#قصص_الأنبياء
#الحلقة_الرابعة_والخمسون
#مريم_زكريا_يحيى_عيسى(٤)
#يحيى
اتكلمنا عن زكريا عليه السلام لما دعا الله إنه يرزقه بولد عشان يرث النبوة وربنا استجاب دعاؤه وحملت زوجته إشياع بيحيى عليه السلام،
ولدت إشياع يحيى عليه السلام وكان يحيى مختلف عن باقي الأطفال، لأن ربنا أعطى له الحكمة والفهم من وهو صغير ،
حتى لما كبر شوية وكان الأطفال يقولوا له تعال نلعب كان بيقول لهم إحنا متخلقناش للعب وكان يسيب اللعب ويتعبد لله،
" وَآتَيْنَاهُ الْحُكْمَ صَبِيًّا"
◇وممكن نشوف الكلام ده مع أطفال صغيرين حوالينا تلاقي البنت على صغر سنها تطلب إنها تلبس الحجاب،
وتلاقيها منها لنفسها كده متجهة لطاعة ربنا بالرغم إن إللي حواليها مش في دماغهم أصلا وكل همهم يلبسوا على الموضة ويتفسحوا ويصاحبوا و...و...
فلما تلاقي بنتك ولا أختك ولا أي طفلة ماشية في طريق ربنا شجعيها ورغبيها أكثر يمكن تشجيعك لها ده يكون سبب في ثباتها على الدين وتكون أعمالها في ميزان حسناتك بعدين😊
واوعي ..شوفي اوعي 🤐 تقولي لها يا حبيبتي إنتي لسه صغيرة ولا عاملة في نفسك كده ليه ولا أي كلام من الكلام المحبط ده😑
لو البنت رجعت عن الإلتزام في طريق ربنا وكنتي إنتي السبب هتبقى في ميزان سيئاتك😶
وأنا بقول لكم الطفل إللي بينشأ في طاعة الله من السبعة إللي ربنا بيظلهم يوم القيامة من حر الشمس لما تكون قريبة جدا من رؤوسنا ،
إنتي لو شوفتي طفلة واقفة في عز الشمس مش بتصعب عليكي، أهه يوم القيامة هيبقى أشد من حر الدنيا 😞
فخلي البنت تبني لنفسها ظل يوم القيامة 👌
فكان يحيى عليه السلام طائع لربنا من صغره وده كان بسبب إن ربنا قال له خذ الكتاب بقوة💪🏻
يعني خذ التوراة باجتهاد وبجدية ومش هتعرف تاخذها بجد واجتهاد غير لما تفهم المعنى الصحيح،
ولما تفهم المعنى الصحيح ساعتها العقيدة هتستقر عندك وتقدر تطبقها 👌
"يَا يَحْيَى خُذِ الْكِتَابَ بِقُوَّةٍ"
☆وطبعا الكلام ده لما ربنا بيقوله في القرآن فهو بيوجهه لنا💁♀️
يعني ربنا بيقول لنا خذوا القرآن بجدية..افهموه صح عشان تعرفوا تطبقوه..لما ربنا يقول وأطيعوا الله والرسول..يبقى تاخدي الموضوع بجد وتطيعي الله ورسوله،
مش يبقى على حسب ظروفك ومزاجك 😕
يعني تقولي والله أنا هطيع ربنا وأصلي وأقرأ قرآن وأصوم وأزكي..لكن لما حد ييجي يقولك حاجة تخالف مزاجك زي مثلا لو واحدة قالت لك يا حبيبتي مينفعش تنزلي صورك عالفيس الرجال يشوفوها حتى لو كنتي منتقبة،
تقولي ليه..وعشان إيه..وحرموا بقى علينا عيشتنا..وكده كده الرجال بيشوفونا في الشارع هتفرق إيه يعني😑
أو مثلا تقولي لواحدة صاحبتك مينفعش تكلمي الرجالة كده وتهزري وتبقي فاتحة الدنيا عالبحري..تقولك عادي دي صحوبية بريئة 😌
الدين مينفعش تاخدي نصه وتسيبه نصه...هو كده كله على بعضه 😅
مش إللي بالنسبة لك سهل وجاي على هواكي يبقى تمام ونعمل وإللي مش على هواكي تعترضي ومتنفذيش،
ماهو لو كل حاجة سهلة كده يبقى فين أجر المجاهدة 🤷♀️
وكمان الجنة حُفّت بالمكاره يعني متحوطة كده بالحاجات إللي تكرهي تعمليها...الحاجات إللي هي ضد هواكي👌
