مهمات سرية ( روايات ليبية )

حلقة 8🔥

مهمات سرية ...الحلقة الثامنة ...

كيف بيطلع سمع تلفونه يأشر مافيشي شحن ... واهنا رجع وخداه  وقرب من البريزا اللي بجنب راس مي وسل خيط الشحن بشوية  وتلفت بش بيكمل طريقه ... وهوا اتلفت من اهنا...شدتله مي طرف الفوطة تبعه وقالت - استنى ماتمشيش .... خليك معاي 😔
إلياس - 😳😳😳😳😳😳😳
(حسها طاحت المنجوهة شبحت عضلاتي ماقدرتش تقاوم ههههاااااي مكنسة حرشة مايطلع منها)
*لفت إلياس راسه بشوية لجيهة مي .... لقاها مغمضة عيونها وشادة ف الفوطة وتردد ف كلمات نفسهم ....
مي  - حمدي حم  مدي ...ماتخلينيش ي يمة كلميه يق يقعد
(ياسلام حمدي وحالات هههههه شن هالحب المقطع بعضه)
حط صبعه ع خشمه غير صوته وقالها   - حمدي مشي يابنتي خلاص
مي    - م مانبيش نتزوج مجرم
إلياس - الله غالب تزوجتيه توا خلاص طاح الفاس ف الراس يابنيتي
مي    - مممابيش ل ل لا ممشناه
إلياس - لالا انتي مكينسة حريشا سلم بنتي وماتستاهليشي لياس

*ضحك الياس وغم ضحكته حس منظرها مضحك ....نحالها يدها بشوية شدتله يده وضغطت عليها ... للحظات حس بدفى يديها ... او انهم حرارتهم مرتفعة ..... وبدت تهلوس بكلمات مش مفهومة
(الباين انها ماتحلمش... هادي اتهلوس بحرارتها  )
*فك ايده من ايدها بشوية .... وحط يده ع راسها لقي حرارتها نااار ... وجبهتها متعرقة وتخرتف بكلام مش مفهوم...خدي حاجاته ومشي لبس ف الدار التانية سروال توتة وتيشيرت ومشي ل عيشة ... طقطق مرة واتنين وتلاتة وشي مافاقتش مايسمع غير ف شخيرها طالع لممر
( المفروض اتنوض شن هالنوم الثقيل هدا .... خلي نطقطق عليها تاني ........اياح عاد نفتح الباب وخلاص ونغمض عيوني
إلياس - عيشة ....عيشة .... تي شن هالنوم الرزين هذا ....عيييشةةةة
بنتك بتموت يادعوة ....
شن هالهم هذا اللي تحصل فيه دبرله ... شن طريقة تنزل بيها الحرارة .... خلي نتصل ب علي بالك يعرف
*رجع تاني لدار وخدي تلفون واتصل - ايوه علي .... اسمع شن طريقة تنزل بيها الحرارة ؟؟؟
علي    - شن حرراتك ركبت
إلياس - لالا غير قول هيا
علي   - دير ليمة مشوية حطها ع راسك ... بردها قبل شوية وحطها
وعندك طريقة تانية ندير فيها لعبودي ولدي .... شرايح بصل ف شخشير والبسه ايخفض الحرارة مية مية
الياس - به صحيت سلام
(هوا واحدة من اتنين يانخليها اتموت يانديرلها الوصفات هادي ... خليها اتموت خير اهو اقلها نفتك منها ومانكونش قتلتها ...لكن بتموت من حرارة ؟؟؟ اي عادي مرات راسها يتفجر من الحرارة .... استغفر الله العلي العظيم البنوت نكره جد عمهم دوشتهم هلبا واللي تحصل فيه دبرله )
*واهنا قعد واقف إلياس ف الممر ... حاط يد ف وسطه واليد الثانية على ذقنه وايفكر .... واطر وكله اطرار انه يديرلها الوصفات اللي قال عليهم علي .... نزل للمطبخ و دار ليمة مشوية وشرايح بصل وركب تاني .... فتح الدرج وطلع شخشير جديد وحطلها البصلات ف الشخشير وقعد يشوفلها ومش عارف كيف بيقرب منها ..... اتقدم وقعمز ولبسهولها وهيا لازالت اتخترف... حط الليمة ع جبهتها .... ووسالها شعرها المكنكش .. وقعمز عالكرسي قبالتها ويستنى .... ويسمع ف تهلويسها
- نكرهه انا ...كلب ... حمدي خودني معاك .... امي ... حرام هكي ... محل اهنا ....
*حط ايده ع ذقنه وقعد يشوفلها .... ويركز ف ملامحها اول مرة يركز فيها بطريقة هادي .... بعد تلث ساعة حط يده ع جبهتها لقي الحرارة بادية تنزل .... سكتت مي من هلوساتها ... فاطلع ومشي لدار الثانية اتكى وخداه النوم ...