طفولتي المشتتة

الفصل الثامن عشر 18

الجد بهدوء : بالنسبة للموضوع للي جمعتكم عليه ريم رح تعيش عندي هنا

نايف باعتراض :،يبه الله يخليك ريم ودي اخذها معي

الجد بحزم : كلمتي ما اثنيها بنتك منت قادر تربيها ودك توخذها هناك وافرض انها شردت وين ودك تلاقيها ببلاد الغرب عالاقل هنا لما تشرد نلاقيها اما هناك ما رح تلقاها والتفت على ابو سليمان هاه وش رايك ؟؟

ابو سليمان بحكمه : بصراحه كلامك يبه صحيح بنتك يا نايف اكثر من مرة كررتها ولازم تحط كل الاحتمالات افرض انها شردت وين رح تلاقيها هناك انا اشوف الافضل تخليها عند ابوي وش رايك يا سلطان

سلطان : انا ما لي دخل فيها وبعدها وقف لو ادري انه الاجتماع لهذا الموضوع كان ما جيت والحين انا استأذن

الجد بحزم التفت لنايف بعد ما خرج سلطان : عاجبك للحين اخوك ماخذ بخاطره عليك

نايف بهدوء : يبه يعني اعتذرت له ووضحت له إنه ما كان قصدي بس هو راكب راسه بالعناد ومو راضي يقتنع وبعدها تنهد بقهر

الجد بحزم : ما علينا المهم بكره تجيب كل اغراض ريم هنا وما عليك بالباقي

نايف وهو يكتم عصبيته : يعني تعاملوني ولا كأنها بنتي ما إلي كلمه عليها لين متى هذا الحال اقولك خلص خذ ريم عندك وانا متبري منها ومن كل فعايلها ولا تيجي يوم تشكيها لاني خلص رفعت يدي منها

ابو سليمان : يا نايف ما توصل للدرجه ذي ما فيها شي لو عاشت هنا لا تكبر الموضوع ...

الجد بحزم : بربرتك هاذي وفرها لبعدين وهاذي رح تبقى بنتك غصب عنك فاهم ويالله الحين خلينا نطلع للمجلس

ابو سليمان بمزح : الله يسامحك يبه كان خبرتنا بالمجلس قدام الكل بدل هالمشوار لمكتبك

الجد : كلها كم متر ومتكاسل تمشيها بعدك بدايه الاربعين وهذا حالك اقول قوم وانت اشر على نايف لا تظل قالب بوزك تقول انك قابر مرتك

كان نايف وده يتكلم ويعترض لكن الجد اشر له امشي قدامي وبلا هذره كلام يالله

نايف بقله حيله انصاع لامر ابوه ......

*

*

*

*

*

كانوا الكل جالس بالمجلس وعندهم فضول يعرفون وش فيه بالمكتب حتى سلطان لما طلع ما تكلم بشيء وظل ساكت وإذا سألوه يقول لما يطلع ابوي يقول لكم

عمر بلقافه : اموت واعرف وش هو الموضوع

بدر بتأكيد : اكيد جدي خبر عمي نايف إنه وده يحيرها لسليمان

ما كمل بدر إلا علبه المناديل بوجه

سليمان بعصبية : بتعرف تخرس الحين وإلا اجي اخرسك