- ماتحبنى ياأحمد بالله عليك
- واحبك ليه ؟
- علشان احبك
- ايوة ماانتى بتحبينى اصلا
- يبقى ترد الجميل وتحبنى
اصلا عادى ، بس هو اكيد قلبه هيحن ويحبنى ، ماانا بحبه فلازم يحبنى ، ماما قالتلى ان الحب لازم يترد وانا مبحبش غيره فمش هيترد من غيره
- عارفة ياأسماء ، هو اطول منى ب ٢٠ سم ، اه والله ، ايده اليمين فيها علامة كأنه كان متعور زمان وهو صغير ، دقنه فيها ...
- احيه ! انتى وصلتى لدقنه !
- ماانا اعمل ايه غير انى ابصله ؟
- دقنه يااسعدية !
- ياأسماء انا بحبه
- ياحنان انتى مبتعرفيش تتعاملى مع الناس ، متعرفيش ف الدنيا غيرى انا واهلك ، هتتعاملى معاه ازاى ؟
- ماانتى بتتعامليلى
- يعنى ايه ؟
- مش انتى بتقوليلى اعمل ايه وبعمله !
انا فعلاً معرفش حد ، ومش عاوزة اعرف غيره معاهم والله ، هو وهما بس ، ونقفل الدنيا علينا ، انا مبحبش الناس اللى بره ، ماما بتقول الدنيا اللى بره مش حلوة ، وياهنتوسخ منها علشان نتعامل مع الناس ، يااهنقفل علينا دنيتنا علشان قلوبنا تفضل نضيفة , هدخله دنيتى بس والله ياارب ، ومش عاوزة حاجة تانى
- حبنى بقى ياأحمد
ابتسم - طب ذاكرى
- ماانت لما تحبنى انا هرتاح وهذاكر
- ياابنتى انتى كل مرة تقولى هذاكر معاك وف الآخر بنتعطل احنا الاتنين
- حبنى وانا اسيبك تذاكر
ساب القلم من ايده - حنان الحب مبيجيش كده
- اومال بيجى ازاى ؟
- مينفعش تطلبى منى احبك ، دى حاجات خارج ارادتنا ، مش بتيجى بالطلب كده
- لا بتيجى ، انا طلبت من نفسى احبك ونفسى وافقت
- يااربى ، انتى هتكبرى امتى !
- انا كبيرة ع فكرة ، وماما بتقول ان قلبى طيب اوى وهكون احسن ام ف الدنيا
- ماما بتقول ، بابا بيقول ، واسماء بتقول ، انتى عايشة برأيهم !
- ماانت مش بتقولى حاجة علشان اقول " احمد بيقول "
- عاوزانى اقولك ايه ؟
- عاوزاك تحبنى ، تقولى انا بحبك وهفضل معاكى على طول ومش هسيبك ابدا وهحميكى من اى حاجة
- وافرضى قولت كده وكذبت !
- لا مش هتكذب ، انا طلبت من ربنا ميدخلش ناس بتكذب ف حياتى علشان انا بكره الكذب ، وطالما انت ف حياتى يبقى مش بتكذب
- وانتى معتقدة ان ربنا استجاب ؟
- طبعا ، انا كل ماابطلب من ربنا حاجة بتتحقق ، ربنا بيحبنى وبيحقق كل اللى بتمناه ، اوقات ف حاجات مبتتحققش وماما بتقول انها لو اتحققت كنت انا هتضر وان ربنا بيمنع عنى ضرر بمنعه الاستجابة
- ماما تانى !
- حبها ياأحمد ماما طيبة اوى ، لأ حبنى انا الأول وبعدين حب الباقى
احمد مستحيل يكذب ، ماما بتقول ان ف ناس بيبان اللى ف قلبهم اول مابنشوفهم وبيبان عليهم اذا كانوا حلوين ولا وحشين ، ومستحيل النور اللى نور حياتى يكون بيكذب ، حتى اسماء قالتلى كده ، قالت انها اول ماشافتنى ارتاحت ، علشان انا جوايا حاجة حلوة ، وانا حسيت كده معاها ، الناس الحلوة بتبان والوحشة بتبان
- اقولك سر ياأحمد ؟ انا بقيت اكتبلك جواب كل يوم قبل ماانام
- ليه ؟
- علشان انا بحبك ، ولما انت تحبنى هجبهم كلهم ليك
- ولو محبتكيش ؟
شهقت - اوعى ياأحمد ، اوعى متحبنيش
- اعتقد لو بقى عندى بنت مش هتكون بالبراءة دى
- يعنى انا حلوة ؟
- جدا
- وعيونى حلوة ؟
ضحك - انتى حلوة بس انا مقصدش الحلاوة دى ، قصدى ان ف نور جواكى ، ف دنيا حلوة اوى جواكى يااحنان
همست - مخبية فيها الناس اللى بحبهم
- مين الناس اللى بتحبيهم ؟
- انت الناس اللى بحبهم
حرك ساعته - ومين تانى ؟
- انت وأسماء وانت وماما وانت وبابا وانت
ضحك - انا دول كلهم !
