مهمات سرية 💣 الجزء الثاني الحلقة الرابعة
طلعت مي لوسط الحوش وسكرت الباب على امها ... ودارت جولة سريعة ف الحوش .... ومشت لدار الياس واتبيت عليه ... لقاته يتلفت يمين يسار ومتشنج يخض كله مع بعضه .... خشتله وقعدت تشوفله ... فتح عينه ولقاها بجنبه ... شبحتله وشبحلها يشوف فيها سمير ...جبدها ليه بكل قوة لدرجة ان يدها اتشكلت .... قلبها وجي فوق منها و وحط يديه على رقبتها بيخنقها ومي عيونها مفتوحات عالاخير ... ونفسها بيهرب منها .... وتفرفش وتمد ف يدها تبي توصل للأبجورة (سهارة) اللي فوق الكمدينو وماقدرتش توصلها....
مي - ل ل لياس ... لياس
*مع مناداتها ليه معش فهم شي .. الصوت صوت مي والشكل شكل سمير .... خفف شوي من شدة يديه ع رقبتها
وقعد زي المتردد ... دفاته مي... شدها تاني من يدها وتبتها عالسرير ويشوفلها وهيا اتشوفله وتبكي وبصوت مخنوق قتله - اقتلني لياس ... اقتلني اقتلنييييي فديت من حياتي معاك بشكل هذا ...
*تنحت صورة سمير من مخيلة الياس .... ورخاها وبعد عنها ووقف ووخر وهوا شاد راسه والدمعة ف عينه .... وشد وذانه ويسكر فيهم وكأنه يسمع ف اصوات جنبه ... ويتلفت يمين ويسار وكان فيه من ايكلم فيه ... قعدت تشوفله مي وجعها نوعا ما وحست ان كلام علي حقاني .... الياس القاسي المتعصب الذيب ظهرلها بشكل ثاني ... خايف ومتوتر ومتشنج ف مكانه ...
طاح الياس ع ركبيه ويصيح بصوت عالي .....
خافت مي ... ووقفت ... فتحت الباب وبتطلع ... لكن تأنيب ضميرها خلاها ترجع ....
{ياساتر يارب .. حنساعده ... فقط لانه وجعني ... برغم اللي داره فيا لكن انا خير منه ...
.. اذكري يامي اذكري شن قال الدكتور فيل ف برنامجه ياربي اذكري اه ايوه الاحتواء ... ايه والعطف على المريض بش يقدر يتخلص من محنته ... وشن تااااني ويبي شوية حنية .... ربي يسلم وخلاص كما يقتلني ....}
واقف الياس ف مكانه ويلهث قربت منه مي ... شدتله يده بشوية وحطتها بين راحات يديها .... تلفتلها للحظة بيجبد يده بس تكلمت وقتله - الياس .. هدي اوكي ... كل شي حيكون بخير .... تعال معاي ...
*قعد للحظات يشوفلها وعيونه حمر ايخوفوا .... كررت جملتها لياس انا بجنبك اوكي ... خلاص هدي ...
خداته بشوي وقعمزاته عالسرير
لياس بنبرة تردد ومشاعر مختلطة ويقاوم ف الاصوات اللي يسمع فيها - م معليشي قريب خنقتك ... بس انا تعبان مش مني ..
حطت مي سبابة على فمه وقتله - اشششش خلاص لياس اتكى توا عالسرير ...
*طاوعها الياس واتكى طلعت لوسط الحوش جابت الكيسة وتقرا ف الادوية ... معش عرفت ايهم تعطيه الاول ... قرت شوي وفهمت منه ... سحبتله بالشرنقة الجرعة المحددة ... وجت قعمزت جنبه ... ف هاللحظة كان مغمض عيونه ... خدتله يده تلفتلها على طول .... وشدلها يدها وعصرها .. تألمت مي وقتله - يدي لياس ... انا مي ... رخالها يدها بشوي ... بزتله اليبرا ... وحطتله الحبة ف فمه ... وشرباته اميا ....
رجع حط راسه عالمخدة وشافلها وابتسملها ابتسامة خفيفة ... وخداه النوم مجددا من كثر ان المنوم مازال ماثر فيه ... خدت نفس عميق مي ووقفت بتطلع ....
{يوم ماكنت مريضة قعمز قبالتي نذكر فيها برغم كنت نخترف بالحرارة متاعي ... به نقعمز جنبه ربع ساعة القدام بالك ينوض . }
وقعمزت عالكرسي قبالته ... وفاتت الربع ساعة ومشت فيها نومة ...
أنت تقرأ
مهمات سرية ( روايات ليبية )
Romanceعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
