#قصص_الأنبياء
#الحلقة_الثانية_والخمسون
#مريم_زكريا_يحيى_عيسى(٢)
وقفنا المرة إللي فاتت عند زكريا عليه السلام لما كان بيدخل على مريم الطفلة الصغيرة عشان يعطيها الأكل بتاعها ،
فكان بيلاقي عندها فاكهة الصيف في الشتاء ،
وفاكهة الشتاء في الصيف، فلما سألها قالت له إن ده رزق من عند ربنا👌
فوقع في قلب زكريا عليه السلام إن ربنا حقق للطفلة الصغيرة دي كرامة وأعطاها الفاكهة من غير ما تطلب،
أمال لو أنا بقى النبي دعيت بقى ..أكيد ربنا مش هيأخر عني،
حتى ربنا مقلش في القرآن فدعا زكريا لأ..ده قال:
"هُنَالِكَ دَعَا زَكَرِيَّا رَبَّهُ "
فكأن زكريا عليه السلام جت له فرصة فاغتنمها👌
يعني يارب إنت إديتها من غير ماهي تسألك..فأنا يارب بسألك فعطائك هيكون إزاي😍
☆زي مثلا لما المطر ينزل فانتي بتغتنمي فرصة إنك تدعي باللي إنتي عايزاه لأن الدعاء مستجاب في الوقت ده😉
فتمنى زكريا عليه السلام إن ربنا إللي رزقها من غير ما تطلب يرزقه بطفل لما يطلب👌
☆طيب واشمعنى يعني طلب في الوقت ده مدعاش قبل كده ليه😕
ماهو كان زي إبراهيم عليه السلام ..كان زوجته عاقر.. يعني مش بتحمل،
وهو وزوجته خلاص داخلين على مائة سنة 😅
فالأنبياء بيرضوا بقضاء الله وبيكون همهم العبادة ورضا ربنا،
فلما كبروا في السن اشتهوا الولد،
فلما زكريا عليه السلام شاف الكرامة إللي ربنا أعطاها لمريم تشجع وكأنه مكنش واخد باله إنه لو دعا ربنا هيعطي له لو دعا،
وبيحصل معانا على فكرة مواقف مشابهة لكده في الدنيا، ساعات بتقف قصادنا مشاكل أو عوائق وبعدين تشوفي حد حصل معاه نفس الموقف وحله بطريقة بسيطة جدا إنتي عارفاها،
بس مجتش في بالك قبل كده خالص ..فتروحي على طول وتحليها بنفس الطريقة👌
فكأن زكريا عليه السلام مع إنه نبي وعارف إن ربنا هيستجيب دعاؤه لو دعا لكن مجاش في باله غير لما لقى موقف يذكره بأن الله يرزق من يشاء بغير حساب 😉
نشوف بقى زكريا عليه السلام دعا ربنا وقال إيه😊
أول حاجة كلم ربنا بينه وبين نفسه في الخفاء من غير ما حد يسمعه،
"إذْ نَادَى رَبَّهُ نِدَاء خَفِيًّا"
قال يارب متسبنيش من غير ولد ولا وارث يرث النبوة من بعدي وأنت خير الوارثين🤲
"رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ "
☆عايش بقاله مائة سنة تقريبا بيطلع يشوف الناس ده معاه أبناؤه بيلعب معاهم وده أبناؤه بياخدوا بالهم منه وده..وده..
مائة سنة.. مسمعش كلمة بابا👌
مش هيحس بإحساس زكريا عليه السلام غير إللي اتحرم من نعمة الذرية...
يارب يرزق كل مشتاق ذرية صالحة 🤲
☆عارفين زكريا عليه السلام حالته من ناحية التشخيص الطبي إيه🙃
رجل وزوجته داخلين على مائة سنة..
هي عاقر وهو عقيم..يعني من الناحية الطبية استحاااالة إنهم يخلفوا أطفال👌
