مهمات سرية 💣..الحلقة السابعة ..
حسن - ان شاء الله يشدها .... هالهرابة هادي ..اهو يتصل .... ايوه مصعب .... لقيتهاااا اووو حلو حلو.... برافوو عليك .... تعال اهنا انت وياها ب اقصى سرعة ....
ضاوي - شن لقاها
حسن - لقاها .... وهالياس هدا ياويله مني !
<><><>
*بدل الياس ونزل نسي تلفونه فوق ...خدي المفاتيح من فوق الطاولة ....و بصدفة جت عينه ع دار اللي كانت فيها مي ...لقاها مفتوحة على وسعها .... وقف ومشالها لقاها فاضية .. قرب من الحمام يسمع ف امية الدوش مفتوحة ...
إلياس - عيشة ... عيشة ..
(وين مشت هادي ؟ وكيف فاتحتلها هكي الباب بش قتلها ماتخليهاش بروحها ...)
إلياس - عيشة...ياعيشششةةةةة .... عيشةةةة ....تي وينها هادي
*شاف المطبخ وكل ديار الدور الارضي مالقهاش ...رجع ركب فوق وفتش كل الديار برضوا مالقي شي ....شك في الامر و خش لدار اللي فيها مي ... قرب من الحمام وطقطق على الباب ... واستنى ...طقطق تاني ...وتالت ورابع .....فتح الباب لقي الحمام فاضي واميا الدوش مفتوحة بروحها زااااد جن جنونه... وبدي يغلي اتقول بركان ....وعيونه فيهم علامات الغضب يشعلوا ناااااار .... كسر كل شي ف الدار و طلع عالصالة كسر وكركب كل التحف اللي ف الموجودة .... خدي سلاحه من عالطاولة وحطه ف خسره وبيطلع بش بيدور عليها ...
<><><>
مصعب - اهياه يالافندي جبتهاااا
حسن - اوووو مليح بكل ... خيرك غاملها فمها هكي مسكينة
مصعب - درهتلي كبدي بصوتها ...
حسن - تعالي ياهرابة تعالي ... دوختيني عليك ... وانا اندور واندور ....
ضاوي - ماساة انت ياحسن ماساة
حسن - هاتها هاتها ....بنتي حتفرح هلبا لما انقولها لقيت شيراز ...
ضاوي - مفروض مش شاريهالها ...بنتك صغيرة ياراجل
حسن - قتلي نبي قطوسة قتلها باهي ....مانقدرش انقولها لا ... ومن الصبح وهيا اتعيط لانها راحت
<><><>
* وقت وصل إلياس للباب وفتحه لقي مي ف وجهه و وجها اصفر ... بس الياس مانتبهش *
شدها من سواعد يديها ويضغط عليهم لين حست بصوابعه قريب يلتحموا ف عظماتها من شدة القوة ....وجعتها يديها وهوا مش منتبه ويكشخ عليها ويخض فيها يمين يسا - وين كنتي...😬؟؟ وين كنتي اتكلمي😬 .... قتلك ماتعتبيش برا باب الحوش والاه😬 ..... علاش ماتسمعيش ف الكلام انتي علاش 😬
* ادروخت مي من خضات الياس وحست براسها ايلف .... تبي تفلت من قبضة يديه ماقدرتش ... وحاولت تاني و بعد جهد جهيد فلتت من قبضته وقتله - بعد علياااا
... ومشت خطوة للقدام ورجليها فاشلات مش قادرين يحملوها لقريب طاحت ... اقترب و شدها جت بين يديه وكانت قريبة منه .... نظر ف عيونها وقالها - وين كنتي نسئل فيك جاوبيني ماتمشيش فجاة هكي؟؟
ماقاومتاش مي مسكته ... من كثر الدوخة اللي عندها نظرت ف عيونه لقت غضب قريب يلتهمها بعيونه ... خافت منه و استسلمت وجاوبته - كنت ف العيادة ...
