قلوب من ريش

البارت الثاني والثلاثين

#قلوب من ريش
للكاتبة ضوء القمر

يبنتي النــــوح ماينفع.. علاماج
زغيرة والوكــت عله ..علاماج
لون تدرين البكـــلبي ..على امج
جان أنتي أنكسر كلبج عليه

.....
كاعد بالحديقة صار أكثر من شهرين اني هنا اصلا مااعرف أي شي صح جمعت كم معلومه عن المكان بس وين بالضبط ماادري

..خلونه نرجع لقبل شهرين بنفس المكان الي كاعد بي هسه

وائل.بعد الحادث الي تعرضتله كلت مراح اطلع سالم منها احس بنفسي مكسر وصدري مأذيني اهواي احس بمكان الطلقة فتحت عيوني توقعت الكه نفسي بالمستشفى استغربت من لكيت نفسي بغير مكان باوعت الغرفة تصميمها ميدل على انو مستشفى او شي حاولت احرك روحي بس الجرح أذاني صدري كله ملفوف وره مدة انفتح الباب ودخل واحد لابس نظارات

..اهاا زين كعدت بلغو الشيخ الضيف كعد
وائل :اني وين
..الحمد لله على السلامة طولت اهواي بنومك
وائل :اشكد صارلي نايم
..اربع ايام لا تتحرك جرحك بعده
وائل :انتو منوو وشنو هالمكان
..بعدين تعرف اني دكتور الي عليه اعالجك وبس أي سؤال مااكدر اجاوب عليه

وائل.فتحلي الضماد وعقملي الجروح الطلقة احسها قريبه كلشي من كتفي آلم فضيع واكو وحده بظهري لان اني منايم على ظهري لا نايم صفح وهالشي كلش اذاني بمساعدته كدرت اكوم على حيلي بس بصعوبة ومضى على هالمنوال اسبوع ونفس شي كلشي مااعرف بس مجرد يجي يمكن الشيخ لان كلهم وراه ماعرفته يسأل عن حالي ويطلع شفته ثلاث مرات بس واسبوع يجر اسبوع تحسنت حالتي وكمت اطلع للحديقة عرفت تقريبا اشويه عن المكان مبين من خلال الزرع مزرعة بس وين ماادري وصار شهر على وجودي محبوس اشكد حاولت احد يخبرني علمود اطلع منا المشكلة مااكدر اشرد الحراسة وشغلة ثانيه همه مأذوني بشي واني بعدني صحتي مو بالكامل زينه كل فكري يم اهلي شنو حالهم وجعفر الي خليته سابح بدمه اما هي شغلت نص فكري اشلون وضعها اكيد حالها مو اقل من اهلي ابد ممتعود على هيج اشكد ماالمكان واسع ونفه بس احس روحي مخنوك اتخبل من اكون بمكان اني مااعرف عنه شي ومضى شهر ثاني على وجودي لحد ما يوم فعلا طكت روحي اريد اطلع اعرف نفسي وين 

...هاا يابطل اشلون صرت.

وائل.طبعا اشكد صارلي عنها مااعرف هذا شي بس اسمه ابو الطيب
..الحمدلله عايش
..وجرحك أحسن
وائل :أي أحسن مراح تكلي اني وين وليش تساعدني

ثابت.اخذ نفس وجر چكارة وورثها :ايي اجه وكت اخبرك بكلشي تريده بس أول شي لازم اخذ وعد منك

وائل :وعد مني بشنو هالوعد
ثابت :اكو جماعة لازم توصلهم لمنصه الحكم
وائل :تقصد منوو خلي كلامك واضح

ثابت :يجيك الحجي أول شي انت هنا بمضيفي الشيخ ثابت وياك وانت ضيف يمي مفترض انت هسه ميت مثل مامعروف عند اهلك بس بختك  بالي وصه بيك والا اني مااخلي اثر وراي
وغئل :لحظة شتقصد معروف عند اهلي تقصد عبالهم ميت