- عارف لو حبتنى ياأحمد ؟ انا هفرح
- ياااه هتفرحى مرة واحدة !
- آه والله هفرح ، ومش هزعل تانى ابدا ، هو انت لما تحبنى وانا ازعل هتحضنى ؟
- هو مينفعش احضنك وانا مش بحبك ؟
- اسماء بتقول انك لو عملت كده يبقى هتعمله شفقة مش حب ، وبتقول ان الشفقة حاجة مش حلوة
- وحنان بتقول ايه ؟
- حنان بتقول حبنى ياأحمد
انا عمرى ماافقدت حاجة ف حياتى ، مدوقتش وجع الفراق او الموت ، ماما بتقول ان الموت اشد وجع ممكن انسان يحسه ، الفراق صعب وده اصعب فراق ، وبتقولى انها بتدعيلى انى مجربش فراق حد احبه ، انا عمرى مااتوجعت ، معرفش يعنى ايه وجع اصلا ، بس اوقات بحس ان حاجة بتمسك قلبى وتضغط عليه لما احمد بيحكيلى عن بنات ، اسماء بتقول انه بيعمل كده علشان اغير
- لما تحبنى ونتجوز ، هطلب من ربنا يرزقنا بنوته الاول ، ماما بتقول ان البنات لما بتيجى الاول بتجيب رزق كبير معاها
- مااحنا ممكن نجيب البنوتة من غير ماانتجوز
- ازاى بقى !
- لا الموضوع طويل ، هشرحلك بعدين
- لما تحبنى ؟
- يااربى ، ياابت اتهدى بقى
- حبنى طيب
طب اقول لمين يقنعه يحبنى ؟ ها ؟ اقول لمين ؟ ادعى ربنا ! مش عارفة ليه معلمتهاش ولا مرة ، بخاف ادعى ، مش عارفة بخاف يكون ضرر وربنا يمنعه
هقول لأسماء تكلمه
- علشانى يااسمسم
- قولت لأ
- هيسمع كلامك والله
- يااحنان افهمى ، محدش بيقول لحد حبنى ، مفيش حد بيحب كده
- طب جربى وهو هيسمع اكيد
- اقوله حب صاحبتى الهبلة ؟
- اسماء انا مش هبلة
- لأ هبلة ومش فاهمة حاجة ف الدنيا ، ومينفعش تمشى لوحدك ، وبتخافى تمشى لوحدك اصلا
- والله هزعل منك وهنام زعلانة
- شوفى حتى كلامك اهبل ، يعنى انا لو مش بحبك كنت هقولك نامى زعلانة ايه المشكلة
- انام زعلانة ! هو ف حد بيسيب حد ينام زعلان ! ماما بتقول ان بعد الشر ممكن يموت واحنا مش هنسامح نفسنا طول العمر علشان سبناه
حضنتنى - انتى خسارة ف الدنيا دى والله
- متنيمنيش زعلانة بقى وقوليله ، قوليله هى بتحبك فحبها ، وقوليله انى اخترت اسم البنوته خلاص وحرام ميحبنيش يعنى، قوليله كمان انى والله ماهزعله ابدا وهفضل احبه ع طول وانى هسمع كلامه دايما ، قوليله يااسماء انى والله بدعيله اكتر مابدعى لنفسى ، حتى دعواتى لنفسى بتتلخص فيه
- ليه هو طيب ؟ ممكن يجيلك غيره ويحبك من غير ماتطلبى ده
- لأ ، أحمد بيهم كلهم ، احمد بالنسبالى كلهم ، اوقات بحس ان مفيش رجالة غيره اصلا
- مفيش رجالة غيره ؟ هو رجالة مرة واحدة !
