مهمات سرية .. الحلقة الرابعة عشر
ضاوي - اصبر الا ماتخش لزنقة ..
*ظل وراها ضاوي وحسن الى ان خشت لزنقة وبتمشي للمحل .... نزل ضاوي وحسن وقفوا قدامها وبسلاحاتهم
ابتسام - ش ش شنو فيه
ضاوي - سلامتك ياعسل
*شدها من يدها صيحت ابتسام .... ضربها حسن ع راسها ادروخت وحطوها ف السيارة من الخلف وركبوا وسكروا البيبان وهربوا بيها
<><><>
علي - ياسر من التبكبيك
رامي - مقهور ياعلي مش قادر حتى نشوف ف وجه البوس ... حاسه متكنطي مني لين قريب ياكلني
علي - طول عمري نقول عليك نبيه لكن ياودي انكان البوس انشد او صارتله حاجة ماتلوم الا نفسك هذا صاحبي الوحيد تعرف شن معنى الوحيد يعني من كنا ف الثانوي واحنا صحاب شوف كم سنة
رامي يبكي - عارف والله عارف ماتزيدنيش على مابيا ... والله قريب ناخد سلاح ونقتل روحي وانفكم ونفتك ..حسبي الله ونعم الوكيل فيك ياابتسام
علي - تو شن دخل ابتسام
رامي - كانت مهونة عليا همي لكن باعتني بولد خالتها
<><><>
مي - يمة ..... عيشةةة ... اعويشة ... وين مشت هادي ؟؟ يماااا .... زعما ف الحمام ! تره .... الحمام فاضي ! هكي تطلع وتخليني ...
{زعما لياس طلع ... اكيد طلع مايقعدش لهلوقت ساعة 12 .. ملل رهيب ياربي كسااااد ... خلي انطيب نشغل وقتي ... زعما شن نطيب ندير مكرونة مسقية عالسريع وخلاص }
<><><>
الياس - كيف الراي ياعلي ... مش قادر نبطل تفكير ف الاب توب
علي - ان شاء الله مافيه شي
الياس - دسه عندك هالبلوة رامي ماتخليشي يطلع بكل حتى لو اطريت انك تحبسه
علي - اطمن كون هاني .. كيف حال عروستك
الياس - ماعندي عرايس ... والباين قريب تربط اني مش سفاح
علي - كيف صار
الياس - ماتوقعتهاش ذكية واتفكر ... امس قعدت تحط ف الكلام ورا بعضه لين سكتت وتوصلت لنتيجة ان انا مش قاتل ... قعدت اتقولي انت منو واعطيني اجابة
علي - اووف توها بالكلام
الياس - وهذا اللي درته ....
<><><>
ضاوي - محلاها اول مرة ننفتن ببنت هكي
حسن - هههههه حب من اول نظرة
ضاوي - ايه خليها تو اتفيق قبل وبعدين نسئلها
حسن - به .... تعرف خايف من الروس ياضاوي
ضاوي - عالشنطة او
حسن - ايه ..
ضاوي - تو نلقوها يابرادر اطمن
حسن - ان شاء الله
{انا وين ... حيه عليا حيه خطفوني نهاري اسود ... نهار احرف كيف اندير }
ابتسام تخبط عالباب - طلعوووني من اهناااا حرام عليييييكم
ضاوي - اهلااا اهي فاقت العسولة
حسن - خلينا حاجة اه هههههه
ضاوي - ههه 😈😈😈
<><>>>
عيشة - الو ... لياس
الياس - نعم
عيشة - انا روحت كان انت داخل افتحلي
الياس - مازال شوي ... ديري دورة ف المحلات مابين جيت ... مش معطل ... اوك سلام
علي - قاعد ع اعصابي ياراجل
الياس - زعما نمشيله الكابو
علي - حيشك فيك ضاوي ...
الياس - والله ماعارف كيف بنتصرف ..... الكابو يتصل ... الو
حسن - تعال هنقر نبي نبعتك
الياس - لوين
حسن - تعال هي نستنى فيك
الياس - اوك ف طريقي ليك ..
علي - ها شنو منو
الياس - يستر الله قالي نبيك ... خلي نمخطم ع عيشة نفتحلها الباب و نمشيله
علي - رد بالد ع روحك ...
الياس - ان شاء الله خير
أنت تقرأ
مهمات سرية ( روايات ليبية )
Romanceعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
