#قصص_الأنبياء
#الحلقة_الثانية_والثلاثون
#قصة_موسى(٧)
#بين_موسى_وبني_إسرائيل(٢)
● قبل ما نكمل قصة النهاردة في معلومة لازم نعرفها وهي إن السامري إللي صنع عجل بني إسرائيل مش هو المسيح الدجال👌
السامري مات من عهد موسى عليه السلام والمسيح الدجال ليه قصة تانية خالص وصفات تانية خالص، وفي الحديث:
"إن الله لم يبعث نبيا إلا حذر أمته من الدجال"
فلو كان السامري هو الدجال كان عرفه موسى عليه السلام وكان حذر الناس منه، ومحدش قال قبل كده إن السامري هو المسيح الدجال غير واحد من العصر الحديث، قال إنه موجود في مثلث برمودا ومجبش دليل على كلامه،
والكلام ده غير صحيح لأن رسول الله صلى الله عليه وسلم قال : "يخرج الدجال من أرض بالمشرق يقال لها خراسان"
فالسامري مش هو المسيح الدجال😊
نرجع لقصتنا😉
وقفنا المرة إللي فاتت عند السبعين رجل إللي قالوا لموسى عليه السلام مش هنؤمن غير لما نرى الله، فربنا عاقبهم بإنه صعقهم وشافوا الصاعقة دي وماتوا،
"فَأَخَذَتْكُمُ الصَّاعِقَةُ وَأَنتُمْ تَنظُرُون *ثُمَّ بَعَثْنَاكُم مِّن بَعْدِ مَوْتِكُمْ لَعَلَّكُمْ تَشْكُرُونَ "
فموسى عليه السلام خاف..هيرجع يقول إيه لبني إسرائيل😳...هتحصل فتنة جامدة، فدعا الله إنه يحييهم تاني وقال: يارب لو شئت كنت أهلكتنا كلنا في المقتلة إللي حصلت..لكن دلوقتي هقول إيه لبني إسرائيل لما أرجع لهم..يارب لا تؤاخذنا بما فعل السفهاء منا🤲
فأحياهم الله مرة تانية رجل رجل وبقوا شايفين بعض إزاي ربنا بيحيي الموتى، ورجعوا مع موسى عليه السلام لبني إسرائيل،
بدأ موسى عليه السلام في تعليم بني إسرائيل التوراة من الألواح، فأول حاجة قالهم إنهم لازم يقبلوا كل ما في التوراة وينفذوا إللي فيها،
فقالوا: إحنا هنشوف إللي فيها فلو لقينا الأوامر والنواهي سهلة نعملها هنقبلها🙄
فموسى عليه السلام قالهم: لأ..لازم تقبلوها كلها ده دين😳
☆والله زي حال ناس كثير اليومين دول..نيجي نقولهم الدين بيقول كذا وبيقول كذا..تاخد منه إللي يوافق مزاجها وسهل إنها تعمله، لكن لو الموضوع صعب ومحتاج مجاهدة تلاقيها تسيبه، وياريتهم يسكتوا ويدعوا مثلا إنهم في يوم من الأيام ربنا يهديهم ويعملوا الصح ويبتعدوا عن الغلط🙄
لأ ده يدوروا على كلام لشيوخ الله أعلم بيهم عشان ياخدوا فتوى باللي هم عايزينه والمثل بيقول حطها في رقبة عالم واطلع سالم🤓
ومش فاهمين إن لو تعارض قولين للعلماء فالإنسان لااازم ياخد بالأحوط لدينه👌
والدليل قول رسول الله صلى الله عليه وسلم:
"الحلال بين والحرام بين، وبينهما مشتبهات لا يعلمهن كثير من الناس، فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام"
ده غير كده لما حد يكون عايز فتوى لااازم يدور على الشخص إللي بيتقي الله في الفتوى ومش بيتساهل فيها😑
هو إحنا مش لما بنكون عايزين نكشف مش بندور على أحسن الأطباء عشان نعالج أجسادنا الفانية ،
فالدين أولى إننا ندور له على أفضل العلماء وأتقاهم لله عشان ناخد عنهم ديننا لأن هو ده إللي هنتسأل عنه في القبر👌
