حكايتي مع الزمن

بارت 4

ايام المدرسة جانت كلش صعبة بالنسبة الية محد يدرسني ولا احد يداريني من غير التصخيرات وشغل البيت عود تعليمي على الشغل واصير بنية بيت  بيوم من الايام المعلمة انطتني ورقة وكلتلي انطيها لهلج  .....بعيدن كالت الاحسن انطيها لابوج

هاي اذا عندة احساس رجعت من المدرسة وره الغدة سحر تصب جاي لابوي طبعا القرار اي طبقته سحر علية هيه وبناتها انو ممنوع اكعد يمهم اذا جانت سحر وابوي سوة بنفس المكان من اشوفهم سوة اشرد  زين اشون انطي الورقة لابوي

عاد اخت نفس وطبيت للهول ابوي يباع تلفزيون ويشرب جاي عاد خزرتني سحر خزرة خرطت روحي

رؤى ...بابا ..اليوم المعلمة كلتلي انطي هاي الورقة لابوج  

ابوي التافلي واخذ الورقة
اني افرك بأصابيعي وسحر بس جكة دنبوس تنفجر

ابوي ...باوع لسحر كللها هاي المعلمة تشكي من وصاخت رؤى وعدم ترتيبها  ليش هيج جاا اشون اطلعيها مبهذلة

كلتله اني والله مرات ابقى نايمة بس وصيج نرجس عليها كتلها من تطلع شوفيها  ولا بتك يا حارث كلشي تفتهم يعني ليش توصخ روحها

ابوي ....اشون طفلة عمرها 8 سنين تريديها تهتم بنفسها  ادري غير تنظفيها  وعاط صاح نرجس

اجتي نرجس تركض ها بابا
....انتي امج مخليتج على نظافة رؤى اشون اختج تطلع وصخة والمعلمة هيج تشكي من وصاختها

كالت هاا اءءء......مو هيه من انظفها توصخ نفسها

كلها اشون وبالورقة تكول .....بتكم ندخل الاصطفاف وصخة مبهذلة
ابوي صوته عالي عاد كامت سحر

.....اي وهسه تالي وكت انظف بنتك جان ذبيتها على امها العوبة ازوجت وخلفت واطلكت واحنه مبتلين ابوي عيونه صارن براسة والعركة اطورت وانحرفت عن مسارها وصارت عركة كرامة ورد اعتبار
واسم نهاد الي مله البيت حقد وقهر مها ودنيا يبجن على امهم وابوي تحول من صياح الى غلط عليها

علاء جان برة وصلاح بالبيت اجه
صلاح يابة صلي على محمد كول يا الله

....منعول الصفحة شايفني مخبل ولسان سحر رشاشة
اي دكيت رجل اله تزوج وحدة بغدادية مشيت ورة كلبك ما مشيت ورة عقلك  وهاي النتيجة طلكتك وبتها علينه  ذب بتها عليها

فوق الحمل تعلاوة 6 خلفتلك وما ملو عينك
اني وجهالي ما ملينه عينك ...بس نهاد ملته وزيادة  وتالي شحصلت يا حارث
 
حارث...اني اعلمج قليلة تربية شايفتني بدون عقل شردت سحر لغرفت البنات  وقفلتها عليها اني كعدت بزوية 
واسمع صلاح يحجي ويا

ابوي يكلة ميت مرة كتلها سدي هذا الموضوع اني رجال كلشي اسوي شابفتني بدن عقل وصي امك تحترم نفسها

ورة نص ساعة هدء البيت وين اروح وين انطي وجهي  هسه ياكلوني  صار العشة واتعشينه والاب والام متخاربين من ورة رؤى

رحت للغرفة واجت وراي مها ونرجس دكن بيه التوبة بعد ما احجي شي لابوي  اناشغ وابجي ما احجي ابد  وكوة فكيت منهن

صار الصبح لبست ملابس المدرسة وكعدت نرجس الي تمشطلي وتعت بشعري حيل طبعا هيه تمشط واني ابجي وكلك طلعت بدون ريوك

الملابس ينغسلن شله واعبر  المهم امشي اموري  بالمدرسة بقت الدرجات  من سئ الى اسوء

شدت ويا سحر وخاصة دنيا ومها راووني نجوم الضهر كلشي سوو حرموني من الاكل شغل البيت علية  بصف الرابع هزومني استسلمت رسوبي جان باص اخضر حتى اكعد بالبيت

بابا كال مدرسة ماكو هاي انتي بنص السنة وهيج درجاتج المن بعد توسلت بابا ودموعي تجري

المدرسة بيتي ملجئي من حياتي بيت اهلي  غريبة بوسط اهلي وما احس بأمان  ملجئي صديقاتي كعدتنه سوة ضحكنه انسى معاناتي شوية

بس العادات والتقاليد اولى بهذا الشي  دمرني من بطلوني بس بقت عندي كتب مال صف رابع اقرة بيهن واتعلم واكضي وقتي من احن للمدرسة

يبوم اجه منذر بالملابس العسكرية طبعا منذر متزوج وزوجتة مو على وفاق ويا امة لذا جياتها قليلة للبيت حتى من تجي متختلط باحد

اجه وسلم على امة وابوة وكعد وياهم 
منذر ....يابة  خابرتني ام علاوي تبجي وتريد رؤى تحجي وياها وتسال عنها  وتريد تعرف اخبارها تكول بتي لا تحرموني منها 

سحر وجها انكلب اي وشنو توها تذكرتها بعد التعب والتربية توها تذكرت لا والله فلا اخليها عليمن يمه هذا هو طلعت من حياتنه وخلص الموضوع يمه منذر خابرها وكلها مالج بنية عدنا

منذر ......يمه واليرحم والديج  انتي ام وهيه ام
وتعرفين شنو شعورها اكيد تريد بتها

لا والله لعد ليش ذبتهة علين..........

قاطعها ابوي  ....سحر  سدي الموضوع

كامت سحر ودردم تالي وكت هسه ذكرت

ابوي كال لمنذر خابرها وخلي تحجي ويا بتها 

خابرها .....انفتح الخط ....الو السلام عليكم .
شونج خالة ام علي
اني بيت اهلي مو ردتي رؤى

اي هاي هسه اصيحها  رؤى يا رؤى

سمعت منذر يصيح اول مرة يصيحني  لزمت كلبي من الخوف  كلشي هنا اخاف منه كلشي
طبيت للهول وابوي ومنذر  كاعدين

كلي تعاي هاي امج على التلفون  وتريد تحجي ويا مو حجه هيج  لو روحي طارت  صح بداخلي غصة ليش تركتني

بس احس بأمان من احسها يمي

اخذت الفون  ....الوو...
رؤى حبيبتي ماماتي

يمه يا روحي مشتاقتلج

متابعة .#