#قصص_الأنبياء
#الحلقة_السابعة_والخمسون
#مريم_زكريا_يحيى_عيسى(٧)
#عيسى(٣)
#الذين_تكلموا_في_المهد
وقفنا المرة إللي فاتت عند عيسى عليه السلام لما ربنا أنطقه عشان يدافع عن مريم عليها السلام وهو لسه طفل رضيع،
وكانت معجزة واضحة لبني إسرائيل،
مش يعتذروا لمريم عليها السلام ويقولوا آمنا وحقك علينا والكلام ده ..لأ ده كذبوهاوقالوا لها إنها بغي، وكانوا بيسموا عيسى عليه السلام ابن البغي😑
☆شوفوا ..على مكانة مريم عليها السلام وقدرها عند ربنا لدرجة إنها المرأة الوحيدة إللي ربنا ذكر اسمها في القرآن،
ومع ذلك بتتعرض للإهانة والقذف من قومها إللي كانوا لسه بيمدحوها ومعترفين بفضلها،
فدي رسالة من ربنا لكل واحد فينا بإننا مهما بلغنا من التقوى والعفاف وحسن الخلق فمش هنسلم من كلام الناس،
هتلاقي إللي مستني الفرصة عشان يؤذيكي..هتلاقي إللي بيستفزك ويقول كلام مش فيكِ، هتلاقي...هتلاقي...
عمرك ما هتوصلي لدرجة مريم عليها السلام لأنها من الأربع نساء الكاملات ولها أفضالها،
يعني الأحسن منك والأعلى منزلة عند ربنا حصلها الإبتلاء ده ومسلمتش من كلام الناس.. إنتي بقى ياحبيبتي متوقعة إيه من الناس💁♀️
◇ممكن واحدة تقول ..طيب هو ليه ربنا بيعمل كده..ليه يعني بيسلط الناس المؤذية دي على الصالحين مش المفروض إنه يحميهم 😞
رسول الله صلى الله عليه وسلم بيقول إن أي حاجة بتصيب الإنسان من التعب أوالهم أوالحزن أوالغم أو الأذى حتى الشوكة إللي بتشك الإنسان..شكة الدبوس يعني مثلا،
كووول ده ربنا بيكفر به عن ذنوب الإنسان،
فلما تتعرضي لمواقف زي كده اعرفي إن ربنا بيكفر عنك سيئاتك إللي إنتي ناسياها...أو سيئاتك إللي تبتي منها بس توبتك مكنتش كاملة ولسه ممسحتش السيئات كلها وإنتي متعرفيش فربنا عشان بيحبك بيبتليكي باللي يكفر عنك السيئات دي 💁♀️
وممكن بقى عشان يرفع درجتك في الجنة 😉
وهقولك حاجة كمان🤫
إحنا طبعا عارفين إن من صفات أهل الجنة إنهم كاظمين للغيظ يعني بيتعصبوا وبيتضايقوا ومع ذلك بيكتموا ده ومش بيتعصبوا ولا يزعقوا ولا يتنرفزوا ،
طيب إزاي هتعرفي تكظمي غيظك ومفيش ناس مستفزة حواليكي..مفيش ناس تضايقك...مفيش ناس تحرق دمك🤷♀️
فربنا بيحط لك الناس دي في طريقك عشان تصلحي نفسك،
عشان تكتسبي صفات جديدة وتصلحي نفسك،
وتصلحي قلبك..قلبك ده إللي هيكون التذكرة إللي هتدخلي بها الجنة😉
ربنا بيقول : "يَوْمَ لَا يَنفَعُ مَالٌ وَلَا بَنُونَ*إِلَّا مَنْ أَتَى اللَّهَ بِقَلْبٍ سَلِيمٍ "
هتتعاملي مثلا مع شخص عصبي فتتعلمي بسببه الصبر،
هتتعاملي مع شخص أناني هتتعلمي بسببه الحكمة،
وقيسي بقى على كل الشخصيات والصفات،
لكن تخيلي العكس...لو الدنيا كلها تمام والناس كلهم رائعين،
هتتعلمي إزاي الحكمة في التعامل والصبر والرحمة و...و...🤷♀️
فاكرين قصة موسى والخضر 😉
بصي لكل شخص يدخل حياتك كأنه الخضر في حياة موسى عليه السلام،
ياترى هتعلم إيه من الشخص ده ..ياترى إيه الرسالة إللي هتوصلني منه...ماهو كل حاجة بتحصل بتبقى بقدر ربنا ،
يعني محدش هيؤذيكي من غير ما ربنا ما يعلم 😅
ده أصلا إللي مسلطهم عليكي عشان الأسباب إللي قلناها 😉👆
شيخ الإسلام ابن تيمية ملخص الموضوع ده كله في كلمتين👌
بيقول: إنما العباد آلة..فانظر إلى من سلطهم عليك..ولا تنظر إلى صنيعهم بك..ترتاح من الهم والغم😊
يعني بيقول البشر دول عاملين زي الآلات إللي بيحركهم ربنا فانت عشان تريح نفسك من وجع الدماغ وحرقة الدم وقهرة النفس،
متبصش هم عملوا فيك إيه ..لكن ركز وشوف مين إللي خلاهم يعملوا كده👌
شوفوا كل قصة في القرآن لها فايدة وعبرة مختلفة،
ربنا يا جماعة مش بيقول لنا القصص في القرآن للتسلية،
ده عشان نتعلم ونحولها لواقع عملي نعيشه، عشان كل واحد يركز مع نفسه ويصلحها من غير ما يقول طيب ما فلان بيعمل ولا أنا يعني إللي هصلح الكون،
أيوة مش هنقدر نصلح الكون لكن نقدر نصلح نفسنا وهو ده إللي هنتسأل عنه يوم القيامة😉
