#قصص_الأنبياء
#الحلقة_السادسة_عشرة
#قصة_إبراهيم(٦)
#قصة_الكعبة_على_مر_الزمن
بعد ما جاءت البشرى لإبراهيم عليه السلام بولادة ابنه إسحاق، عدت فترة من الزمن وبعدين ربنا أمر إبراهيم عليه السلام بأمر جديد،
ذهب إبراهيم عليه السلام عشان يزور إسماعيل عليه السلام فلما راح له مكة لقاه كان قاعد عند شجرة في محيط البيت الحرام، وكان قاعد بيبري نَبل...عارفين زي خشبة كده عمال بيبريها بسكين زي ما بنبري القلم الرصاص كده😚
فلما شافه إسماعيل عليه السلام قام له وإنتم عارفين لما الأب ولا الإبن لما بيشوفوا بعض بعد زمن بيعملوا إيه، وخصوصا لو كانت علاقتهم زي علاقة إبراهيم وإسماعيل عليهما السلام😊
بعد ما سلموا على بعض قال إبراهيم عليه السلام لإسماعيل إن ربنا أمره بأمر، فإسماعيل عليه السلام قاله طبعا نفذ إللي ربنا يأمرك بيه،
يعني لو في ذبح تاني أنا معنديش مانع😅
فإبراهيم عليه السلام قاله طيب هتساعدني؟
قاله طبعا أساعدك😍
فقاله ربنا أمرني إني أبني في المكان ده بيت 👈 وشاور على منطقة مرتفعة عن الأرض مغطياها الرمال،
وكان ربنا هو إللي عرفه المكان إللي هيبني فيه بالضبط ...يُقال عن طريق ريح ربنا أرسلها فكنست المكان المقصود من الرمل ،ويُقال عن طريق سحابة وقفت في مكان البيت وظللت مساحة معينة كانت هي دي المساحة بتاعة الكعبة،
"وَإِذْ بَوَّأْنَا لِإِبْرَاهِيمَ مَكَانَ الْبَيْتِ أَنْ لَا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ"
وفوق الكعبة بالضبط البيت المعمور وهو كعبة أهل السماء وموجود في السماء السابعة ، يدخله كل يوم سبعون ألف ملك يطوفون حوله لا يرجعون للطواف مرة تانية إلى يوم القيامة👌
بدأ إبراهيم عليه السلام يبني البيت،
فكان إسماعيل عليه السلام يأتي بالحجارة وإبراهيم عليه السلام هو إللي يبني،
فقال إبراهيم عليه السلام لإسماعيل هات لي حجر أحطه في زاوية بحيث يكون علامة للناس يبدأوا من عنده الطواف،
فجاء له جبريل عليه السلام بالحجر الأسود وهو حجر من الجنة وكان أول ما نزل الأرض كان أشد بياضا من الثلج وسودته خطايا بني آدم،
☆يعني سودته خطايا بني آدم وطاعات الموحدين لم تبيضه🤔
لأن العادة إن الأسود هو إللي بيصبغ الأبيض وليس العكس،👌
وكمان فيه عبرة ...يعني الخطايا أثرت في الحجر الجامد الصلب فما بالنا بتأثير الذنوب في القلوب😞
استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء، وهم بيبنوا كانوا بيدعوا ربنا وبيقولوا :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "
☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها منها😊
