدور بعقلي تخليني ازيد بلاقتناع انو هو عافني وتخلى عني ... التفكير جان مرض مااكدر اعالجه .. باخر فترة اقتنعت بفكرة انو هو لو ما تخلى عني جان اتصل بيه بهاي الفترة ونطاني عذر ع اختفائه... بعد ما مر شهر كامل ضبط قررت ادورلي ع شغل حتى اكسر الروتين واحاول اشغل نفسي عن التفكير بعدما صارت حياتي تقتصر ع الاكل والشغل والنوم ... وطبعا ما لكيت غير منتصر اطلب منه يدورلي ع شغل ..

رزان//

بعدما راح ايهاب ضليت كاعده بغرفته انتظره يرجع جنت خايفة وارجف واطكطك باصابعي من الخوف .. اخاف اتصل بي وبنفس الوقت افكر بشنو صار وحل الموضوع لو لا ... مرت تقريبا ساعة ونص وانه ع نفسي كعدتي انتظره .. سمعت صوت خطواته بدرج كمت وكفت قريب الباب انتظر دخوله للغرفة اول ما فتح الباب ودخل للغرفة بينت معالم الصدمة ع وجهه من وجودي .. بلعت ريكي وانه خايفة ومترردة من سؤالي اله وخايفة خاف اساله اذ حلهه او لا ويكول لا وانه اتخبل والله .. عضيت شفتي بارتباك وحجيت بثوت مليان خوف

_ااا نحلت لو ل لا

جر نفس ورجع شعره ليوره وكال بهدوء

_انحلت الحمدلله ..

بعدهه عقد حواجبه وكال بنبرة صارمة

_انطيني موبايلج

ارتبكت وهزيت براسي اخذت موبايلي الي جنت خالته ع سريره مديته اله وانه ايديه ترجف من الخوف

اخذه مني وانه اباوعله شراح يسوي .. فتح الموبايل ومسح الفيس وبعدهه رفع راسه وكال

_فيس بعد ماكو مفهوم