الحلقة 11 مهمات سرية ... الجزء 3 و الاخيرة
مي - وفي خلال مكالمتي معاه اللي مافتتش الدقيقة ماحسيتش بأي مشاعر اتجاه مهند حينها بس عرفت ان ااا ...
الياس - ان شنو ...
مي - ان اا .....
الياس - ايييه؟؟؟
مي - اني اا ..❤
لو بنقوله حبيتك حيكذبني صح ومرات ايحس ان كلامي كله كذب وانا قتله حبيتك بش نبرئ نفسي قدامه ... }
الياس - وبعدين ؟
مي - اني انا كنت غبية ..
الياس - هه فعلا ..
* ولع سبسي ورن تلفون الياس فابعد شوي ورد وفي فمه السبسي ...
الياس - ايوه نعم
لافينو - اهو عرفتلك وين مكانه الشوشة
نحى السبسي وقال - مليح بكل ...وين ؟
لافينو - يخدم في كازينو جارن مدريد ... وماسمشي الشوشا ... قليل النادر اللي يعرفوه بالاسم هذا
الياس - اها واسمه ؟
لافينو - اسمه سويلم الديك.
الياس - اووكي .. اي معلومات ثانية
لافينو - كان عرفت حاجة ثانية حنكلمك ...
الياس - اوكين ...
* وقف وخدي جيبوطيه ومفاتيحه *
مي - طالع ؟
الياس - اكيد ... اسبانيا بلدة الجميلات
اتعفلقت مي وقتله - جميلات اه هه .. ماشي بتكحل يعني
الياس - التكحيل ف ليبيا ... اما هنا نهدرزوا وناكلوا ونشربوا وندهورا مع الجميلات الفاتنات
مي تعفلقت اكثر وقتله - ومن هما هادوا تعرفهم من قبل؟
الياس - واحدة بس نعرفها من قبل ... ليندا اليخاندرو ... ماشي بنقضي وقت برفقتها
مي - تو هذا شن يسموه
الياس - على الاقل قلتلك ف وجهك خير مانطعنك ف ظهرك
مي - اسمها خيانة
الياس- هه من يتكلم ..
{من نبرة صوته واضح انه ماصدقنيش اااخ ياربي اخ}
الياس - حنخليلك مفتاح الغرفة مرات نتاخر ... سكري من داخل وكان احتجتي ماكلة اطلبي ... وردي بالك تفكري تطلعي
مي - باهي .
*طلع الياس وخلاها ونزل ل علي ... ومشوا هما الاثنين قاصدين كازينو جارن ...
<><><>
فاقت ابتسام على كابوس ضاوي .. كعادتها ... وقعدت تفكر ف يوم ختام حفلتها شن ممكن حيصير وشن حتكون ردة فعل رامي لما يعرف انها مش بنت ...
{شن انقوله ... الولد باين عليه كويس ... ومسكين يتيم ... نزيد نضره حتى انا بعمايلي ياسر قبل مادرت فيه وجت على راسي ... نخاف ربي يبليني بشي مرض او حاجة .... لا حول ولا قزة الا بالله ياربي كيف نتصرف اللي صار كان غصب عني حسبي الله ونعم الوكيل فيه اللي كان السبب ... حسبي الله ونعم الوكيل ... }
<><><>
* وصلوا الياس و علي لباب الكازينو ... *
علي - ماعمري وحياتي عتبت كزينوات
الياس - لا على اساس انا عتبت بابهم
علي - الله لا يربحك ياطلياني ... جريتنا لجراير مانبوها
الياس - كان نلقاه بس نفرمه فرم ....
علي - حنلقوه ان شاء الله
هي خش خش ...
*خشوا الاثنين وقعمزوا عالبار وطلبوا عصير استغرب الجرسون طلبهم بحيث ان الكل يشرب وايقمر .. الا انه لبى طلبهم
الياس - وين بنلقاه توا .؟
علي - مش عارف ... نسئلوا زعما
الياس - مافيش حل الا هكي ...
