طفولتي المشتتة

الفصل 72

قراءة ممتعة
رواية طفولتي المشتتة

الفصل 72

طقت ساره الباب بخفه وفتحت الباب ومعها
صينيه عليها كوبين عصير
طالعت ريم والجوري وبابتسامه : كملتوا ؟؟؟
طالعتها ريم بارتباك وهم يخبون ورق اللعب : مطولين يا ماما هذي غبيه مو فاهمه شي
فتحت الجوري عيونها على وسعهم وهي تناظر ريم وبعدها طالعت ساره : كذابه لا تصدقيها يا خالتي
ساره اقتربت منهم بابتسامه وحطت العصير
على الطاوله وناظرت ريم بعتب : عيب يا ماما تقوليني لصديقتك كذا ولا تنسين انها اكبر منك
لازم تحترمينها
ابتسمت الجوري : تسلمين يا خالتي
طالعتهم ساره بنعومه : لا تنشغلون باللعب
الدراسه اهم وغمزت لهم انها كاشفيتهم
ريم وهي تحك راسها : ان شاء الله ماما
طلعت ساره بهدوء من الغرفه مثل ما دخلتها
وحطت ريم يدها على راسها مكان الضربه وعفست
ملامحها : دبه ليه ضربتيني ؟؟
الجوري : كل هالنعومه وتطلع شريره بقصتك
ريم وهي تفرك مكان الضربه : انت غبيه اقول لك
كتبتها لما كان عمري 14 وقتها كانت علاقتي بها عاديه
بس لما سافر زوجها تغيرت معي كثير
واصرت علي اعيش عندها بوقت غياب زوجها
بس ما ادري احس تتغير معي بوجود زوجها
او تواجد جدي او احد من اخوالي احسها تحاول تتجنبني
اما بغيابهم احسها فعلا امي
وبعدين لما كتبت عنها انها شريره كنت ماخذه موقف منها
لما وقعت بالبركه وركضت على فيصل وانا لا
وقتها صرت اتذكر كل مواقفها وافسرها كدليل
على كرها او رفضها لوجودي
الجوري رفعت حاجب : وكتبتي بقصتك انك رحتي تزوريها وانها قالت لزوجها انها ما تبغاك وما تطيق
تشوفك وتخيلتي اشياء متأكده انها مو موجوده
طالعتها ريم ونزلت نظرها : قلت لك توقعات يعني انا توقعت يصير كذا وانها رح تقول عني كذا
وبعدين لا تنسين تضايقت كثير وقت لما سألتها خالتي
غاده عن ذكرى ميلادي وما عرفت
وتاريخ فيصل حافظيته ليه يعني ؟؟
الجوري ضربت جبهتها : تراك حساسه زياده
وش فيها
قلت لك من قبل ما فيها شي يعني ما تخليك
تاخذين موقف من امك
وتكتبين قصه وتخليها شريره علشان هذا الموقف
ريم تقاطعها : بس
الجوري اشرت لها ؛ اسكتي ومسكت جوالها
واتصلت على امها وحطت سبيكر
الجوري بابتسامة : مرحبا يا ماما
ام جوري وردت وباين انها مشغوله : نعم
الجوري : ابغى اسألك سؤال مهم
قاطعتها امها : جوري ترى مو فاضيه لسخافتك
وانا قلت لك لا تتصلين الا لما تكملين دراسه
الجوري قاطعتها : بس سؤال مهم
زفرت امها بضيق : يالله بسرعه ترى مو فاضيه
الجوري بابتسامة وهي تتدلع : ماما كم تاريخ ذكرى ميلادي ؟؟
امها بنرفزه : متصله فيني علشان كذا
بعدين مع سخافتك يا جوري
الحين الحلويات تحترق يالله بسرعه قفلي
الجوري تتكلم بسرعه قبل ما امها تقفل : لحظه لحظه
يا ماما بالله جاوبي
امها : انا تاريخ ميلادي مو حافظيته
مو حافظه الا تاريخ زواجي وغيره لا
يالله طيري
وقفلت الجوال بوجه الجوري
طالعت ريم الجوري للي تناظر الجوال وفقعت ضحك : هههههههههه تم قصف الجبهة بنجاح
ههههههههه
الجوري بتمثيل الزعل : شفتي شفتي ماما شريره
تاريخ ميلادي مو حافظيته واع واع واع
مسكتها ريم من شعرها : تقصديني هاه ؟؟؟
ضحكت الجوري بصوت عالي : ههههههههه
للي على راسه بطحه بتحسس عليها هههههه
ريم لوت بوزها : ترى قلت لك بذاك العمر كنت حساسه
ما ادري ليه
اي كلمه تأثر فيني واحس الكل ما يبغاني وخاصه امي
قاطعتها الجوري : اقول اسكتي لا تحكمي على الناس بدون ما تتأكدين مره ثانيه
ريم بندم : بعد ما كملت كتابة القصه كنت ناويه
احرقها بس انشغلت
الجوري ابتسمت : الحمد لله انك انشغلتي حتى اكتشف تفكيرك المنحرف
