انا العراق

بارت 27

بارت (27)

انا_العراق

للكاتبة: براء_كريم

____________________________

واشوفنك كلب متروس حنية

يابه شحلات السني من يعشك الشيعية

_______

جمان//

بليل رحنه للعشار انه وخالو هواي امور جانت متغيرة مو هذا العشار الجان قبل الي جانت العوائل البصرية بلمناسبات تروحله .. كعدنه ع الكورنيش بقيت اتامل الشط .. سحبت نفس عميق وغمضت عيوني .. رغم الدمار الي انتشر ببلادي بس انه جدا فرحانة لانو رجعت للعراق وبنفس الوقت فرحانة لان رجعت شفت البصرة انه الي بيوم من الايام كنت متوقعة انو ما ارجع بعد للعراق بس الي كاتبه رب العالمين هو اليصير .. بقينه نتمشى بشوارع العشار واخذت صور للذكرى كلت يمكن بعد ما تصحلي فرصة ثانية اجي هنا .. افتريت بسوك العشار كلشي جان هناك يخببل اشتريت ملابس واشياء لاخواتي ولجود .. حسيت نفسيتي بلفعل تغيرت .. صح بداخلي لازال الانكسار بس كدرت اتجاوز مرحلة جبيرة من الالم .. يوم ثاني من الصبح رحنه للمقبرة وقت الي وصلنا حسيت برعشة اجت بجسمي وخفقان بقلبي .. جنت امشي خطوة ليكدام وارجع خطوة ليورة .. بداخلي اريد ازور قبر بابا وبنفس الوقت ما اريد اشوف قبر صعية تشوف خيمتك نايم جوه التراب .. يمكن هاي السنين كلهه هو جنت احسه عايش وياي لان ما جنت زايرة قبره .. بهذاك اليوم شعور صعب ما اكدر اوصفه .. خالي خابر ع عمو دلاه مكان القبر وبعدها لزمني من ايدي وضلينه نمشي ندور عليه... صارت كدامنه كوه كبور ضليت اباوعلهم وانه احس قلبي راح يطلع من مكانه .. خالي تنهد وكال

_بنتي حسب وصف عمج قبر ابوج هنا دور وياي عليه اقري الاسامي

هزيت راسي ومشيت باتجاه القبور وصرت ادور ع قبره بلهفة .. اي مشتاقتله ايي اريد احضنه .. استمريت اقره بلاسامي وماكو اخر شيء رفعت راسي وباوعت لخالو وكتله

_خالو متاكده قبره هنا اشو ماكو

هز براسه وهو مستمر يدور وكال _اي بنتي ابقي دوري لا بد نلكاه

استمريت ادور الى ان قريت اسمه

ايوب الت...

كل خلية بداخل جسمي انتفضت .. شمرت روحي ع قبره وحطيت راسي عليه .. انهاريت بلبجي والنحيب بصوت عالي .. هذا ابوي اي هذا ابو هنا ... ااخ يابه شكد انتظرتك وشكد فكرت بيك نمت لو بعدك واكلت لو بعدك وبلنهاية انت طلعت نايم جوه التراب واحنه شهور ننتظرك .. بقيت ابجي واعتلت شهكاتي .. تقرب خالي عليه وحط ايده ع راسي بس ماحجه ولا كلمة .. رفعت راسي رجعت قريت الاسم ونزلت دموعي بازدياد .. نزلت راسي وضليت ابوس بلقبر واكله بقلبي كووم يابه كوم تعال شوف حال بنتك شلون يابه ما تلوكلك هاي النومة .. ليش عفتني ورحت انه بعدك ضايعة .. يابه انت كتلي خليج قوية بس ما كتلي تراا القوة الها وكت وتخلص وتنهارين .. رجعت حضنت قبره واحجي وياه بعتاب .. زين ليش ما تمرني بحلم .. انت تحس بيه لو لا تحس بحرقة قلبي لو لا تحس بلجمرة الي بداخلي لو لا .. مديت ايدي تلمست الاسم وغمضت عيوني وكانو جاي احجيله عنه اخبارنه ابتسمت ودموعي لا زالت تنزل وكتله بابا نوران انخطبت تمنيتك موجود وتوكف بمهرها .. بابا جود كبر .. اي كبر وهو ما شاف شيء من حنانك .. خالي لزمني من اكتافي وكالي يله خالو خل نغسل قبره ونقراله الفاتحه ونكوم .. هزيت راسي بلرفض وكتله بصوت مخنوك