*حطلهم الشاب العصير وابتسملهم ... فسأله الياس - لو سونتيموس .... سابا آنى يوستيد برسينو سوسيلم قيلو ... اورا ديك
*وجاوبه الشاب هز راسه الياس وشكره ... وعلي يشوفلهم مش فاهم شي ..
علي - ها شن قتله وشن قالك
الياس - قتله تعرف شخص اسمه ساري الديك قالي هذا اول يوم لي في العمل ....
علي - ياعليك حظ ...حنسئلوا غيره ...
*وسئل شخص ثاني .... وثالث ... بش حصل واحد دله عليه ... *
الياس ل علي - عرفته اونه اللي يوزع ف الورق ...
علي - مصح وجهه كيف ايوزع ف الورق بكل فخرة ...
الياس - خليني من الورق وقولي ... زعما لو سئالته ايقولي ؟
علي - مرات ايكون صاحبه الطلياني
الياس - ومرات كان سئلناه ينكر ويمشي يحذر الطلياني ام فيه من جاي وراه
علي - مشكلة هكي ...
الياس - نخطفوه ....
علي - 😳😳
الياس - مافيش حل الا هكي ... وبعد مانعرفوا مكان الطلياني برسمي نخلي سراحه ...
علي - المشكلة ان ماعندناش نحطوه فيه
الياس - مش ضروري مكان ....
*استنوا لي ساعة متاخرة وهما مقعمزين ف الكزينو و يراقبوا ف سويلم ... بعدين خش سويلم لباب ... ناض اليلداس وبيخش من نفس الباب منعوه قالوله هذا مدخل العاملين .... رجع ل علي
الياس - الباين ان ورديته تمت وبيطلع من باب الخلفي
علي - اوك هي ... خلي نكبسوه ...
*ولما وصلوا استنوا استنوا وماطلع حد
الياس - حسنا ضيعناه .... حنرجعوا بكرة ....
*رجع للفندق لقي مي راقدة فارقد حتى هوا ... وصبح الصبح واكثر من صباح الخير مايتكلمش ...
فاتو تلات ايام وكل يوم يدور ويستقصى على مكان سويلم وشي ماحصلاش الى ان في ثالث ليلة لقوه كيف طالع ... لحقوه لين وصل لشقته ... وشافوا الضي االشقة اتولع*
الياس - مش عارف هل يسكن بروحه او لا ...
علي - مش عارف ... نطبوا وخلاص
الياس - هي ....
*طقطقوا عالباب بعد دقيقة فتحلهم سويلم ... وكلمهم ب الاسباني شن تبوا ... رد عليه الياس بالاسباني ودفه لداخل ... وخشوا و علي وسكر الباب ....
سويلم - من انتوا ... حنتصل ب الشرطة
الياس - شده الياس وقعمزه اجباري ع الكرسي
*لاد علي ف الشقة ضغيرة ولقاها فاضية فرجع ل الياس وشوشله انه بروحه
الياس ل سويلم - حنسئلك سؤال لو جاوبت عليه صح اتعيش ماتجاوبش حتموت وماحد يندري عليك ....
سويلم - شن تبي تعرف ... قول
الياس - وين مكان الطلياني
سويلم - من طلياني ؟
الياس - ماتستغباش
*طبعا الياس يتكلم بالاسباني ... وسويلم يظن ان الياس اسباني*
سويلم - اححح الطلياني ... كان معرفة قديمة ... ليه سنتين فايتني ... ونبي منه مبلغ مالي
الياس - يعني ماتوصلتش معاه مؤخرا
سويلم - لا
الياس - احكيلي كل شي عليه
سويلم - هوا صح بينا موقف لكن التريس ماتبيعش التريس ...
الياس - قول خيرلك
سويلم - مانقدرش
*تلفت الياس وخدي موس من المطبخ واختبر مدى حدته على صبعه وقاله - موس بقر مالاخير ويمشي معاك ياسويلم ....