- ايوة هو رجالة كتير ف بعض
أسماء قالتلى انها اتفقت معاه يقابلها ، فتحت الريكوردر عندها من غير مااستأذن ومسألتش ماما قبل مااعمل كده لانى كنت عارفة انى بعمل حاجة غلط ، فتحته وفهمتها انى هستناها بره ع ماتخلص بس انا مشيت اول مااشوفته ، لما اسماء تقنعه ويحبنى هعتذرلهم علشان عملت كده من غير مااستأذن ، انا مش متخيلة فكرة انى همسك ايده عادى وامشى معاه كده عادى
روحت يومها ونمت كتير اوى ، وصحيت تانى يوم وانا فايقة ، توقعت انى هلاقى اسماء اتصلت كتير جدا بس مااتصلتش ، حتى مكلمتنيش اول ماوصلت الكلية زى ماامتعودة تعمل ، روحت عادى وهى مفتحتش الموضوع ، لما خرجنا اخدت منها الموبايل وكتبها وطلبت منها تجيب لينا حاجة نشربها ، عارفة والله ياارب انى بعمل حاجة غلط ، وانى مكنش ينفع افتح حاجة تخصها من غير مااعرفها بس مقدرتش
الريكورد كان طوله ساعتين ونص ، اكيد اسماء قفلته صدفة وهى بتقفل الابليكيشنز ففضل المدة دى كلها ، كلامهم مع بعض كان ف ١٤ دقيقة بالظبط ، كل اللى ودنى سمعته رده هو عليها ، كانت بتقوله انى بحبه
- ايوة عارف انها بتحبنى ، بس ده مش مبرر انى كمان احبها
- انا فاهمة ده والله ، بس ايه العيب فيها طيب ، قولى سبب اقدر ارد عليها بيه
- انتى هتوعدينى الاول ان كلامنا ده هى متعرفهوش ، عيبها الوحيد انها من غير عيوب ، انا مش هتكسف اقول انى هخاف ارتبط بيها ، مش قد انى اخاف عليها من الناس واخاف عليها من نفسها كمان ، حنان فاهمة ان كل الناس حلوة ، قالتلى مرة " يعنى ايه ناس تكره وناس تحقد وناس تإذى ، مفيش ناس كده "
اكبر عدو لحنان نفسها ، هى مش فاهمة وانا مش هقدر افهمها
- انا معاك انها طيبة زيادة عن اللزوم وبيتضحك عليها ، بس انا مثلا معاها طول الوقت وطول الوقت انا اللى بتكلم وبدافع وبخطط لكل حاجة ليا وليها ، لو ارتبطوا دا هيكون دورك ، والموضوع مش صعب ، هى طيبة وهبلة وشايفة الدنيا بفراشات نعملها ايه !
- هى مدخلتش ف علاقات قبل كده ؟
- متعرفش غيرى
- لا أقصد انها حبت
- لأ ، انا بس اللى كنت بكراش ع الناس واحنا صغيرين
- الدنيا صعبة ياأسماء وانا محتاج حد يحارب معايا ، مش شخص احارب ليا وليه
- طب جرب ولو محبتهاش خلاص
- أنا آسف والله انا مش هقدر ، ومعتقدش دا هيقلل من رجولتى ، انا مش قد مسئوليتها
مسئولية ! انا مسئولية ! انا تقيلة ع الناس اللى حواليا ؟ هما شايفنى هبلة ؟ مش انت خلقتنا علشان نحب بعض ياارب ! مش احنا المفروض منوسخش قلوبنا بالكره ! والمفروض نحب الخير لبعض ! انا كده هبلة ازاى وانت امرتنا بكده ! هما اللى وحشين ، هما اللى مش فاهمين اننا اتخلقنا وقلوبنا نضيفة والمفروض نوصل لآخر الطريق كده ، انا مش هبلة ، انا بس عاوزة افضل زى مااربنا خلقنى ، هو ليه قال عليا مسئولية ؟ انا مش عاوزة حد يدافع عنى او ياخد حقى ، انا هطلب من ربنا يجبلى حقى ومش هطلب من أسماء او احمد حاجة ، يبقى انا مسئولية ليه !
لما وصلت سبت ليها حاجتها ومشيت ، كانت ماشية ورايا بتناديلى والقهوة وقعت منها بس انا موقفتش ، انا مش مسئولية ، انا مينفعش اكون تقيلة ع حد ، انا مش هبلة الدنيا هنا اللى اتغيرت ، انا مش هبلة ياارب
ركبت وسبتها ، لما نزلت مشيت كتير اوى واول مرة ف حياتى اشوف الدنيا كبيرة كده ، يااربى ! كل دول ناس ! الدنيا واسعة ليه كده ! وليه الناس دى كلها !
ماما اتصلت بيا وفتحت ع طول
- اتأخرتى ليه ؟
- ماما هو انا مسئولية ؟
- يعنى ايه ؟
- انتى بتخافى عليا وخايفة الناس تضحك عليا ؟
- فين أسماء ؟
- بتسألى عنها ليه ؟ هو انا مش بعرف اتكلم ؟
- هى سابتك لوحدك !
- وفيها ايه لما تسيبنى لوحدى ؟ انتى فكرانى هبلة وصغيرة ! انا مش هبلة ومش مسئولية
- انتى فين يااحنان
بصيت حواليا وعيطت - انا توهت !
