الجزء التالث مهمات سرية الحلقة 1
ملخص عن الجزء الثاني
حسن وضاوي الزوز ماتوا .. والياس خدي مقر حسن ويمى نفسه الذيب وقضي على عدة منضمات ...
ياسين اتوفى غرر بيه الطلياني ...
الطلياني خدي الذهب وهرب والياس قاعد يسعى وراه من اجل ينتقم لبوه وخوه ...
الياس ماشي بيهد على ال اكس كاتصفية حسابات عاللي داره فيه فيما سبق ...
مي انخطفت
انتهى الملخص ..
مصعب - هي شنو ذيب على منو بنهدو
الياس - شخص المفروض هديت عليه ليا ايام غير هذا وين فضيتله .... اركب سياراتك انت وياه فيسع 👏👏
<><><>
طلعت مي من الدار واذا به تسمع ف هدة باب وامها اتصيح بعدين صوتها اختفي .... طلعت تجري لقت الشقة متروسة اشخاص وامها مقيومة على كتف شخص .... ومشتله تجري ب تفك امها منه ضربوها على راسها ادروخت وقاموها .
<><><<
عفاف - زينة حبيبتي ....
زينة - هاه..
عفاف - نوضي كولي حاجة .... مش باهي هكي تقعدي بلا ماكلة
زينة - مش خاطري ف شي
عفاف - اصبري واحتسبي ... وتو ربي يجعلك من ضيقك مخرج ..
زينة - يارب
عفاف - خلاص امسحي دموعك وادعيله بالرحمة
زينة - كيف تبيني نمسح دموعي ... الدمع مانشف من عيني ... نبكي على خوي اللي راح وضاع وهوا صغير ... والا نبكي على خوي التاني اللي وقت شفته لا عرفت نقدم نسلم عليه لا عرفت نتكلم... قعدت واقفة متمسرة ف مكاني والصدمة واكلتني ماكلة ... والا نبكي على امي اللي مش راضية تسامحه على ذنب مش بيده ... تسامحه وتخلينا نعيشو زي العالم والناس ويكون عندنا خو سند وظهر .... ااااخ اااخ والا نبكي على نفسي اللي كان عرسي بعد اسبوع .... ااااااه ااااه خليني ياعفاف قلبي معبي ... معبي وحق ربي
طبطبت عفاف على كتف زينة ومسحت دمعتها وقتلها - بكيتيني معاك يازينة ....ربي يصبرنا وخلاص .... معليشي الياس قلبه طيب انا متأكدة انه حيجي ثاني ... وبالنسبة لعرسك ... فترة حزن واتزول وربي ايفرحك ....
زينة - ان شاء الله خير وخلاص
عفاف - حتى فرح ياناري قريب تهبل ... بتطير ع ياسين ..اتهسرت وتدوي وتضحك وتعيط كله في وقت واحد ...
زينة - ياناري
عفاف - حسيتها اتقول جتها حالة نفسية ... وفوق منها قعدت لا ماكلة لا شراب لين طاحت علينا ...
زينة - رفعتوها للمستشفى
عفاف - ايه امس رفعها بوي ف عز الليل ... دارولها ابرة تغدية وعطوها ادوية
زينة - اخ اخ ... الله يرحمك يا ياسين ... الله يرحمك
عفاف - الله يرحمه ... بنسئلك زينة ...
زينة - هاه
عفاف - علاش مادوريش رقم الياس ... واتكلميه
زينة - كيف بندوره والا وين بنلقاه بالك حتى سافر زي العادة ....
عفاف - ربي يلم شملكم تاني يارب ...
<><><>
*وصل الياس للمكان اللي يبيه وخش للمقر وشاد مسدسين ف يديه كل مايطلعله واحد من تركينة يطلق عليه من غير حتى مايتلفت .... وطوقوا المكان تطوييق تام بالمجموعة اللي عنده ... وكان المقر شبه فيه نص مجموعة ال اكس لان النص الثاني وييين؟ اكيد مشوا بش يخطفوا مي .... خش الياس ل مكتب ال اكس ولقي سمير ... انخلع سمير من الياس ونظراته وكأنه اسد الغابة .... تقدم الياس .... ومصعب ووليد شدو سمير ... من يديه الزوز ... جي قدامه الياس وابتسم وقاله - شايف الدنيا قداش صغيرة .... الشدة هادي كنت شادهالي انت وجماعتك يومها ...
