"ألم أعهد إليكم يا بني آدمَ أن لا تعبدوا الشيطان!"
قلبي بيترجّ حرفيًا وعبد الباسط عبد الصمد بيكمل ويقول "وأن اعبدوني" بحس انه صوته نازل من السما كده، مفيش شيخ بيأثر فيا زيه، سورة يوسف مثلًا كان أول واحد أسمعها بصوته، فمبعرفش أسمعها غير بصوته.
- صليتي إمبارح ؟
- سيبت المغرب علشان..
- هو المغرب مزعلك في حاجة، بتسيبيه كل يوم ليه! أعمل فيكِ إيه؟
- بوسيني.
بوستها من خدها - ها اللي بعده.
- جيت تعبانة والله فنمت.
- يا أسماء يا حبيبتي كله إلا الصلاة، الصلاة لأ، احنا بنكون تعبانين أوي على فكرة بس لو حد بنحبه اتصل بينا بنقوم بسرعة وبنرد، لو ضيف عزيز شوية وجه يقعد معانا بنصحاله واحنا فرحانين، لو فيلم بنحبه شغال بنقعد قدامه، فالفكرة مش في التعب خالص، الفكرة في الشيء اللي بنتعبله، صح ولا لأ ؟
- صح.
- المرة الجاية هلسعك بمعلقة بجد.
- الله يكون في عونه أحمد والله.
قلبي اتقبض - أسماء !
- آسفة والله، الكلمة خرجت كده لوحدها مقصدش.
بصي لملامحك ولنفسك، ينفع اللي بتعمليه في نفسك ده؟ عيونك دبلت ودماغك طول الوقت مصدعة من التفكير، مش كفاية؟
- بتعملي ايه؟
- كنت بحفظ قرآن وإنتِ؟
- كنت بتخانق مع أحمد، ضربني على قفايا من غير ما أعمله حاجة.
- ربنا يخليكم لبعض.
- لا يا اختي ميخليهوش ليا.
- اخص عليكِ يا أسماء ربنا يحفظه.
- بتحبيه أوي.
- اقفلي يا مُتخلفة.
- سيبك من إني اخته، أنا صاحبتك.
- علشان خاطري متتكلميش في الموضوع ده.
ما هو كان طبيعي علشان بشوفه كتير، وطبيعي علشان أسماء بتكلمني عنه كتير، هي وقعة يا رب وهقوم تاني والله، انشغلت بالحاجات دي أنا عارفة، هفوق لنفسي وأرجعلك كالعادة صدقني.
- حنان حنان حنان.
- نعم نعم نعم.
- ما حُكم تارك الصلاة؟
- سيبتِ المغرب كالعادة صح؟
- لا دا أحمد اللي سابه.
قلبي دق أوي - هو بدأ يصلي؟
- بقاله 3 أيام.
- لوحده كده؟
- مش عاوزة أحبطك بس هو يومين وهيكسل تاني.
- متقوليش كده بالله، هيثبت المرة دي إن شاء الله.
- هو لو ثبت يا قمر هترضي عنه؟
- هديله قلبي وفوقيه بوسة.
- بوسة يا شيخة حنان؟
- لا بوسة إسلامية متفهميش غلط، اللي هي على الهوا دي.
وإنتِ مالك يا حنان بيصلي ولا لأ، هو كله على بعضه مش نافعك.
- بصي بجد دي آخر مرة هطلب منك الطلب ده، متجبيش سيرة أخوكِ قدامي تاني، أنا قررت أبص لحياتي.
- استني بيكلمني في حاجة وجيالك.
- بيقولك ايه؟
-...
- أسماء بيقولك إيه.
-...
- يا أسمااااااء.
- جعان عاوزني أعمله أكل.
- طب ما تقومي.
- إنتِ عبيطة، أنا عطشانة من المغرب ومكسلة أقوم.
- قومي تتشكي في صرصور ودنك.
- هو كلكوا عليا ولا ايه!
- قومي علشان خاطري متنيمهوش جعان.
- طفحه.
- حرام عليكِ، طب قومي علشان خاطري.
- ما تتجوزيه وخلصينا من قرفه بقى.
- إنتِ فكرك لو قالي أقوم أعمله أكل في وقت زي ده هقوم، طفحه.
- عنيفة أوي.
