#قصص_الأنبياء
#الحلقة_السادسة_والأربعون
#يأجوج_ومأجوج
وقفنا المرة إللي فاتت عند ذو القرنين لما بنى السد عشان يمنع يأجوج ومأجوج إنهم يفسدوا في الأرض،
ومشي ذو القرنين من عندهم وكمل رحلته،
راح فين بعد كده..الله أعلم..عاش كم سنة.. الله أعلم😅
زي ما قلنا ربنا بيقولنا القصص عشان ناخد منها العبرة ونطبقها في حياتنا😉
مين بقى يأجوج ومأجوج إللي ذو القرنين حبسهم وراء السد😁
◇يأجوج ومأجوج اسمين لقبيلتين عايشين مع بعض، وهم من نسل آدم عليه السلام وبرده من نسل نوح عليه السلام،
فاكرين لما قلنا إن البشر من أبناء نوح عليه السلام الثلاثة :
سام وحام ويافث 😉
سام وحام ذريتهم العرب واليهود..بني إسرائيل يعني😚
يافث بقى هو إللي خرج من نسله يأجوج ومأجوج👌
يعني هم من البشر عادي،
يعني لا هم جِن ولا الواحد فيهم بينام على ودن ويستغطى بالثانية ولا الخرافات إللي بتتقال عنهم دي😅
لكنهم انعزلوا عن باقي البشر فأدى انعزالهم ده إنهم يتخلفوا عن باقي البشر،
والدليل على كده إنهم عاشوا بين السدين...ومفيش لغة عندهم خالص يتفاهموا بها مع باقي الناس،
وكمان عاشوا على السرقة والقتل والنهب، يعني كل مظاهر الوحشية والإنعزال👌
ويأجوج ومأجوج غلب عليهم التناسل، يعني بيخلفوا كتير ..وعندهم أبناء كثير،
حتى ربنا هيقول لآدم عليه السلام يوم القيامة:
يا آدم أَخرج بعث النار من ذريتك يعني أهل النار ، فآدم هيسأل ربنا إزاي أطلع بعث النار..فربنا هيقول له من كل ألف ٩٩٩ في النار وواحد في الجنة👌...فالصحابة خافوا😳
وقالوا يارسول الله ومين فينا الواحد ده😥
فبشرهم رسول الله صلى الله عليه وسلم إن الواحد ده منهم والألف من يأجوج ومأجوج،
فده يدل إن يأجوج ومأجوج من ذرية آدم عليه السلام وأعدادهم كبيرة جدا،
يعني لما يخرجوا هيشربوا بحيرة طبرية كلها وهي بحيرة كبيرة على فكرة،
يعني حسب الإحصائيات فهي تكفي سكان بلاد الشام وهم حوالي ثلاثين مليون إنسان لمدة ثلاثين سنة،
فلكم إنكم تتخيلوا أعداد يأجوج ومأجوج🙊
وهم زي ما قلنا ناس كفرة ظلمة فجرة أقوياء جدا..محدش يقدر عليهم 👌
☆إيه ده😳 يعني يأجوج ومأجوج هيدخلوا النار ..طب إزاي وهم مبلغهمش رسالة الإسلام ومقفول عليهم السد😶
إحنا عارفين إن ربنا لا يُعذب أحد إلا لما يقيم عليه الحجة سواء في الدنيا عن طريق رسول أو في الآخرة عن طريق الإختبار صح😉
فأي أحد يموت ولم يبلغه دعوة الإسلام ربنا هيعامله معاملة أهل الفترة وهيمتحنه يوم القيامة زي ما قلنا قبل كده😊
يأجوج ومأجوج من أهل النار لأنهم كفار والدليل على كفرهم إنهم بعد ما يخرجوا من السد ويفسدوا في الأرض،
هيرموا بالسهام بتاعتهم ناحية السماء فهترجع السهام وعليها دم فهيقولوا قهرنا من في الأرض وعَلَوْنا من في السماء،
يعني هم عارفين إن ربنا في السماء وكفروا به أهه وقال إيه قاتلوه😶
وده يدل على إن وصلت لهم رسالة من الله سواء رسالة الإسلام ،
عن طريق رسول الله صلى الله عليه وسلم بطريقة إحنا منعرفهاش، أو رسالة من الأنبياء السابقين...فالشاهد إنهم كفروا بالله والكافر جزاؤه النار👌
