قلوب من ريش

البارت الثلاثون

#قلوب من ريش
للكاتبة ضوء القمر

كلب عندي جبير شكد خلك شايل
صرت اشم الساعي من بعيد
                     واعرف شكاتب بنص الرسايل
..........
سماء.طول مااحنه بالسيارة عين بابا عليه يعرف بيه اشكد قلقة واشكد احاول اضغط على نفسي في سبيل ماابين انو بيه شي محتاجة احد يفهمني محتاجة مكان اكعد بي وحدي وشخص يسمعلي ولا يكولي بس ولا انتي غلطانه محتاجة مكان احس روحي بي الهوى بي الي مليت واني اكتب وأحط اعذار ليش دوم انطي للغير اعذار واني مااحصل بمالقابل مثله ليش دون انطي وكولشي مااحصل مليت والتعب اخذ مني اهوواي بعدني صغيرة بس التعب كبرني مرات اتمنى لو كلب ماعندي وميهمني كل الي اسمعه ولا انطي من وقتي بس للاسف شفت نفسي معبر للكل انطي أكثر مما اخذ مدري الدنيا هي ظالمتني مدري الي مكتوب هيج مدري الحظ هو هيج يريد كل هذا ويكولون انتي غلطانه حسرة بداخلي اتمنى اتخلص منها بلكي اكدر ارتاح ولو الراحة مو النه ولا مكتوبه علينه. نفضت افكاري وازكرت بالدرب رجعنه للشقة ماما بابا يساعد بيها اباوع عليهم جنت دوم اكول ليش همه كبار يله خلفوني معقولة الله مارزقهم غيري ومن جنت اسأل الكه الجواب نفسه أي الله تأخر يله رزقنه واسكت الجواب يجبرك  تسكت ومن بديت اوعه كمت ابحث عن ليش أهل ماعندي لا عم ولا خال وكل هذا وينهم هذولة شنو اني ماعندي عشيرة من جنت صغيرة جنت اسمع البنات وهنه يحجن عن عمامهن وولد عمامهن واسأل نفسي ليش ماعندي ومن اسأل يردون عليه باحنه ماعدنه وهم يجبروك تسكت ومشت الايام والعمر على هالشكل. جنت اكول اذا صار شي اني وين اروح المن الي لا أهل لا عمام لا خوال مقطوعه من شجرة جنت اخاف لا يجي وافقدهم واني اعيش وحيدة ولحد هسه اخاف على الرغم الدنيا كشفتلي عندي أهل وعمام بس ليش مخفي عني امرهم وهم هم مااعرف هو والجزء الي مخفي من ذاكرتي احاول اتذكر بس افكر لو كان يفيديني وارتاح مكان فقدته بس متأكدة كل تعب ..

سائد :راح تظلين واكفه اهواي
سماء :هاا شكلت
سائد :لا هسه تاكدت انتي مو وياي بيج شي
سماء :اسفه جنت شاردة اشويه
سائد :يااشويه هو انتي من طلعنه وانتي هاي حالج اهواي تفكرين

سماء.دخلنه للشقة كعدت وخليت الكوشة بحضني وكعد مقابيلي بعد مانزع سترته :مو بس اهواي افكر عقلي احسه راح ينفجر على لحظة تدري مرات اتمنى ابقى العمر كله نايمه واكعد الكه ولا شي اذكر

سائد :وليش كل هذا خو ابطل تفكير ولا اتعب نفسي
سماء :مااكدر في امور تجبرك تفكر بيها مرات اهواي احاجي نفسي واكولها اني اهواي ظالمتج بس شنو الفايدة ارجع وره فترة هم افكر سائد الي مثلي ميكدر ميفكر

سائد :بس انتي مامحتاجه احد كاعدة مستقرة شنو الي يخليج تفكرين اهواي

سماء.رجعت جسمي ليوره وباوعت بالفراغ :المجهول هو الي يخليني افكر
سائد :يعني
سماء :اسبط شي انت اني شنو اعرف عنك غير انو انت تكون ابن عمي اشلون ماادري