#قصص_الأنبياء
#الحلقة_السادسة
#قصة_نوح_(١)
وقفنا المرة إللي فاتت على موت إدريس عليه السلام وإنه كان بيدعو الناس لعبادة ربنا ويذكرهم دايما بالله وإنه أول من جاهد في سبيل الله،
بعد موت إدريس عليه السلام ، كل البشر كانوا على التوحيد يعني كانوا عارفين إن ربنا هو الإله الخالق الرازق ملوش أي شريك وإن مفيش إله يعبدوه غيره وإن في جنة وفي نار 👌
كان عندهم معاصي منتشرة بينهم وظهر الفساد وابتعدوا عن الشرع ...لكن مكنش في شرك بالله في الأرض نهائي،
في وسط المعاصي والفساد ده كان في بعض الصالحين،
وكان الناس بيحبوهم بس مش بيقلدوهم،
يعني زي الناس إللي في زمانا دلوقتي يقولولك إحنا بنحب الدين والمشايخ والعلماء بس من بعيد من غير يعملوا زي ما بيقولوا😅
المهم الصالحين دول كانوا بيأمروا الناس بالمعروف وينهوهم عن المنكر وكان ليهم أماكن معينة بيدعو الناس فيها ،
زي تقريبا كده مجالس العلم عندنا🤔
فلما مات الصالحين الشيطان وسوس للناس إنهم يعملوا في الأماكن دي زي نُصُب تذكاري =خلينا نقول تماثيل =
ويُسموا التماثيل بأسماء الصالحين دول،
قال يعني عشان كل ما يعدوا من أمام التماثيل دي يفتكروا
الصالحين وأيامهم فيتشجعوا للعبادة كأنهم موجودين معاهم
🙄
وفعلا صنعوا التماثيل دي....ومفيش واحد من الجيل ده عَبد التماثيل دي... كلهم كانوا عارفين قصة هؤلاء الصالحين ،
لما مات الجيل إللي كان عايش مع الصالحين وعارفين قصتهم،
وسوس الشيطان للجيل إللي بعدهم إن آباؤهم كانوا بيعبدوا التماثيل دي وكان المطر بينزل بسبب عبادتهم للتماثيل، فعبدوا التماثيل دي فعلا😑
وهنا نلاحظ إن الشيطان نفسه طويييييل😅
هو مكنش مستعجل أهم حاجة يحقق هدفه 👌
زرع بذرة في جيل وحصد الثمرة في الجيل إللي بعده،
عشان كده ربنا قالنا :
" لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ"
لو اتبعنا خطوات الشيطان إللي هي ممكن تكون حاجات مباحة أصلا هيوصل بينا الحال إننا نقع في الغلط،
بنت مثلا تشوف صورة شاب عالفيس فيشدها شكله،
فتدخل على حسابه تشوف كلامه، تتابعه وتركز معاه حبته 😞
فتكون بين نارين : إما نار الحب إللي ملهاش سبيل إنها تنطفي، أو إنها تبدأ تدخل في علاقة محرمة للأسف والله أعلم نهايتها هتكون إيه،
وقيسوا على كده...افتكري كده موقف كنتي مفكرة إن بدايته عادية وفي الآخر وقعتي في الغلط وإنتي عمرك ما تخيلتي أبدا إن الحال يوصل بيكي لكده...فخدوا بالكم من خطوات الشيطان اقطعوا الطريق عليه من الأول👌
فعَبد الناس الأصنام وكان أول مرة تُعبد الأصنام على وجه الأرض فربنا بعث أول نبي مُرسل وهو نوح عليه السلام،
وكان بين بعثته وبين موت آدم عشرة قرون يعني ألف سنة،
قال رجل : يا رسول الله: أنبي كان آدم؟
قال: نعم مُكَلّم.
قال: فكم كان بينه وبين نوح؟
قال: عشرة قرون.
