دا أنا مبعملش شيتات للكلية زي مابعمل اللي هو بيطلبه مني، يقولي دي تتكتب 10 مرات ياحنان، حنان تكتبهم 20 مرة، تدري ليش ؟ لاني مشوفتش تربية
- بتاخدي كورس خط ! طب ماتاخدي حاجة تفيدك
- ماهو انا قررت افكني من الكلية خالص وابص للكتابة بقى، فقولت احسن خطي علشان اكتب الجمل بتاعتي وكده
- تفكك من الكلية ! انتي هبلة يابت !
- ايه ياأسماء ؟ احنا بنشيل مواد أصلا مالك محموقة اوي كده ليه !
- معلش اندمجت، والكورس ده هيخلص امتى ؟
- مش هيخلص ان شاء الله
- يعني ايه ؟
- يعني بإذن واحد أحد هتجوزه ونكمل الكورس في بيتنا
- الكورس بدأ من اسبوعين لحقتي تعجبي بيه !
- لأ مش أعجاب انتي هبلة انا اعقل من كده
- طالما بتتكلمي بفخر اوي كده يبقى حبتيه
- أنا يابنتي !
لأ لأ انا فرحانة بالموضوع بس والله، وفرحانة أنه اسمه أحمد، هما أيوة نص بنات مصر واخدين على قفاهم بسبب الاسم ده، بس معرفش برتاح ليه لأي ولد اسمه أحمد، بحب الأخد على القفا تقريبا
- في تحسن أهوه الحمد لله، بصي بقى الحرف دا بيتكتب ازاي
كتبه وحاولت أكتبه بعده، انا بقول اتدرب في بيتي واحافظ على كرامتي أحسن
- معلش اكتبه تاني
بصلي شوية - انتي شبه بنت انا متابعها اوي، معرفش ازاي
بيتابع بنات ! انا كنت هبدأ احبك بجد ! دا انا اجيبك من شعرك بنات ايه اللي متابعهم !
ابتسمت برخامة - الحرف، الحرف بيتكتب ازاي
يعني انا يوم ماافكر أحب يطلع بيتابع بنات الناس ياربي، ايوة ايه المشكلة انه بيتابع بنات يعني، معرفش بقى، انا اتابعله البنات واقوله بيعملوا ايه، هو ميتابعش بنات، واتابعله الولاد كمان واقوله بيعملوا ايه، هو ميتعبش نفسه ويتابع ولاد.
- طلع خاين ياأسماء
- احنا لحقنا ! قولتلك بلاش اسم أحمد، 3 من صحابي واخدين على قفاهم بسبب الأسم ده
- خلاص بقى، اسميه عبدالرحمن طيب ؟ حلو عُمر مثلا ؟ ولا مُصطفى ؟
- كنتي بتحبيه امبارح !
