#قصص_الأنبياء
#الحلقة_الثامنة_والخمسون
#مريم_زكريا_يحيى_عيسى(٨)
#عيسى(٤)
تكلمنا عن عيسى عليه السلام وإنه تكلم في المهد وإنه نشأ في رعاية مريم عليها السلام،
وإنهم كانوا خرجوا من بيت لحم عشان يهربوا من أذى بني إسرائيل، وقلنا إن عيسى عليه السلام بعد ما نطق في المهد متكلمش تاني غير لما وصل لمرحلة الكلام العادية بتاعة الأطفال،
وقلنا إننا معندناش أي أخبار عنه قبل بعثته،
لما قُتل يحيى عليه السلام ،
انتشر في بني إسرائيل الكفر والفجور وتجاوزوا حدود الله وناس منهم أنكرت البعث والحساب والعقاب،
وبقوا عايشين لشهواتهم وملذاتهم،
وكمان قتلوا زكريا ويحيى زي ما قلنا قبل كده، فربنا أرسل لهم رسول، لأن ربنا لا يعذب أحد غير لما يُقيم عليه الحجة👌
فكان الرسول هو عيسى بن مريم،
كان عمره لما ربنا أوحى له ثلاثين عام، ربنا أنزل عليه الإنجيل،
"وَرَسُولاً إِلَى بَنِي إِسْرَائِيلَ أَنِّي قَدْ جِئْتُكُم بِآيَةٍ مِّن رَّبِّكُمْ "
وهو امتداد لشريعة موسى عليه السلام لكن مع بعض التخفيف،
يعني هم كان مُحرم عليهم حاجات في شريعة موسى عليه السلام ، فلما جاء عيسى أحل لهم بعض المحرمات دي، طبعا بوحي من ربنا مش منه لنفسه كده😅
"وَمُصَدِّقًا لِّمَا بَيْنَ يَدَيَّ مِنَ التَّوْرَاةِ وَلِأُحِلَّ لَكُم بَعْضَ الَّذِي حُرِّمَ عَلَيْكُمْ وَجِئْتُكُم بِآيَةٍ مِّن رَّبِّكُمْ فَاتَّقُواْ اللَّهَ وَأَطِيعُونِ"
وكان بني إسرائيل في الوقت ده مشهورين بالطب،
وكان كل نبي يأتي بمعجزات من إللي قومه مشهورين به،
يعني موسى عليه السلام كان قومه مشهورين بالسحر ،
فكان من معجزاته مثلا إنه يقلب العصا حية ،
أما عيسى عليه السلام كانت معجزاته في الناحية الطبية،
يعني كان بيُشفي الطفل المولود أعمى وده ملوش أي علاج نهائي،
وكان بيشفي الأبرص إللي عنده مرض البرص المعروف،
وكان بيحيي الموتى،
وكان بيصنع من الطين شكل الطير ،
وينفخ في فم التمثال ده فيتحول لطير حقيقي يطير في السماء😮
طبعا كل ده بقدرة ربنا يا جماعة وبإذنه..يعني ربنا هو إللي وهب عيسى عليه السلام المعجزات دي 👌
"أَنِّي أَخْلُقُ لَكُم مِّنَ الطِّينِ كَهَيْئَةِ الطَّيْرِ فَأَنفُخُ فِيهِ فَيَكُونُ طَيْرًا بِإِذْنِ اللَّهِ وَأُبْرِئُ الأَكْمَهَ وَالأَبْرَصَ وَأُحْيِي الْمَوْتَى بِإِذْنِ اللَّهِ "
وكان بني إسرائيل بيحاولوا يعجّزوا عيسى عليه السلام،
فكانوا بيسألوه احنا عندنا أكل في بيوتنا،
فكان بيقول لهم الأكل إللي عندهم في بيوتهم وكمان بيقول لهم الأكل إللي هم مخزنينه👌
"وَأُنَبِّئُكُم بِمَا تَأْكُلُونَ وَمَا تَدَّخِرُونَ فِي بُيُوتِكُمْ إِنَّ فِي ذَلِكَ لآيَةً لَّكُمْ إِن كُنتُم مُّؤْمِنِينَ"
عيسى عليه السلام كان بيدعوا في بني إسرائيل ويعظهم،
ويشرح لهم الحاجات إللي اختلفوا عليها وجاء توضيحها في الإنجيل،
لأن التوراة زي ما قلنا اتحرقت واتحرفت، فربنا أنزل عليهم كتاب جديد،
"وَلَمَّا جَاءَ عِيسَىٰ بِالْبَيِّنَاتِ قَالَ قَدْ جِئْتُكُم بِالْحِكْمَةِ وَلِأُبَيِّنَ لَكُم بَعْضَ الَّذِي تَخْتَلِفُونَ فِيهِ ۖ فَاتَّقُوا اللَّهَ وَأَطِيعُونِ "
