قصص الأنبياء

#قصة_سليمان(٤)_معجزة_موته

#قصص_الأنبياء
#الحلقة_الثانية_والأربعون
#قصة_سليمان(٤)_معجزة_موته

وقفنا المرة إللي فاتت عند سؤال مهم وهو ليه سليمان عليه السلام هدد ملكة سبأ بالحرب وجهاد الطلب مكنش موجود عنده، وليه يفرض عليها الدين ولم يدعوها بالحسنى 😊

¤سليمان عليه السلام مَلِك ومش أي مَلك ،
ده ربنا جمع له مُلك الأرض ، والمَلك لابد أن تكون له الطاعة وخصوصا لو كان بيأمر بالخير والإيمان بالله،
فمينفعش حد يخالفه في كده🤷‍♂️ وإللي يخالف يجب قتاله، لأنه يُفسد المملكة وينشر الكفر،
عشان كده كان كل فترة يطلع مع جيشه للجهاد في سبيل الله عشان ينشر التوحيد😉
فبلقيس ملكة سبأ استقلت عن مُلك سليمان بعبادتها للشمس فكان واجب على سليمان عليه السلام إنه يرجعها تحت حكمه مرة ثانية👌
وهو لم يُرغم بلقيس على الدخول في الإسلام،
فالجهاد أصلا ربنا لم يشرعه عشان يُرغم الناس إنهم يدخلوا في الإسلام، ولكن عشان تكون كلمة الله هي العليا،
وتكون السيطرة للإسلام، لأن الإسلام دين عادل، وأي حكم تاني غيره فيه ظلم للناس،
فرسالة سليمان عليه السلام أول مرة كانت عادية، بيدعوهم فيها للإسلام والتوحيد عادي جدا👌
لكن رسالة سليمان عليه السلام الثانية كانت شديدة اللهجة ، لأن عادة الملوك إنهم يُفضلوا الدنيا ولا يتنازلوا عن مُلكهم أبدا ويقاتلوا عليه ،
ومش عايزين حد يقول لهم حلال وحرام ولا يتحكم فيهم، إلا لو حد اضطرهم لكده 👌
فلو خدنا بالنا هنلاقي إن الملأ قالوا لبلقيس إحنا أصحاب قوة فعادي إننا نحارب سليمان، فهم كانوا مستعدين للحرب كعادة الملوك،
لكن بلقيس كانت عاقلة وعايزة تحافظ على ملكها فاختارت الحيلة، ولو كان سليمان عليه السلام دعاها للإسلام من غير ما يخوفها بالحرب مكنتش استجابت،
في ناس كده مينفعش معاها غير منطق القوة، ومش بس في الحرب، ده حتى في المعاملات اليومية،
مسمعتيش..مشفتيش..محصلش معاكِ إنك بتبقي عايزة تخلصي معاملة وتمشي في الإجراءات قانوني والدنيا تقف.. رخامة🙄
ولما تجيبي واسطة الدنيا تمشي ملبن🤓...أهه ده برده منطق القوة ، ففي نوعيات كده لازم تكلميهم بمنطق القوة عشان يسمعوا لك وياخدوكي على محمل الجد👌
ده غير كده إن الأمور بتقاس بالنتائج، يعني إيه كانت نتيجة تصرفات سليمان عليه السلام ...مش إنهم أسلموا، وهو ده المطلوب، فهو كان أدرى الناس بأفضل طريقة للتعامل،
أقرب لكم المعنى 😁
مثلا لما نشوف طبيب بيفتح بطن مريض ويقطع من لحمه ويخيط ويكوي والدم سايل والمنظر مرعب😳
لو شوفنا ظاهر الموضوع هنقول:
إيه الطبيب إللي معندهوش قلب ده 😰 لكن لما تكون النتيجة إن المريض ده عاش بسبب أفعال الطبيب هنشكر الطبيب😊
حتى في الدعوة إلى الله، ممكن تشوفي واحدة بتدعي واحدة تانية بأسلوب من وجهة نظرك شديد أو أسلوب وحش،
ونسيتي إنها بتوجه لها هي الكلام مش ليكي إنتي، يعني بتعاملها بالأسلوب المناسب لها،
إللي هو مش مناسب ليكي، فتفكري إن إللي بتدعي دي بتنفر الناس و...و... فتدخلي في الحوار وتبدإي تهاجميها لأنك أخدتي الكلام على نفسك والكلام غير موجه لكي اصلا،
ونسيتي قول رسول الله صلى الله عليه وسلم : خاطبوا الناس بما يعقلون👌فأكيد هيكون لكل واحد أسلوبه الخاص في التعامل🤷‍♀️
فسليمان عليه السلام لو كان بيتكلم مع عامة شعب بلقيس خطابه كان هيكون مختلف، لأن دعوة الملوك غير دعوة عوام الناس😉
فاكرين لما قلنا إن ثاني مسجد بُني الأرض كان المسجد الأقصى وإللي بناه يعقوب عليه السلام😊
