- ياأسماء فكري
- قوليلي مبروك
- إستني بس، ترتبطي معنديش مشكلة، تتخطبي برضو معنديش مشكلة، انما كتب كتاب!
- برضو قوليلي مبروك
- هتصحي من الساعة 6 تجهزيله الفطار علشان شغله، هتروقي البيت لحد مايجي وبعدين تعمليله غدا، هيجي ياكل وينام ويسيبك، على مايصحى هتحضري العشا، دا انتحار
- بحبه
- هيبقى في خناق كل يوم علشان فردة شرابه اللي ضايعة
- هدور عليها معنديش مشكلة
- هتفضلي طول اليوم تروقي وهو هيجي زي سيد قشطة من بره يرمي هدومه على الأرض
- هشيلها وانا ببتسم عادي
- ياأسماء مش هيكون في وقت نخرج انا وانتي، كل حاجة هيقولك عليها لأ
- بحبه قولت
- طب اقولك على الكبيرة ؟ مش هتعرفي تكراشي على حد تاني، يعني لو في ولد حلو معدي هتبصي في الأرض
- ايوة مانا كده كده بشوفهم وانا باصة في الارض اصلا !
- ياحبيبي فكري
- تكوني هنا الساعة 3 بكرة، علشان هيصلوا العصر ونكتب الكتاب
- أحلامنا طيب
- الساعة 3
- طموحاتنا اللي بتترمي على الأرض دي
- 3 بالدقيقة
- خلاص كده !
- متتأخريش
اللهم آجرها في مصيبتها، يالهوي ! كمان سنة بطنها هتكبر ، يالهوي يالهوي ! وكل كلامها معايا هيبقى على شغل البيت وتعب شغل البيت وحفضات البيبي ! ياأسماااااء
- اسماء انتي صاحية ؟
- ايوة ياحبيبي
- فكرتي ؟
- هعملك بلوك
هي الناس بتتجوز ليه ! محدش بيتعظ من اللي بيحصل في غيره أبدًا، لحد النهاردة ولسه في ناس هبلة بتتجوز ! ، لا بجد يعني ، واحد بيشتغل وبيصرف على نفسه وبيخرج مع صحابه وحياته لطيفة ، ليه يتجوز ويجيب النكد لنفسه ؟ بعد ماكانت حياته مثالية وراجع متأخر محدش هيقوله " سايبني لوحدي كل ده ليه ! " ، يرجع وهو شايل حفضات البيبي ! حد يعقل الناس دي
لبست وروحتلها ساعة بدري، كنت مستنية المح في عيونها خوف، يابنتي انتي داخلة مفرمة اقسم بالله فرحانة كده ليه !
- ساعة كمان وهتنادى بإسمه
قلبي دق معرفش ليه، بس رخمت عليها - ليه اسم ابوكي ماله !
- هقوله بحبك عادي بقى، انا مستنية الكتاب يتكتب علشان اقوله بحبك
- اللهم طولك ياروح، ياحبيبتي مش ده الجواز والله، هو اول شهرين مرقعة وبعد كده هيصحيكي بمية ساقعة علشان تحضريله الفطار، طب والله هما شهرين بالظبط وهتلاقيه اتحول فجأة لكائن برجوازي بكرش
كنت ماسكة ايدها وهو ماسك المايك بيردد ورا المأذون، قلبي كان بيدق بطريقة غريبة، وللأسف كنت فرحانة لدرجة اني عيطت، مش بس فرحة ليها، بس اتمنيت اني الاقي شخص واقف الوقفة دي واسمعه بيردد نفس الكلام ليا، لا ياعم استغفر الله مش عاوزة لأ
أول ماخلصوا حضنتها جامد، مهتمتش وهما بيقولولي "المفروض زوجها يحضنها الأول سبيها" نعااام ؟ هو هيحضنها قدامنا ، لا ريلي نعاااام ؟
لما حضنها حسيت الف احساس مع بعض، فرحة متتوصفش ليها، لغبطة مشاعر عندي انا، فجأة لاقيت الموضوع حلو جدا، وغيرة منه، صاحبتي الوحيدة بتتحضن عادي كده ! ولا ابعد عنها يالا