وناظرتها بنص عين
ودك تتزوجين وعمرك 14 يا بايخه
ضحكت ريم بنعومه : صدقيني هذي المرحله كانت
صعبه علي كنت اشوف الزواج هو الحل الوحيد و كنت احس ماما تكرهني ما حد يبغاني
بس مع الايام والحين
احس اني ظلمت ماما لاني متاكده انه كله من
زوجها
وانت يا جوري كنت لي نعم الاخت طلعتيني
وخليتيني مثلك عبيطة
ضربتها على راسها : انا عبيطه ؟؟!!
ريم بابتسامة : قصدي اني صرت اطبق
قاعدتك
ابتسم لتقهر اعدائك
الجوري بفخر : هلا عمي مو حيالله
على فكره
تراك اقرفتيني لما كنت بعمر 14 كل يوم تيجين
تبكين مثل البزران
ريم فتحت عيونها بصدمه : كذابه
الجوري ضحكت : هههههه لا بس كان معك اكتئاب
الظاهر انك وقتها كنت تكتبين قصة حياتك بعد
الرابعه عشر من عمرك
طالعتها ريم بنص عين : سخيفه
وبعدين كل شوي تنطين على القصه تراك
اقرفتيني غلطنا خلاص
الجوري : تراني مقهوره منك ما خليتيني احد
ابطال قصتك
وبجديه صحيح مو قلت لي انك محيره لسليمان
ريم دفعتها عنها بقرف : يعووووووو
الجوري عفست ملامحها : حشى وين النعومه
تراك انثى مو حمار ترفسين
الي يشوفك يقول واو وش هالجمال والنعومه
ما يدري انك مثل الثور بحلبه المصارعه
ريم بغرور تلعب بشعرها : محترررررره
وبعدين ليه تشتميني علشان اخذ حسناتك
لذي الدرجه تحبيني ؟؟
الجوري : انا ما شتمتك انا قلت ترفسين مثل
الحمار
وبعدين اصلا انا اخاف اذا قلت عنك حمار يزعل
الحمار هههههههه
ريم فتحت عيونها بقهر : سخيفه
الحين رح اتصل بأمك واقول لها الجوري ما درست
جالسه تقرأ بقصص عالميه للكاتبه ريم
طالعتها الجوري باستصغار : لا يا شيخه
مره وحده كاتبه وعالميه كمان
حطت يدها على قلبها وبتمثيل
لا لا قلبي الضعيف ما يستحمل شهرتك
وبغرور
اقول روحي تلايطي اصلا انا راجعه عالبيت
وقفت الجوري واتصلت بأمها تخبرها ترسل السواق
اشرت لها ريم انها ما ترجع بس طنشتها
الجوري واتصلت
طالعتها ريم بقهر وقالت حتى تغيزها بعد ما قفلت الخط : كأنك سمنانه شوي خففي اكل
انا متأكده تاكلين اكل اخوانك كله
وبعدين لا تصيرين مثل كائن حي له اربع معدات
الجوري اشرت على نفسها : قصدك اني بقره ؟؟؟
ريم تمثل البراءه : لا مو قصدي انا انبهك بس لا تصيرين مثلها
طالعت الجوري نفسها ولوت بوزها : احسن منك يالعصله
مسكت عبايتها ولبستها
وجلست تعدل بالشيله
ريم وهي تطالعها : طيب اقعدي شوي
الجوري جهزت نفسها : لا تأخرت كثير من الصبح وانا عندك
والحين اذان المغرب
وعقلي شوش من كثر المذاكره وابتسمت
ريم بجديه : جوري ليه انت غبيه كذا بالدراسه
؟؟؟
فتحت الجوري عيونها باستنكار : انا غبيه ؟؟
وتقولينها بوجهي وفي بيتك بعد ؟؟!!!
بعدها ارخت ملامحها بمرح وردت
وش جبتي شي جديد
ما اقدر افهم هذي الطلاسم للي بالكتب
ما ادري من وين يجيبونها
خطيبي يقول لي انت تاكلين تبن قبل ما تنامين
ريم ضحكت : ههههههههه مسكين رفعتي ضغطه
وهو جلس اكثر من 3 ساعات يشرح لك بالمسأله
وبالاخير ما فهمتي ما ينلام ههههههه
الجوري بابتسامة : وقتها مسكني من اذني وشدها
وهو يشد على اسنانه : انت وش نوع التبن للي تاكلينه ؟؟
قلت له بعباطه : حشيش
رد علي بعصبيه : انا الحين رح احش رجولك
ريم وهي تاخذ نفس من الضحك : ومبسوطه على غبائك ؟؟؟
الجوري : مبسوطه على الاخير
ربي خلقني كذا
قاطعهم رنين جوال الجوري
ناظرت ريم : يالله سلام هذي ماما وصلت
ريم مدت بوزها : انقلعي يا نباشه
ضحكت الجوري وهي عند الباب : يوم السبت رح افتح لك تحقيق واستجواب للقصه
في اشياء كثيره ابغى استفسر عنها
وقفلت الباب وطلعت
جلست ريم على السرير بهدوء
تحس بالهدوء عم المكان .......