مكنتش قادرة اخد نفسى ، كنت بعيط زى الهبلة ، هو لازم اكون بخربش علشان يحبنى ، علشان نحارب زى مابيقول ، ونحارب ليه ، ماحنا نطلب من ربنا يجيبلنا حقنا وخلاص ، لو مأخدنهوش هنا ، ناخده فوق ، نحارب ليه ياأحمد !
ماما قالتلى مرة ان اللى زيى واقعين من ايد الدنيا ، علشان اللى زيى مفيش ليهم صوت ، ولأول مرة ف حياتى اتمنى اصرخ ، اتمنى يكونلى صوت
كنت عارفة ان أسماء هتحاول تخرجنى من اللى انا فيه ، بس انا كنت محتاجة ابقى لوحدى علشان افهم ، ف حاجة جوايا رافضة تعترف انى كنت غلط ، انا والله مش هبلة ومش قادرة اقتنع ان المفروض اكون بضوافر ، انا مش عاوزة يبقالى ضوافر
الساعة ٧ الصبح الموبايل رن ، كنت لسه صاحية
- صباح الخير
عرفته من صوته ، كنت بحلم بيه دلوقت وعاتبته كتير ف الحلم بس معيطش فعيطت لما كلمنى كإنى بعوض
- مش هتكلمينى ؟
-..
- طب مش عاوزة تذاكرى ؟
- بذاكر
- يعنى بتشغلينى انا وتذاكرى انتى !
- لأ مش هشغلك تانى ، ذاكر
- ومش هتشغلينى تانى ليه ؟
- علشان انا مش عاوزة اكون ضرر لحد
- ضرر ! طب انا عاوز اشوفك
- مش هينفع علشان انا بذاكر
- مالك يااحنان ؟
- مش عارفة ، أنا تايهة وحاسة انى.. متشغلش بالك
وقفلت ، كنت عارفة انى هتحول وكنت خايفة من لحظة ادراكى اننا كبشر سهل نتحول لوحوش ، وان تركيب الضوافر اسهل شئ ، بس انا برضو مش عاوزة اكون كده ياارب
اتقابلنا انا وأسماء ف الكافية اللى كنت بذاكر فيه انا واحمد ، قالتلى هنذاكر وكرهت نفسى وقتها لما استنتجت انها مش عاوزانا نذاكر ، كنت حابة نفسى وانا ساذجة مش فاهمة تفكير اللى حواليا
حسيت ريحته قريبة وخوفت اتحرك أشوفه ، أسماء وقفت علشان تمشى فإتأكدت انه موجود ، كنت شيفاك أمان الدنيا ياأحمد ، كنت شيفاك بيت هادى وسع جسمى !
قعد قصادى - طب وبعدين ؟
- بعدين ايه ؟
- زعلانة منى ليه ؟ ومبتتكلميش ليه ؟
- أبدا مش زعلانة
- طب مش هتقوليلى حبنى ياأحمد ؟
- الحب مش بيتطلب
- لأ بيتطلب عادى جدا
ابتسمت - صدقنى انا مش بيتطلب
- انا عاوز اعرف ايه اللى حصل
- وتعرف ليه ؟ هتحارب علشانى ؟ الدنيا كلها مزعلانى ، حاربها
- اول مرة تتكلمى عن حرب وزعل
- ماهو الدنيا طلعت من غير فراشات
- كان فيها فراشة بس تقريبا بغبائى قصيت جناحاتها
- تقصد فوقتها
- الدنيا هنا مش حلوة ياحنان ، لازم تقتنعى ان ف ناس بره اتخلقت علشان تإذى وبس ، اخلقى عالم ليكى انا مش معترض بس مينفعش تتعاملى مع الناس كده
- اعتبرنى هبلة
- لأ مش هبلة ، طيبة
- لأ دى ولا دى ، انا مسئولية ومتمناش حد يشيلها
- شيفانى ضعيف !
قلبى دق - لأ بس الدنيا صعبة واكيد محتاج حد يحارب معاك
- ماانتى هتحاربى معايا
- ازاى بقى !
- هتحبينى
جبل الوجع وقع من ع قلبى ، واتمنيت وقتها اضحك ، اتمنيت احضنه
- طب ولما احبك كده هحارب معاك ازاى !
- انا استقوى بيكى فأكون قوتك
كنت هبتسم غصب عنى - مش فاهمة عاوز ايه دلوقت ؟
- حبينى بقى يااحنان
ضحكت - الكلمة دى بتاعتى ! ، مش هندخل ع شغل بعض
- يعنى هتحبينى ؟
- وأحبك ليه
- علشان أحبك
- بس أنت اصلاً بتحبن.. احيه ! انت بتحبنى !
- دا لا هبلة ولا طيبة ، غبية
" حتى قبل أن ألتقيك ، لم نكن أغراباً "
#أسميته_أحمد
#حنان_سعيد