بلع لعابه سويلم بصوت مسموع من الخوف ورعش وقاله - اوكي اككي سنيور ..... حنقولك كل شي عليه ...لكن شن بنستفيد
الياس - بتستفيد انك بتقعد عايش
سويلم - اوكي اوكي سنيور ... كان لقيته قولي نبي منه فلوسي
الياس - نسمع ...
سويلم - الطلياني عنده حوش اهنا وهوا مقيم ف اسبانيا من مدة تلاتة سنين .... كنت انا وياه صحاب لكن بعدين خدي مني فلوس على اساس مشروع ... قعدت نطارد فيه لكنه ماعطاني شي وبعدهت قالي خسر المشؤوع وفاتني بدوم مايوضحلي شي ...
الياس - وين يسكن
سويلم - عنده حوش في مدينة برشلونة شارع لاسقاراد فاميليا
الياس - وين بالتحديد
سويلم - ف تلفوني فيه صورة ليه اهو ف جيبي
*خدي تلفون الياس وعطاه سويلم رقم السري .... وخش عالاستوديو وقعد ايمشي فيهم صور لين لقي صورة سويلم و الطلياني قدام الحوش تبع الطلياني .... نقلها عنده ف نقاله ... وزاد ربط سويلم كويس وحطله شريط لاصق على فمه وضربه ب لوحة ع راسه... وطلعوا هما الاثنين .... صبح الصبح وهما الاثنين ف الشارع .... خدوا تاكسي ومشوا ل برشلونة .... ووين ماوصفلهم السويلم .... وقفوا بعيد شوي بين الاشجار ... بعدين تقدم الياس وطقطق عالباب ... طلعتله عزوزة... عجبها شكل الياس ابتسمتله صبح عليها الياس وسألها تسكني اهنا جاوباته ايه نسكن اهنا وبروحي ... ورها صورة الطلياني فقتله كان مأجر مني
الياس - تعرفي مكانه؟
- تلقاه ف حي الفلورا ... لون باب الحوش احمر ....
طلع ل علي ومشوا وين ماقالتلهم المراة .... نقزوا من سور الحديقة تبع حوش الطلياني وخشوا من الباب الخلفي ويمشوا بكل حذر والارضية لوح ادير ف صوت مع كل خطوة ... تفقدوا الحوش ولقوه فاضي ...فتش الياس ف الدواليب الغرفة فوقية وفتح الدرج طلع كله على برا وانقلب كل اللي فوسطه... لقي دفتر شيكات قديم ب اسم الطلياني فتاكد انه وصل ... ... زاد فتش ويدور لقي خريطة متع صحراء تبع ليبيا وعلامات واشارات بعلامات اكس ... فجأة سمع صوت موطوات وصوت شباب مديرين دوشة ف الشارع مشي لروشن نحى الستار الياس وشاف لقاهم مجموعة الروك لابسين دجيليات و مدايرين شنابات وهكي ... نادى علي الياس بشوية ورد عليه - اوكي نازل غير اطلع انت من الباب الخلفي ...
* و يعاند يبي يرجع القجر ف مكانه ...
طلع علي من الباب الخلفي نزل الياس من الدروج خشوا المجموعة ...فا رجع ركب الياس لفوق لدار اللي كان فيها وحس بحد راكب فمعش عرف وين يخش ... ولبد وراء الباب ... خش شخص واتكى عالسرير و لمح الياس ودار روحه ماشافاش ... خش شخص ثاني ... اشرله ان فيه حد وراء الباب ... فاطلع سلاحه وصفر تصفيرا ركبوا المجموعة كلها اتخزرط الياس .... قاله الشخص ... اطلع من وراء الباب ويديك فوق راسك ...
طلع الياس .... وقدر بسرعة فائقة يطيحهم كلهم ويصربهم ويفك اسلحتهم ...
