#قصص_الأنبياء
#الحلقة_الثامنة_عشرة
#قصة_شعيب
بعد هلاك قوم لوط إللي تكلمنا عليهم قبل كده بكم سنة ، في مكان قريب منهم كان في قبيلة اسمها مدين، أهل مدين دول كانوا ناس كفار بيعبدوا شجرة اسمها الأيكة،
وكانوا من أسوء الناس معاملة 😑
لما يكونوا بيبيعوا حاجة يقللوا الميزان لمصلتحهم،
أو يبيعوا مثلا القماش ناقص بفلوس زيادة، يعني يبيعوا ٩٠سم قماش بسعر متر، لكن لما هم إللي يشتروا بياخدوا زيادة عن حقهم ...يعني ياخدوا بالزيادة ويدفعوا بالناقص.
☆ولو بصينا في حياتنا هنلاقي ناس كتير بتعمل كده إلا من رحم الله، لما تيجي تشتري حاجة تلاقيها عمالة تفاصل وتفاصل لحد ما تبخس ثمن الحاجة وتجيبها الأرض😅
لكن تعالي شوفيهم لما يكون فيها مصلحتهم تلاقيهم بيزودوا السعر ويحلفوا بالله كذب عادي جدا إن الحاجة دي سعرها كده😑
وكانوا قطّاعين طُرق...بيطلعوا على الطريق ويخوّفوا المسافرين وياخدوا أموالهم وحاجتهم، كانوا أشبه بأفعالهم بقوم لوط،
فلأن ربنا رحيم ومش بيعذب حد ولا يُهلكه إلا لما يبعتله حد يذكره ويوعظه وينبهه، ربنا أرسل لهم واحد منهم اسمه شعيب.
"وَمَا كُنَّا مُعَذِّبِينَ حَتَّىٰ نَبْعَثَ رَسُولًا"
شعيب عليه السلام كان زيه زي باقي الأنبياء لم يعبد صنم ابدا ولم يكفر بالله أبدا...كلهم على الفطرة..يعني كل إنسان ربنا بيخلقه بيكون على فطرة الإسلام والتوحيد،
وبعدين بقى يبدأ التغيير فيه من إللي حواليه وخصوصا الأب والأم إللي ليهم التأثير الأكبر على عقيدة الطفل،
فالأنبياء والرسل ربنا حفظهم بفطرتهم لحد ما تجيلهم الرسالة😊
فربنا أوحى لشعيب عليه السلام إنه هيكون رسول لقومه عن طريق جبريل فهو الملك المسؤول عن تبليغ الوحي للأنبياء،
ويُقال إن شعيب عليه السلام من ذرية إبراهيم عليه السلام لكن مفيش دليل على كده،
وخصوصا إن شعيب عليه السلام من الأنبياء العرب العاربة إللي رسول الله صلى الله عليه وسلم ذكره في الحديث، إن الأنبياء العرب أربعة، وإبراهيم عليه السلام مكنش عربي وأول عربي مستعرب هو إسماعيل عليه السلام😊
عالعموم نسبه مش هيفيدنا بشيء.. لأنه لو كان هيفيدنا كان ربنا قالنا سواء في القرآن أو السنة،
فربنا دايما بيقولنا على الحاجات إللي هتنبني عليها حاجة مفيدة لينا، لكن إللي الحاجة إللي مش هتفيدنا مش بيذكرها زي مثلا مرات إبليس اسمها إيه وهو متزوج أصلا ولا لأ🤓
فاللي يهمنا إن شعيب عليه السلام نبي مرسل لقوم مدين إللي كانوا قريبين من مكان وزمان قوم لوط،
"وَإِلَى مَدْيَنَ أَخَاهُمْ شُعَيْبًا "
أول حاجة دعاهم ليها هي إنهم يعبدوا الله وحده...ربنا إللي خلقهم وبيرزقهم وبيشفيهم إذا مرضوا ملوش شريك ولا له ولد هو الخالق الوحيد للكون ده،
ونصحهم إنهم يوفوا المكيال ومياخدوش زيادة عن حقهم،
رجعوا للناس أموالها ومتخدوش زيادة عن حقكم ...رزق ربنا أحسن لكم من إنكم تاخدوا أموال الناس بالباطل.
"قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ قَدْ جَاءتْكُمْ بَيِّنَةٌ مِنْ رَبِّكُمْ فَأَوْفُوا الْكَيْلَ وَالْمِيزَانَ وَلَا تَبْخَسُوا النَّاسَ أَشْيَاءهُمْ "