خلال السنين دي كان المسجد اخترب، فداود عليه السلام كان بدأ يجدده ولكنه مات قبل ما يكمل تجديده،
فأوصى لسليمان عليه السلام إنه يكمل بناء المسجد الأقصى،
فأمر سليمان عليه السلام الجن بإنهم يُكملوا بناء المسجد الأقصى وكان هو بيشرف عليهم،
وكان ربنا سخّر الجن لسليمان، سواء المؤمن منهم أو الكافر،
كانوا بيبنوا له القصور والتماثيل وأحواض كبيرة يُجمع فيها الماء،
وصنف تاني كانوا يغوصون في البحار يستخرجوا منها الجواهر واللآلئ،
وأي أحد من الجن يعصي امر سليمان عليه السلام كان يوثق بالأغلال والسلاسل،
"يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ"
الشياطين كانوا بيقولوا للناس في زمن سليمان عليه السلام إنهم كانوا بيعلموا الغيب،
وكانت الناس مصدقاهم لأنهم كانوا بيشوفوا قوة الجن وقدرتهم، وكان سليمان بيقول لهم إن لا يعلم الغيب إلا الله،
لكنهم مكنوش مقتنعين،
فسليمان عليه السلام دعا الله إنه يُخفي عن الجن موته عشان يثبت للناس إن الجن كذابين،
كان سليمان عليه السلام كل فترة بيختلي بنفسه عشان يتعبد لله وميسمحش لحد إنه يقطع خلوته،
وكان بياخد معاه إللي بيحتاجه من الأكل والماء،
زي ما كان رسول الله صلى الله عليه وسلم بيخرج يتعبد في غار حراء قبل البعثة😉
فسليمان عرف إنه هيموت قريب ،لأن الأنبياء يُخيروا قبل ما يموتوا بين الموت وبين الخلود في الدنيا زي ما قلنا قبل كده😊
فقال للجن إنهم يكملوا بناء المسجد الأقصى وهو واقف يراقبهم عشان ميكسلوش عن الشغل، وساند ذقنه على العصى بتاعته،
☆يعني المسجد الأقصى هو هيكل سليمان إللي اليهود بيقولوا عليه🤨
موضوع هيكل سليمان ده أصلا حاجة من اختراع اليهود مش موجودة 🙄
وعمالين بيدوروا على هيكل سليمان المزعوم وبيدوروا عليه تحت المسجد الأقصى بالذات😑
والدليل إن رسول الله صلى الله عليه وسلم قال : إن سليمان عليه السلام بنى لله مسجدا في بيت المقدس، إللي هو المسجد الأقصى زي ما قلنا من شوية😉
وحتى في كتب اليهود في اختلاف بين علماء اليهود على مكان الهيكل وعلى شكل الهيكل نفسه عامل إزاي😶
متخيلين ناس بتدور على حاجة مش عارفين هي إيه أصلا🤦‍♂️
فظل سليمان عليه السلام يراقب الجن وهم بيعملوا فقبض الله روحه على الحالة دي🙊
الجن شايفينه مفتح 👀 وباصص عليهم...لكن هو في الحقيقة ميت😅
استمر الوضع كده فترة زمنية..أد إيه بالضبط محدش يعرف،
في علماء قالوا أسبوع ..علماء تانيين قالوا شهر..علماء غيرهم قالوا سنة😶
الموضوع مش هيفيدنا كثير، أهم حاجة نعرف إنه قعد فترة ميت والجن مكنتش تعرف وعمالين يشتغلوا بدون راحة،
ومحدش يقدر يقرب من سليمان عليه السلام ،
لأنهم كانوا بيخافوا منه، وخدوا بالكم إن أجساد الأنبياء لا تتحلل ولا تأكلها الارض، يعني أجساد كوووول الأنبياء والرسل زي ماهي في القبور ..لم تتعفن ولم تتحلل👌
فربنا أرسل دودة الأرض تأكل عصا سليمان عليه السلام إللي هو كان ساند عليها،
فقعدت تاكل فيها من تحت لحد ما العصا ضعفت وسقط سليمان عليه السلام وهنا عرفت الجن إن سليمان عليه السلام كان ميت، وتمنوا إنهم كانوا يعرفوا الغيب بدل ما يستمروا في التعب و الشغل المستمر ده😅
وطبعا الناس عرفت إن الجن كانوا بيكذبوا عليهم وإنهم ميعرفوش الغيب ولا حاجة😏
حكم سليمان عليه السلام أربعين سنة، وحكم داود عليه السلام أربعين سنة..فيكون مجموع المُلك الإيماني المستقر الوحيد لبني إسرائيل هو ثمانون عام فقط👌