#قصص_الأنبياء
#الحلقة_الخامسة_والخمسون
#مريم_زكريا_يحيى_عيسى(٥)
#عيسى(١)
اتكلمنا عن مريم عليها السلام وإنها كانت منقطعة للعبادة عشان كده اسمها مريم البتول، وعلى فكرة كلمة القديسة من وصف النصارى لمريم عليها السلام والكلمة دي من الغلو في وصف مريم،
فاحنا كمسلمين منقولش الكلمة دي..ربنا وصفها بالصديقة وليها أوصاف تانية في الإسلام لكن وصف《 قديسة》 ده مش تبعنا خالص😉
وقلنا إنها حملت بعيسى عليه السلام بدون أب وإنها انعزلت بحملها عن الناس،
وقلنا إن حمل عيسى عليه السلام كان تسعة أشهر على أرجح أقوال العلماء،
بعد ما خلصت مدة الحمل وجاء وقت الولادة ...ألم الولادة اضطر مريم عليها السلام إنها تلجأ لجذع نخلة تولد عنده،
"فَأَجَاءَهَا الْمَخَاضُ إِلَى جِذْعِ النَّخْلَةِ"
☆ عايزاكم تتخيلوا معايا شابة صغيرة بتولد لوحدها من غير ما يكون أي حد معاها لا أم ولا أب ولا أخ...ومش بس كده الطفل إللي بتولده ملهوش أب😶
الواحدة لما بتكون بتولد وأهلها حواليها وزوجها معاها بتبقى تعبانة وخايفة وقلقانة و...و...
مريم عليها السلام اجتمع عليها كل تعب الولادة والألم النفسي بتاع الوحدة ومفيش حد يراعيها ولا يعطيها أكل ولا ماء، وطبعا بتتخيل هتقابل الناس إزاي بالطفل ده😞
فكل المشاعر دي متجمعة جواها خلتها تتمنى الموت، وقالت ياريتني كنت مت قبل ما يحصل لي كده ،
وكانت الناس نسيتني ونسيِت كل حاجة عني😔
"قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّ"
◇إيه ده ثواني كده😳
هو مش تمني الموت مينفعش وكده يبقى جزع وعدم رضا بقضاء الله😯
لأ طبعا...لأن مريم عليها السلام لما تمنت الموت كان لسببين 😁
الأول:
إنها خافت إن الناس يظنوا بها الشر في دينها ويعايروها فيؤدي إنها تُفتن في دينها ،
ويجوز للإنسان إنه يتمنى الموت لو خاف على نفسه فتنة في دينه،
حتى رسول الله صلى الله عليه وسلم قال إن في حاجتين الإنسان بيكرههما :
الموت، والموت أفضل للمؤمن من الفتنة..والحاجة التانية قلة المال، وقلة المال أقل في الحساب 👌
لكن مينفعش الإنسان يتمنى الموت لو أصابه ضرر ،
يعني ابتلاء بمرض أو ابتلاء بفقر أو أي ابتلاء من ابتلاءات الدنيا😉
الثاني:
إنها خافت على قومها إنهم يقعوا في البهتان...يعني تكون سبب إن قومها يقعوا في معاصي،
زي مثلا لما تكرهي إن تحصل مشكلة بين الناس وتكوني إنتي السبب فيها فبتبقي قلقانة 👌
فمريم عليها السلام مكنتش عايزة قومها يقعوا في الغلط بسببها، فتمنت الموت.
☆وفي هنا فايدة لنا وهي إننا لا نتمنى الموت عشان حصل لنا ابتلاء ...مش يمكن البلاء ده يكون هو سبب تغير حياتنا💁♀️
مريم عليها السلام تمنت الموت بسبب ابتلاء كان نتيجته إنها هتكون أم رسول من أولي العزم وكمان يُنسب لها هي👌
فمتتمنيش الموت بسبب أي بلاء يحصل لك واعرفي إن رب الخير لا يأتي إلا بالخير 😊
