مهمات سرية ( روايات ليبية )

حلقة 8🔥

مهمات سرية ج 2 الحلقة الثامنة ...

الياس ل الحارس - به زيد تأكد عندي حتى دعوة ب اسمي ...
الحارس - اي شخص يقدر يطبع دعوة اما الاسامي اللي ف الايباد هيا اللي ناخدوا عليها ....
الحارس2 - شيك مرة ثانية
الياس   - اوك
بربش الحارس ف الشاشة والياس يشوف لوجه علامات الحارس ... وحس انه كمين ... وحتى لو ان علي برا العدد الحرس اللي برا واللي داخل يفوق عدد علي وجماعته بعشرة مرات يعني كون علي بيتغلب عليهم فهي من سابع المستحيلات .... قام راسه الحارس وتلفت لصاحبه وحطوا يديهم ع سلاحاتهم ... قام حواجبه الياس وقالهم - تو من كل عقلكم بنجي اهنا من غير مانكون مدعو .... بالعقل شوف الحرس والاليات الثقيلة اللي برا ...
طلع واحد من داخل وقال - خير شن فيه ؟
تلفت الياس لصاحب الصوت وقال - واحد جاي وعنده مية حاجة وحاجة وسفريات قطعناها ومفضيين حالنا للاجتماع والبشاوات مايبوش يخلوني نخش
حارس 1 - يااستاذ صابر ... اسمه مش مدروج ف القائمة ...
صابر    - زيد شيك مرات الايباد يخرط
حارس  - اوك ... اوك ... برغم عارف مش حنلقاه

نيسان - تم اندرج الاسم
صلاح - ياسلام عليك

صابر   - ها شنو
حارس - ايه اهواه لقيته رائف الكفتاجي ... الاسم الحركي الباتشي ...
صابر   - اووو الباتشي .... واخيرا شفناك ... خش خش واعذرنا عاللي صار  ... كانك مسلح نحي سلاحك لانه حياشر عالباب
الياس - لا مش مسلح
شاف الياس شبحة شينة للحارس وبطم بكمة جاكيت وخش مع صابر وقعمز ف طاولة بروحه وحط رجل ع رجل جاه قرسون وسئله - شن تحب تشرب .... ويسكي.. فودكا.. شامبينيا ابسليوت ؟
الياس - عصير تفاح لو عندك
قرسون - اوك ثواني ويكون عندك ...

*دار مسح شامل للقاعة بعيونه ويشوف ف اللي مقعمزين ...

<><><>
سعد - هاااا شوف والنبي المزز شوف ... روسية الزفت مش زي الصفر اللي عندنا
(مصح وجهك ياسعد ... )
رامي  - حي علمها حيه ... تقتل وين طحت فيها
(اشي هذا اللي بيخطب )
وحيد - نبي نشوف ... حي عالجو منزلة فيديو
(هه وهذا الخاطب زعميتك )
سعد  - هات ورينا
هيثم  - تدلع مليح الدعوة
(هذا العاقل ع اساس )
علي  - هات هات نبي نشوف حتى انا
(حي عليه حتى المتزوج بيكحل)
الياس عبر بلوثو بالهمس - راكم تستحوا يلي ماتتحشموش ...
علي  - هههههه حي ياشباب نسيت الياس عالخط اسكتوا ...

قعد الياس يراقب والكل يشرب ويهدرز ولع دخانه الفاخر وينفث فيه ومتوتر من عدد الاشخاص تبع المفايات... جي القرسون بالعصير ومعاه منديل... حطهم عالطاولة ل الياس.... وقاله - هذا عطاهولك شخص ... جاني من باب المطبخ ...
الياس - من هوا
القرسون - مانعرفاش ... عطاني البيرو هذا و عطاني قرشين وقالي وصله لصاحب الصورة
الياس - اوك مشكور ...
*مشي القرسون تلفت الياس يمين يسار وخدي البيرو حس انه مش طبيعي ان حد يعطيه بيرو .... نزله لتحت وفتحه ولقي ورقة ملفوفة لف فتحها ...ولقي مكتوب فيها ... ل.ي. كنت عارف انك حتجي ... المهم اتوجه للحمام الرجالي ... الحمام رقم 3 ... افتح مطبق السيفون وحتلقى حاجة حتفيدك .. اطمن انا معاك مش ضدك ...
(تي مني هذا نموت ونعرف منووو ..لحظة لحظة الجملة هادي مكررة ... اطمن انا معاك مش ضدك .... اهااااا هذا اللي جي طلعني من عند اللي خطفني يومها .... زعما هذا اللفعة يقدم ف مساعدات هكي ؟؟  ... خلي نمشي فيسع نشوف شن فيه من الحمام ...  )
*طفى الياس دخانه وحط الورقة والبيرو ف جيبه .. وناض مبتسم ومشي للحمام الرجالي زي مامكتوب ف الورقة ... و خش لرقم 3 وسكر الباب ... وفتح السيفون ... لقي كيسة نايلون محكمة الاغلاق ضد الماء .... فتحها لقي فوسطها نظارة طبية و مسدس بحجم صغير جدا وموس صغيرون جدا ... حط المسدس ف خسره ونزل الجاكيت والموس ف شخشيره وشاف لنظارة عرفها نظارة مراقبة ...  رص بطمة صغييرة جدا من الجنب ماتبانش الا بتركيز بشكل كبير ...  لبسها وحسها عادية ... طلع تاني ورجع لقاعة الاجتماعات   *
<><><>