- جرحي بيلم بسرعة
انا هركز في شرحه بس بعد كده، انا رايحة اتعلم صح ؟ خلاص، سبيه بقى مع البنات اللي بيتابعهم خليهم ينفعوه
- كله غلط، كله مكتوب غلط
كنت عاوزة اقوله ايوة ماانت كسرت قلبي امبارح فمتأثرة شوية
- مش عارفة اكتبه والله، حاولت كتير امبارح ومش عارفة
- طيب بصي لإيدي
طب ماابص لعينك وتبص لعيني ويبقى زيتنا في دقيقنا وكده، زيت ايه وزفت ايه على دماغك، كان بيخونك امبارح ياحيوانة، يالهوي حد يوقف عقلي هضحك قدامه وافضحكم
- أوبس ! بلاش الحرف ده ندخل على اللي بعده، مش هعرف اعمله
ساب القلم من ايده - انتي اسمك حنان ايه ؟
- ليه ؟
- بتعرفي تكتبي ؟
ايه السؤال الغبي ده، ماانا قدامك اهوه مش عارفة اكتب، لو بعرف كنت جيت أخدت كورس ليه ! ، غبي بس قمر
- لأ مش بعرف
رفع حاجبه - شبهها اوي والله
لأ حاجبك لأ، هقولك بحبك واوديك في داهية والله
- شبه مين ؟
- بنت اسمها حنان سعيد بتكتب، بس انتي شبهها في الشكل اوي، وكلمة أوبس دي بتقولها كمان
يانهار حب، هو انا البنات اللي متابعهم، تابع بنات يابشمهندس طارق ميهمكش، قول بقى انك بتكراش عليها علشان أقولك وانا كمان، قول يلا متنحش
- هي اللي شبهي وهي اللي بتقول أوبس زيي
- انتي تعرفيها ؟
- معنديش غير آسك وواتس أصلا، مش بقرأ لحد
- ليه القراءة حلوة
- أيوة ماانا بقرأ كتب، أقصد مش متابعة كتابة لحد على أبليكيشنز يعني، بس هي شبهي أوي يعني ؟
- جداً، بس تقريبا عيونها لونها أخضر مش عسلي زيك
- لأ بس هي عيونها لونها عسلي مش أخضر
- لأ أخضر أنا متأكد
- والله عسلي
- وانتي عرفتي منين ؟
- ايه !
- ايه انتي.
باااس، انا انزل قصة اقصده بيها وهو هيفهم ان شاء الله، وبدل ماأكتب هاشتاج أسميته أحمد، أكتبله بحبك في الآخر أجيبه الأرض
- آن آن آن، طلع عارفني
- آن آن آن، وايه اللي مفرحك في كده !
- متبقيش بايخة بقى، والله ماعارفة فرحانة ليه، بس فرحانة يعني
- هو حلو ؟
- يالهوي أوي، بس مقصدش الشكل والله، هو حلو كشكل مقولتش حاجة، بس عنده حلاوة تانية اللي هو راجل وعنده كاريزما كده، حلو ايوة
- طب ايه ؟
- استني عليا اتعلم الخط بس، وهنزل حاجة هنا أخلي قلبه يقف
- مقولتيش ليه صح انك حنان سعيد وكذبتي ؟
- اتحرجت، اصل ملهاش لازمة، او مش هستفاد حاجة، مش عارفة والله ياأسماء
أنا والله بهزر، لا بحبه ولا حاجة، هو حلو جداً ويتحب، وشخصيته حلوة أوي، بس أنا بهزر يعني علشان أنا تافهة ومبعرفش أعيش من غير هزار.
- أنا حاسة اني بقيت آخد وقت أقل في الكتابة
- وأنا حاسس ان خطك اتحسن
- حاسس ؟ هو بالإحساس ؟
- انا بتريق على كلامك، ايه حاسة اللي بتقوليها في كل كلامك دي، اسمها أنا بقيت آخد وقت أقل في الكتابة، وده الطبيعي أصلا، بعد كده هتكتبي بكل سهولة.
- هو بس علشان بكون حاسة .. قصدي بحس ان .. يوه متعودة على الكلمة
ضحك - حاسس اني هتعدي منك
- ياوعدي !
- نعم ؟
- زي يالهوي كده بس اشيك
- لأ نعم علشان حاجة تانية، أنا هتجنن على فكرة، يعني نفس اسمها وشكلها وطريقتها في الكلام، انتي معندكيش أكونت فيس بجد !
- مش انت متابعها ؟ عرفت طريقة كلامها منين !
- بيبان من كتابتها، يعني مثلا هي بتنزل قصص وبيكون اسلوبها باين فيها.
- وهي بتقول بحس في كل كلامها ؟
- وبتقول ياوعدي كمان
- كمان !
- ومبتعرفش تقعد غير وهي بتضغط على حاجة في ايدها زي مابتعملي
- بس هي مبتمسكش في الحاجات غير لما بترتبك بس
- وعرفتي منين ؟
- ايه !
- ايه انتي ؟.
