قصص الأنبياء

#قصة_داود(١)

#قصص_الأنبياء
#الحلقة_الثامنة_والثلاثون
#قصة_داود(١)

¤قبل ما أبتدى قصة النهاردة في ملحوظة مهمة عايزة أقولها عشان إللي ميعرفش يعرف😊
وهي إن أي معلومة بقولها عليها دليل من القرآن أو السنة أو كلام جمهور العلماء من المذاهب الأربعة ،أو جمهور المفسرين،
مش بجيب أقوال شاذة، لو في أي إسرائيليات من إللي يجوز نحكيها كما قال رسول الله صلى الله عليه وسلم... بنبه عليها لما بقولها😊
إللي عايز الدليل على أي معلومة بقولها يسألني وأنا هجيب له الدليل عادي جدا 😁✌

☆نرجع لقصتنا 😚
وقفنا المرة إللي فاتت عند داود لما قتل جالوت وكان طالوت وعد داود إنه يزوجه ابنته ويكون وريثه في الملك،
ونفّذ طالوت وعده وزوجه ابنته، وأحب بنو إسرائيل داود،
مين بقى داود😁
فاكرين لما اتكلمنا عن خلق آدم عليه السلام وإن ربنا مسح على ظهره وأراه ذريته، وكان كل واحد من أبناؤه كان في وجهه نور، ماعدا واحد بس كان النور ده شديد أوي،
فجذب انتباه آدم عليه السلام، فسأل ربنا عنه فقال له الله إن هذا داود فأعطاه آدم من عمره أربعين سنة عشان يكمل عمره مائة عام😉...أهه هو ده داود 😁

كان داود من نسل يعقوب عليه السلام...تولى حكم بني إسرائيل وأعطاه الله النبوة 👌
فكان أول نبي يجمع النبوة والملك بعد يوشع بن نون عليه السلام،
فاكرين لما قلنا إن المُلك كان في سِبط والنبوة في سِبط، دلوقتي اجتمعت تاني في داود عليه السلام😊
"وشَدَدْنَا مُلْكَهُ وَآتَيْنَاهُ الْحِكْمَةَ وَفَصْلَ الْخِطَابِ"

ربنا قال لداود عليه السلام إنه يحكم بين الناس بالعدل والحق ولا يتبع الهوى، يعني متحكمش لحد عشان هو قريبك أو صديقك مع إن الحق مش معاه،
وتحكم ضد عدوك بالظلم مع إن الحق معاه، وإلا فإنت كده هتضل عن طريق ربك الصحيح، وإللي بيضل عن الطريق هيكون له عذاب شديد يوم القيامة👌
"يَا دَاوُودُ إِنَّا جَعَلْنَاكَ خَلِيفَةً فِي الْأَرْضِ فَاحْكُمْ بَيْنَ النَّاسِ بِالْحَقِّ وَلَا تَتَّبِعِ الْهَوَى فَيُضِلَّكَ عَنْ سَبِيلِ اللَّهِ إِنَّ الَّذِينَ يَضِلُّونَ عَنْ سَبِيلِ اللَّهِ لَهُمْ عَذَابٌ شَدِيدٌ بِمَا نَسُوا يَوْمَ الْحِسَابِ "

☆ربنا بيقول الكلام ده لداود النبي واخدين بالكم😑
فما بالنا إحنا😞

عاش داود عليه السلام مع بني إسرائيل في القدس، وكان يحكم بينهم بالعدل، ومع إنه كان ملك لكنه كان بيشتغل ، كان بيصنع دروع، عارفين دروع الحرب إللي كان بيلبسها الجنود زمان عشان تحميهم في الحروب ، أهه أول واحد اخترع الدروع دي كان داود عليه السلام بتعليم الله له،
وكان الموضوع سهل لداود عليه السلام، لأن ربنا أعطى له معجزة لين الحديد،
يعني لما كان يمسك الحديد يقدر يشكله ويتحكم فيه زي ماحنا بنشكل العجين ونتحكم فيه بكل سهولة😅
"وَأَلَنَّا لَه الْحَدِيدَ"
فكانت الدروع إللي بيعملها دقيقة جدا وخفيفة لا تعُوق الجنود في الجهاد وفي نفس الوقت تحميهم من ضربات العدو.
"وَعَلَّمْنَاهُ صَنْعَةَ لَبُوسٍ لَّكُمْ لِتُحْصِنَكُم مِّن بَأْسِكُمْ "