*هدت ملامح إلياس من الغضب ورخها بشوي وسئلها - من رفعك ...
مي - مش مهم تعرف
إلياس - اكيد مهم وطالما سألت جاوبي
مي - انا وامي ....رامي رفعنا .... وتعبت امس الليل كله وانا مريضة وتعبانة تبي تقرير تاني شن صار فيا يااستاذ الياس ...
*دفاته شوي وبتكمل طريقها لدارها انتبهت ان الصالة محوسة وقطع التحف متناثرة ف كل جيهة ....
{اتعس انسانة هيا انا .... احيه رجليا معادش حامليني }
كملت طريقها بين القطع المزهريات والكركبة ... فكر الياس يساعدها لين توصل لدارها .... بس كبريائه منعه .... وصلت لدار لقتها حايسة ..والياس مازال واقف يشوف فيها وين بتمشي وشن بدير....
إلياس - فيه هلبا ديار غير هادي ... اركبي الدور الفوقي
مي - دارك تقصد ؟
إلياس - مش ضروري داري .... اي دار ...
مي - هادي مافيهاش روشن بالك نهرب من رواشن الديار الثانية
إلياس - اركبي اركبي ... واضح انك تعبانة و حالتك ماتسمحش بالهرب..
*ركبت اول درجة مي واتعترت ....
وشدت راسها ....
اتقدم الياس بشوي وشدلها يدها بيساعدها ... فلتت يدها بالقوة من يده .... وقتله - ماليكش علاقة بيا
* قامها ف غمره اجباري ...
مي - بعد عليا بعد ... مش طايقاتك راهو ....نزلنيي نقدر نركب بروحي ماطلبتش مساعدتك
*وتضرب فيه بيدها ع صدره ... وهوا متجاهلها تماما ...قعدت تنقرز لين وصل بيها لقدام داره قالها - نحي كندرتك
مي - كيف بنحيها وانت قايمني هكي
الياس - نحيها تقدري ....
نحتها مي وكذلك هو نفس الشي نحى كندرته وخش لداره وانحنى وحطها عالسرير *
مي بتنوض من على السرير وقتله - انت قلتلي مش ضروري دارك و جبتني لهنا والا لاقيني ضعيفة حاليا لاني مريضة و ناوي تهجم عليا زواجي منك عالورقات بس تفهم فيااااا
إليلس - شن نهجم عليك تحسابيني منزوم بيك ؟؟
مي - علاش جبتني اهنا حووول بنطلع
إلياس - ماتكنطينيش داري الوحيدة اللي فيها سرير واللي فبالك نحيه فاهمة
مي - انا راضية نرقد حتى عالوطا المهم مش ف دارك
إلياس - ارجعي عالسرير
مي - مانيش راجعة
إلياس - معش تعانديني ارجعي قتلك
مي - مش راااجعة ...
إلياس - مش تحسابي ايهمني امرك راه.. لا يافالحة لا ...بس شكلك متع واحدة بتموت.... مانبيش نتحمل مسؤلية هالشي قدام امك فلهدا انطمري عالسرير وارقدي ......
*ماعدلتش ع كلامه مي وقعدت واقفة ....فاكشخ عليها - انطمري
*قعمزت مي عالسرير .. وبعدين امتدت عليه ..واتكرمشت .. واتغطت وغمت راسها وقتله - نكرهك ... نكرهك كره اعمى ....
سكر الياس دولابه بالمفتاح وخدي تلفونه من عالكنبة ... ... طلع ورد الباب ...
مي - تزوجتني غصب وانا مانبيكش ....قهرتني ... كسرتني ...جرحت كل شي فيا
*نحت الغطاء مي ع راسها لقت الدار فاضية ... حطت يدها تحت خدها حست بألم نفسيآ وجسديآ حنقتها العبرة وبتبكي ...*
<><><>
أنت تقرأ
مهمات سرية ( روايات ليبية )
Romanceعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