حاسة اني بلعب والله، عاوزة سبب منطقي لفرحتي دلوقت، انا والله العظيم مش بحبه، بس فرحانة ليه، أفهمها دي.
- غاندي بيقول ان الرسم أول حاجة لازم الطفل يتعلمها، علشان خطه يبقى حلو
- يعني اتعلم الرسم ؟
- لأ، عاوز اوصلك ان الخط رسم
- أنا بحب الرسم بس مش بعرف أرسم
- انتي عاوزة تتعلمي الخط ليه ؟
- في جمل بتعجبني وبكون عاوزة أكتبها، وأنا أصلا خطي وحش
- استني هوريكي حاجة
وقف وفتح درج المكتب، دور شوية وبعدين خرج لوحة، جابها وفتحها قدامي كان فيها 3 جمل بخط كبير
الأولى والتانية لعمرو حسن " أنا الطفل اللي كان في عنيكي متشعبط، يشوفك روحه تتلغبط، وقلبه ابن الحرام يضعف ويستعبط "
التانية " وايه الدنيا سوى عيونك ؟ سوى حضنك في الخوف ؟ "
والتالتة ل .. نعم ! ، كان كاتب " حتى قبل أن التقيك، نكن أغراباً "
شاولي عليهم - دول لعمرو حسن، والأخيرة دي لحنان سعيد
- بتحب عمرو حسن ؟
- وبحب حنان سعيد.
معرفش اتضايقت ليه ! ، هو انا هغير عليه منها ولا ايه ! من مين ياغبية، هو بيتكلم عنك، ايوة برضو يحبها بتاع ايه يعني، مايحبني أنا.
- والله العظيم !
- بجد حاولي تعملي أكونت وتتابعيهم
- انا عارفة عمرو حسن، معايا دواوين ليه
- وحنان هتعجبك برضو
- ماهي عجباك، كفاية
- اتضايقتي ليه كده ؟
- مش متضايقة ولا حاجة
- طب اكتبي الجملة دي " تسلل لقلبها بهدوء، وإلى الآن لا تدري من اي ثقب تسلل "
- دي لحنان سعيد
- وانتي عرفتي منين !
- ايه !
- ايه انتي ؟.
كتبت الجملة فعلاً، وكانت اول جملة ليا أكتبها بخطي، انجازي الأول يعني، بس اشمعنا الجملة دي ! انا لو عرفت الأكونت بتاعه هعمله بلوك، علشان الست حنان تنفعه اوي، يخربيتك هتخليني اكره نفسي
- طب انتي غيرانة من نفسك ولا ايه مش فاهمة
- ياأسماء ميقولش قدامي وبحب حنان سعيد، ميقولش قدامي كده
- انتي هبلة يابت ! طب مادي حاجة تفرحك طالما بتحبيه
- متقوليش بتحبيه، انا مش بحبه ولا هحبه، وخليها تنفعه بقى.
روحتله تاني يوم، وفرحت اوي انه عجبه الكتابة، كنت كتبت جملة بعدها " مد لي كفك التحفه، لم يعد بوسعي احتمال هذا العالم "
- دي لحنان !
- يادي حنان
- جبتي الجملة منين ؟
- ماهو صاحبتي طلعت متابعاها، وبتكلمها كمان، فقالتلي على الجملة
- طب بتكرهي حنان ليه بقى، دي حتى على اسمك
- واكرهها ليه ! مبكرههاش
- تعرفي انها نرفوزة زيك ؟ ومعرفش فرحان ليه انها تشبهك شكلاً
- لو بتحبها قولي وهقول لصاحبتي تعرفها وتولعوا انتوا الاتنين في بعض
- نعم !
- قصدي وتحبوا انتوا الاتنين بعض يعني
- مش حكاية بحبها، بحب أقرألها يعني، ولو أعرفها في الحقيقة هحبها فعلاً، هو بس علشان مينفعش أفكر أحبها ومفيش طريق بينا.