وكيف بيتكلم سمير عطاه الياس شلبوخ على وجهه ... بيتكلم تاني زاده كف تاني لين نظارته طاروا بعيد .... وزاد عطاه بونية على خشمه وفمه لين سال الدم من فم سمير ...
سمير - شن تبي ياهنقر
مصعب ضرب سمير على راسه وقاله - قوله الافندي ياحمار ....
سمير - والله صار منك ووليت افندي ... قتلت الكابو وخديت مكانه صحة ليك
جبد الياس الكرسي تبع ال اكس وقعمز وقام رجليه عالطاولة وولع دخانه وقاله - ربما سيدك قتله ياكلب ...
قلب عيونه سمير مش عاجباته الدوة ....
الياس - وينه سي البي؟
سكت سمير وقاله - حيقتلك ويشرب من دمك
شاور الياس ل مصعب وفهم مصعب وربط سمير ودارله لصقة ع فمه .... فتح الياس الاب توب تبع ال اكس ولقاه بكلمة سر بالبصمة ....
الياس - تعال ابصم
سمير هز راسه لالالا
نحاله اللصقة مصعب وقال - هادي ببصمة ال اكس بس مايخلي حد يجي جيهته
الياس - ونستنو ال اكس شن ورانا ...
تلفت عالجنب لقي نفس الصندوق تبع الابر اللي يومها ضربله منهم سمير .... فتحه ولقاه معبي
الياس - مصعب ... زود اضربله يبرة ترفعه لعالم الاحلام
سمير - لالالا تربح هنقر تربح ... قصدي افندي هنقر بالله عليك لا ... عارفك انت مش هكي
الياس - هههه من قالك؟
سمير - هكي حاس
الياس - لا احساسك غلط ... انا هكي ونص 😉
فتح مصعب الصندوق وشد وليد سمير وضربوا الابر ل سمير والياس ينفث ف دخانه وقاله - مافيش احسن من المعاملة بالمثل جو انكون احسن منك بطلناه من زمان ... ذوق وجرب وحس باللي حسيته ....
جي اتصال ل وليد
وليد - شوي افندي بنرد ...
*اشرله بصبعه الياس وطلع وليد وسكر الباب .... تلفت الياس يتفقد في الغرفة وكان فيه باب بي في سي مايبانش كويس موجود في الغرفة وكيف بيقول ل مصعب ... شوفه انفتح هالباب وطلع ال اكس من هالباب هوا وواحدة .... ماتوقعش الياس ان ال اكس يتواجد اهنا طول هالمدة .... اندهش ال اكس من وجود الياس .... وطلع سلاحه وكان الياس اسرع منه ضربه رصاصة ف كتفه ف افلت سلاحه متألم تلفن لسمير لقاه عايش السبهللة في عالم وردي فانظر للياس وقاله بكل غيض - هنقرررررررر شن ادير اهنا
الياس - الدنيا ياداير يالاقي ...
*شده مصعب و دفه دفة قوية لين جي تحت رجلين الياس ...
ال اكس - اقتلني ياهنقر ... اقتلني ...
الياس - لا وين نقتلك ... الحفلة قاعدة ف اولها ... تعال ابصم
ال اكس - لا .
*وبدون مايتكلم الياس اكتفى بنظرة لمصعب بس ... اتقدم مصعب وطلع موس من جيبه وفتحه وفرد يد ال اكس عالمكتب وال اكس يصيح لالالا ... قص مصعب صبع ال اكس وال اكس يصيح ويعيط زي الولية ... مد مصعب الصبع ل الياس ... بصم بيه ل الياس عالاب توب ولوحله صبعه ....
ال اكس - قسمآ حتندم ياهنقر .... حتندم ....
*بربش الياس ونسخ الملفات كلهم للفلاش تبعه وجميع الصور والفيديوهات والفضائح تبع الملهى الليلي للعصابات والمافيات
ورد عليه بتلاهي وهوا يبربش ف الاب - لا مش حنندم صدقني ...
*وفك الفلاش وحطه ف جيب الجيبوطي ... وخدي شيشة الميا وصبها عالاب ...*
ال اكس - حتندم .... بعتت احنك رجالي الا وهوا الزيرو ... هه
الياس - ابعثه وين ماتبي شن دخلي انا
مسح ال اكس الدم السايل من فمه بكل غضب قال - مرتك في قبضتي ..... قسمآ حنخلي كل شباب المقر يتلاقوا عليها بالدور هاهاها ....
مصعب - 😳
أنت تقرأ
مهمات سرية ( روايات ليبية )
Lãng mạnعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