دخلت امها الغرفه بهدوء بعد العشاء وطالعت ريم
جالسه على السرير وبيدها كتاب نادتها بصوت ناعم : ريم
رفعت ريم نظرها لامها وابتسمت : نعم ماما
اقتربت منها ساره وجلست على طرف السرير :
كيف الدراسه ؟؟ تبغين مساعده ؟؟
ريم بهدوء : لا المواد سهله
ساره بتشجيع : شدي حيلك يا ماما ابغى تنجحين بالثانوية وتكونين من الاوائل وتدرسين طب
وتعتمدين على نفسك
وبتردد
ما تضمنين الدنيا وش مخبيه لنا
لا تخلين الدنيا تكسرك خليك قويه واعتمدي على نفسك
ابغى اشوفك اشطر دكتوره بالعالم
ريم رمت نفسها بحضن امها وهمست : ان شاء الله

بادلتها ساره الحضن ومسحت على راسها
يحنان
ابعدت ريم نفسها بشويش وناظرت امها : ماما
اتصلت شوق بي علشان اروح معهم على السوق
باكر بعد المغرب
ساره مسحت على خد ريم بحنان : يا ماما
انا ما احب تطلعين مع بنات خالك لانك تعرفين
حركاتهم
حتى لو ما عملتي مثلهم الا انهم رح يعطونك سمعه
سيئه صح والا لا
ريم : صح
وش اقول لها ؟؟؟
ساره صارت ترتب شعر ريم : قولي لها تبغين تدرسين
وبحزم
لا تنسين انت ثالث ثانوي
وعندنا هدف ولازم نحققه
ريم حركت راسها بالموافقة : ان شاء الله
طالعت ريم عيون امها تحس الحزن فيها
ولاول مره تسألها : ماما وش للي مضايقك ؟؟
ساره ابتسمت بألم : ما في شي مضايقني
ريم اقتربت من امها : ليه دايما تكونين مصره
تخلين بيني وبينك حاجز ليه ؟؟
باست ساره ريم على خدها : ما في حواجز
المهم اهتمي بنفسك
واهم شي مستقبلك
بعدها وقفت وطلعت بهدوء
كانت ريم تناظر زول امها وتحس كل يوم تحس
امها مجروحه
بس ما تدري وش السبب

--------------------------------------

تم مشاركة الفصل من تطبيق روايات