أقسم بالله واحد مهزأ، انا دمي محروق ليه دلوقت وعاوزة اعيط ! طب هو بيحبها وسايبني ليه يارب ؟ ماانا قدامه اهوه، يابني طب هي أحلى مني ؟ دمها خفيف أكتر مني طيب ؟ هي مبتعرفش تطبخ أصلا كمان، حبني انا وسيبها بقى.
- انتي فاهمة معنى الجملة ولا كتبتيها وبس ؟
- فاهماها طبعاً، مش معنى يعني اني مش عندي فيس اني مبفهمش
- مقصدش والله، طب اكتبي دي " ذات يوم جُرح كفه، فضمدت يدي ويده "
- وطبعاً دي لحنان
- عارفة انا بحب الجملة دي اوي، عارفة انتي احساس انك تتوجعي من وجع شخص، تكوني قريبة لدرجة ان الجرح اللي فيه يحتاج علاج منكم الاتنين ؟
توهت معاه - زي انهم يكونوا جسمين بروح ؟
- ارواحهم بتتشابك
قولت من غير ماأفكر - اذا كانت المعضلة تشابك أرواح فكيف تُفك الروح من الروح ؟
- حنان !
اتخضيت، معرفش كان بيناديلي أنا ولا يقصدها هي، اقصد يقصدنا احنا الاتنين بما اني أنا هي - أيوة ؟
- عرفتي ازاي الجملة دي ؟
- معرفش، خرجت مني كده
- تقصدي انك اللي كتباها ؟
- انا مبكبتش، الجملة جت كده معايا
بصلي شوية وكإنه خايف، شوية وخرج موبايله معرفش كان بيعمل فيه ايه، رفع الموبايل قدامي، كان مفتوح على بروفايلي
سألته - دي حنان ؟
- دي مش شبهك شكلاً ؟
- لأ شبهي
شاولي على الجملة - الجملة دي عندها
- عادي، توافق أفكار مش أكتر
- توافق أفكار، وكمان توافق سرد !
- عاوز ايه ؟
- معرفش
- هقوم امشى
- وطبعاً مش هتيجي تاني
انا فعلاً كنت مقررة مجيش تاني - مش عاوزني آجي تاني ؟
- عاوز أفهم علشان هتجنن
- تفهم ايه ؟
- تشبهيها ليه كده ؟
- ودي حاجة تفرح ولا تزعل ؟
- مش عارف، اكيد هفرح اني خلاص سهل اوصلها، واحتمال ازعل علشان غبي
- وعاوز توصلها ليه ؟
- بحبها
قلبي اتنفض، سكت شوية
آخد نفسي، وبعدين اتكلمت - بس انت قولت انك بتحب تقرألها بس
- دا علشان كنت معتقد اني مش هعرف اوصلها
- أوصلك بيها ؟
- تعرفي ؟
- أعرف
- تقريبلها صح ؟ علشان كده شبهها ؟
- انا بقابل ناس كتير شبههي، مش لازم يكونوا يقربولي
- طب هتقوليلها ايه ؟
- عاوزني أقولها ايه ؟.
قلبي كان واجعني اوي، يمكن احساسي بنفسي انه سابني أنا واختار بنت جزء مني، كنت حاسة اني مهمشة، او اني مش مهمة، ليه اختارها هي وسابني أنا ؟ رغم اننا واحد، نفس الشكل ونفس التفكير، يمكن علشان هي بعيدة ؟ او ممكن علشان أنا قدامه طول الوقت فصعب يبصلي ؟ أنا قدامه ليه مش شايفني !
- متقوليهاش حاجة، افهمي بس لو حد عاوز يتقدملها دلوقت، هي موافقة على الموضوع أصلا ولا مش عاوزة دلوقت.
خرجت من هناك وانا مخنوقة، وعيطت وانا ماشية، محدش هيفهم وأسماء نفسها مش هتفهم، كنت حاسة اني عدم وإن شوية الكلام اللي بكتبهم هما اللي عاملين ليا إسم
بعد يومين بالظبط عرفته انها مخطوبة.