*نظر الشخص ل الياس ووجهوا اسلحتهم لبعض وقاله - من انت ومن باعتك ..
الياس - ماحد باعثني ... اندور ف شخص معين ...
- منو؟
الياس - شخص اسمه الطلياني ...
- اهاااااا تلياااانووو ...
الياس- ايه وين مكانه
-نعطيك مكانه لكن بشرط ...
الياس - موقف اللي انت فيه مش متع تشرط ...
- هه لو تتلفت حتلقى زوز اشخاص وراك موجهين سلاحهم
الياس - نقدر نقضي عليهم وقتي
- اسمعني لو قتلتني او قتلتهم مش حتلقى من يقولك مكان التليانو .. لان صدقني ماحدش يعرف ...
*قغد واقف يفكر فاتقدم منه شخص من وراه شدله سلاحه والثاني شد الياس والياس يعافر فيهم *
- ها شنو ... هكي اكيد حتوافق عالشرط
الياس بتعصب - شن شرطك
- شفت كفائتك ... قبل شوي وعجبتني طيحت المجموعة كلها ... فلهذا نبيك تمشي لمكان .. نبي تاخدلي منه شنطتي فيها ملف و والالماس متاعي ... فانبعثك انت تجيبه
الياس - كيف بثوثق ف شخص غريب .. فرضا ناخد الالماس ونهرب ؟
- مستحيل ...
الياس - وشن خلاك واثق هكي ...
- طل من الروشن وحتعرف ...
*تقدم الياس وطل من الروشن ولقي شخص شاد علي ورابطله يديه وخششه ف سيارة ومشت تجري السيارة .... سكر قبضة يده الياس واتكنطى ...
- عرفت علاش حنوثق فيك ... ؟
*مدله ورقة العنوان *
خداها الياس بغض ...
- عندك اليوم بطوله لو الالماس ماوصلش ... اعتبر ان صاحبك ف عداد الموتى ....
الياس - اوكي اوكي وفي المقابل بالاضافة لسلامة صاحبي نبي نعرف مكان الطلياني
حط يده الشخص على صدره وقاله - عندك كلمتي صاحبك ومكان الطلياني ....
- عندك سيارة ؟
الياس - لا .
*مدله الشخص الورقة ومفتاح وقاله - بالمناسبة شن اسمك
الياس - بيترو ...
- اوكي بيترو ... وانا سبتاقو ...اسم مستعار طبعا ....
خدي الياس المفتاح بكل غل وطلع من الحوش ويلعن ويسب ف حظه ... فتح الاارم وزوت السيارة ركب فيها وانطلق للمكان ... طلع خريطة الدليل من جيب جيبوطيه ويدور في الشارع المكتوب ف الورقة اللي عطهاله سبتاقو ...
(هذا اللي كان ناقصني مافيات اهنا... وباين عليه من لكنته روسي .. )
وبعد جهد جهيد لقي المكان ... عبارة عن منشأة عليها عزقة حراس ... اتسلل للمنشأة وكل مرة يقضي على شخص ... لين وصل للغرفة المدير .... خش وفتش لقاها الشنطة برقم سري زي المكتوب ف الورقة فتحها ولقي ملف وشنطة الالماس اللي يبيه السبتاقو .... واتسلل ثاني ورجع بيها ل سبتاقو الا ان سبتاقو ماكنش عند وعده وبعثه لمكان ثاني استغرقت العملية الثانية حوالي يوم ونص وبعدها ردله علي وقاله ع المكان عبارة يخت عالبحر ... وفباله الياس
(ان شاء الله ايكون المكان صح بس ... )
الياس - كيف صار هكي وخطفوك
علي - لما مانزلتش ... شكيت انهم حصلوا عليك .... خشيت قلت بالك نقدر نطلعك وشدوني وقتي ....
الياس - الحمدلله انها عدت ع خير
أنت تقرأ
مهمات سرية ( روايات ليبية )
Romansaعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
