الحلقة العاشرة
شدها الياس من مرفقها وسندها عالحيط وهوا يلهث
الياس - هولااا سنيوريتا ....
طلعت مراة من باب حوشها وقالت -
اوه لوزيتا ؟
*تلفت الياس للمراة .... انتهزت لوزيتا الفرصة وطلعت صاعق من جيب جيبوطيها وصعقت بيه الياس ف رقبته اتشنج الياس وطاح فاتح عيونه فقالت لوزيتا - اديوس ستيوبيدا
وهربت لوزيتا تجري ... هزبت المراة الياس بالاسباني وخشت لحوشها ... بعد عدة دقائق ... قدر يتحرك الياس وقف وشد راسه مدروخ ... ونفض حوايجه وحاول يذكر طريق الفندق ورجع لقي مي و علي مقعمزين ف صالة الاستقبال ... ومن اول ماشافه علي ناض من مكانه وقاله - وين ياراجل ... وين مشيت تجري ورا البنت ...
الياس - بعثني ليها المجهول ... قالي من اول ماتوصل ل الفندق ... شوف لشارع الفندق محل ورد ... وبصدفة طلعت البنت هادي ... بنفس مواصفات علي بعثهالي المحهول .
علي - به شن تبي فيها ؟
سرح الياس وقال - خلي بعديين تو نرجعلها ...
*ومشي لشنطة يده الصغيرة خدي منها الجوازات وخدي من علي جوازه.. وكلم الريسبشن وعطاته الانسة مفاتيح الغرف ووقفوا قدام المصعد
مي - خلي نركب بالدروج
الياس - خشي الدور تبعنا بعيد ..
مي - نخاف انا
الياش - 😬
*خشت مي وركبوا ف المصعد ... وخيا شادة طرف جاكيت الياس من الخلف ....
توقف علي ف طابق الاول وطلع
علي - نتلاقوا بعدين ...
الياس - اوكين ...
رص بطمة وبيكمل لدور اللي يبيه ...
الياس - ارخيني ...
مي - نخاف الياس من المصاعد ...
الياس - بلا تزعبين على حد قولك ان كل حياتك ف الفنادق
مي - والله خايفة يالياس ... مانركبش فيهم المصاعد بكل
*وفجأة توقف المصعد .... يرص الياس ف البطمة شي ماباش يتحرك ... بكت مي واضبطاته بالقوة وقتله - بنموتوا يالياس ..بنموتوا
الياس - ماتخافيش ... تي حولي يامنجوهة ... تو ينفتح الباب ف اي لحظة
و مي مكرشة فيه بكل قوة ... *
الياس - الصبر ياربي الصبر
مي - الياس نبيك تعرف قبل مانموت اني ماخنتكش ... مهند كان....
الياس - اص اص اخر حاجة نبي نسمعها هوا موضوعك ...
تحرك الياس ومي شادة فيه ... فجأة هبط المصعد لتحت ومي تبكي وقتله - يارب سامحني يارب ... الباين ان اليوم اخر يوم ليا ... الياس انا عشت معاك ايام حلوة برغم مرها ..... حي عليا معش بنشوف امي
*وبين كل جملة وحملة كانت تبكي بحرارة *
الياس - تيييي حووولي المصعد بينزل لتحت اتوماتيكي .... شن ماتعرفيهاش الحاجة هادي
مي - وووووووه عليا بينزل لتحت مش فطابق الاول بينزل لرفودجو ونتعفزو ونموووتوووو انا وياك ووووه محرها ياربي محرها
الياس - هه هههههههه مأثرين عليك الافلام يابنتي
مي - اشهد ان لا اله الا الله واشهد ان محمدآ رسول الله....
*وقف المصعد ومي شادة فيه وتولول حاول انه ينحيها ماقدرش ... لين انفتح باب المصعد وكانوا فرق صيانة واقفين قدام الباب ...
قتحت عيونها مي ورخت الياس ووجها احمر .... مسحت دموعها شافت ل الياس عطاها تفنيصة لا صارت ولا استوت .... وخود المصعد الثاني
الياس - حشمتينا ...
مي - خفت ..مش عارفة شن صارلي ... بعدين .... بعدين هما اجانب مايعدلوش ...
*اتنهد الياس وفات الموضوع ... ووصلوا لدور اللي يبوه فتح الباب خشت مي منبهرة بجمال الغرفة وتتكلم بروحها فرحانة بغرفتها الواسعة ... خشش الياس شناطيه وخدي نفس عميق ونحى يبوطيه ....
طلعت مي من بلكونة وانصدمت ... لقاته ممتد عالسرير
مي - قصدك ااا؟
غمض عيونه وحط يديه تحت راسه وقالها - ايه ... كان ماتبيش ارقدي لوطة عالوطا
مي -شوية ذوق المفروض انت ترقد تحت
فتح عين وشافلها - هه ماقتلكش اجباري ارقدي لوطة قتل كان ماتبيش ... يعني خيرتك واختاري ..
اتنرفزت مي - احنا من قبل ماتشاركناش سرير واحد .. وتوا ف هالضروف الراهنة بيني وبينك بنرقدوا ع سرير واحد...
ابتسم ابتسامة تهكم ورد عليها - عندك حق .. هيا غلطتي انا ... المفروض شكمت القطوس من اول ليلة
فتحت عيونها مي وسكتت لو بتزيد بتناقش حتستفزه وحيعصب ...فانحت وشاحها وكبوطها ومرتهم عالكرسي وفتحت شنطتها وستفت ملابسها ف الدولاب عسريع ... وخدت بيجامة وخشت بدوش ... نحى كندرته الياس واتكى كويس وخداه النوم ... طلعت مي من الحمام ... وحست بالتعب من الرحلة الطويلة ... واترددت في انها تخش لسرير ...
{ تو معقولة بنرقد معاه هذا المجنون ... بالك ينوض يلقاني بحداه يعطيني تيرو يلصقني ع حيط البلكونة .... لكن مافيش وين بنرقد .. يااما عالكرسي ياما عالارض والارضية رخام مصقع .... }
*حزمت امرها مي ونحت ...نحت الغطاء وخشت بشوي لسرير ... وغطت الياس بالمرة ... ومشت فيها نومة هيا وياه قريب ثلاث ساعات اتكركبت مي بجنب الياس حس بيده منملة ... فتح عيونه لقاها حاطة راسها على ذراعه الممدودة ... دفها بشوي زادت تكركب وخشت ف حضنه ..
(شن البنت هادي ؟انا كان حد مسني بصبعه انفيق يبالك ايدفوني ! بالله زي امها نومها ثقيل ... )
*وزادت حطت يدها ع صدره .. قعد يشوف لملامحها ويتأمل فيها .... و ضمها ليه بشوي بشوي *
فا همهمت ف الحلم تبعهت - م ... محلاه الياس المنظر ...
ابتسم ومسد على شعرها بشوي وقعد يشوفلها
(شعرها هكي خير واحلى ... خير من كان مكنكش ..
*واذكر اخؤ موقف فبعدها عنه وناض وقف
(خاطري نصدقك مي انك مظلومة ... لكن مش قادر ... مش قادر )
أنت تقرأ
مهمات سرية ( روايات ليبية )
Romanceعلاقة حب تنشي في حادتة غريبة و خطيرة قصة ليبية تجمع بين التشويق و الحب و الاتارة و الغموض تعتبر من روائع الروايات الليبية للكاتبة : لوزة