كنت باخد حقي منه، برد كرامتي، انت اتجاهلتني وانا قدامك، فانا كمان هتجاهلك وارفضك، محكتش لأسماء ولا حكيت لحد، علشان مكنتش حابة ابان ضعيفة وانا بقولها انا حبيته، حبيته بس هو مأخدش بالي منه أصلا، اختار بنت تانية.
اتليهت في الامتحانات شهر، كنت فاكرة اني نسيت الموضوع، بس لما خلصت امتحانات رجعت أفكر تاني، حاسة انه كسر ثقتي في نفسي.
- وحشتي الحبر
رفعت راسي لاقيته واقف قصادي وبيبتسم، فجأة كل أصوات العالم اختفت، كان في هدوء غريب، حتى الناس اختفت، مكانش فيه غيره، ومكنتش شايفة غيره
بصيت في الأرض بسرعة ومردتش، فقعد قصادي
- أخبارك ايه ؟
- بخير الحمد لله
- وحنان أخبارها ايه ؟
بصيتله وكنت حاسة ان في نار هتخرج من ودني، جذيت على سناني علشان أسكت
سأل تاني - ها هي كويسة ؟
- مش انت متابعها ؟ يعني عارف هي كويسة ولا لأ
- لأ طبعاً، ماهي ممكن تنزل بوست بيضحك في وقت هي مخنوقة وبتعيط فيه، السوشيال مش هتوضح أكيد
- لأ بتوضح
- انتي بتكرهيها ليه كده !
- وأكرهها ليه ! الله يسهلها
- طب متعرفيش كملت خطوبتها ولا سابته ؟
حاولت أكون هادية - أنا معرفهاش، معرفش مخطوبة ولا متجوزة ولا مبسوطة ولا لأ، معرفهاش
- بتكذبي ليه ؟
- مبكذبش
- طب كذبتي ليه ؟
- كذبت في ايه !
- حنان !
يالهوي، قلبي وقع، حاولت اتنفس بهدوء بس أكيد أخد باله بسبب غبائي
- حنان تتحب مبتحبهاش ليه ؟ أنا نفسي بحبها، وانتي أكتر شخص المفروض يحبها
- واشمعنى بقى !
- علشان لو محبتيش نفسك مش هتلاقي اللي يحبك
مسكت الشنطة ووقفت - أنا همشى
- عملتي كده ليه ؟
كان جوايا ليه غضب كبير، كنت متضايقة منه أوي - علشان أنا فعلاً مش هي، أنا شخص بسيط وعاوزة أعيش في هدوء، مليش أحلام ولا طموحات، عايشة علشان أفرح وأفرح اللي حواليا وبس، هي غيري، هي حياتها كلها عبارة عن اكتئاب، بتجري ورا أحلامها، آخر كل يوم بتعيط من التعب، وبتصحى تاني يوم تجري تاني، مشبهاش في شيء
- بس انتوا شخص واحد
- بشخصيتين مختلفتين، وانت حبيت شخصية فيهم، ومش لازم الشخصية التانية توافق
- بس الشخصية التانية حبتني
- متتكلمش كده من فضلك
- طب أقولك حاجة ؟ كنت عارف والله انك هي، انا بس كنت خايف أقولك كده فمتجيش تاني
سيبت الشنطة من ايدي - انت بتهزر !
- والله أبداً، خوفت تتحرجي لما تعرفي اني عارفك فسكت، كذا مرة حاولت أجيب إسمك علشان تقولي انتي وانتي متكلمتيش
- ياوعدي !
ضحك - حنان بتقول الكلمة دي لما بتلاقي حاجة فرحتها
- أو لما بتتكسف
- لأ لما بتفرح بس
- والله لما بتتكسف كمان بتقول كده
- وانتي عرفتي منين !
- ايه ؟
- ايه انتي ؟
" حتى قبل أن التقيك، لم نكن أغرابًا "
#أسميته_أحمد
#حنان_سعيد
