- أووه حدثٌ جديدٌ أول مرة نشوفه، تساقط شعر؟ أول مرة نشوف تساقط شعر.
- مش هتبطلي تتريقي على نفسك؟
- صحيت لقيته واقع كله على المخدة، يلا بالسلامة، وفر زيت وشامبو.
- بتعيطي ولا إيه؟
- والله لأ، اتعودت، منه لله قاهرني.
- مش نافع معاه علاج ولا زيوت ولا إهمال حتى، ما تحلقيه وريحينا.
- لا أنا اتريق على شعري تمام، أنتِ تتريقي ليه؟ شعر والدتك ده؟ ما تتلمي.
وبعدين بقى في الاستيقاظ المتأخر والأرق اللي ماسكنا بقاله سنين ده، نفسي حد يتمسك بيا زي ما الأرق بيعمل، اللي هو حبيبي سيبني أنام الله يهديك، بس ولو ولو لازم يصحيني لحد ما أعيط وأصدع فأتخمد قبل الخروج بساعة.
- قرأتِ الأذكار؟
- نسيت والله، أصلًا بقينا الضهر، هقرأ إيه.
في الشتا بالذات بيجي عندي شعور امتنان غير طبيعي لوجود سرير، سقف، غطا، إحساس الدفا لوحده محتاجين سنين نتكلم عنه ونحمد الله عليه، شكرًا علشان متطمنة، شكرًا علشان نايمة على شيء مريح، شكرًا علشان مش في الشارع في البرد، شكرًا علشان في سقف، وشكرًا لاخواتنا في السودان أصحاب كلمة: "أنا في زحام من النعم"، علشان مش لاقية لفظ تاني.
- عيونك منفخة كده ليه؟
- قلة نوم، بس أول ما أوصل البيت هعوض بجد، هنام كتير أوي لحد ما أشبع.
- هنروح نقدم بكرة ما تنسيش، حنان هو أنتِ لسه زعلانة؟ مش بتنامي بسبب كده؟
فكرت في سؤالها، بس هو الحقيقة أنا مش زعلانة بسبب علاقة انتهت، أصل قلة النوم دي ملزماني من سنين، هي أيوة بتتعب لي جسمي كله، بتقلل أكلي، صداع وتعب في الضهر بسببها وقلة تركيز، بس أنا اتعودت ودا مالهوش علاقة بزعل.
إحنا نقفل القديم ونروح نقدم في الشغل ده ونركز في حياتنا علشان نبقى حلوين، إيه يعني علاقة انتهت هو إحنا مخلوقين للخلود، ما هنموت كلنا.
صحيت قبل الفجر وأنا بصرخ، أسماء صحيت على صوتي، كنا متفقين ننام سوا علشان نصحى نقدم مع بعض.
سألت وهي مخضوضة - في إيه؟
ما تكلمتش وحاولت أنام تاني، سألتني وهي بتنام - كابوس تاني صح؟ نامي متوضية بقى قلنا ألف مرة.
ما عرفتش أنام، كنت خايفة، قربت من أسماء ومسكت هدومها على أساس أتطمن وأنام ماعرفتش، أنا من زمان بحلم بكوابيس، مابقتش أخاف، بس دا سبب لي رعب وفوبيا من الحيوانات اللي بشوفها في الأحلام، صليت الفجر وقرأت قرآن شوية فهديت.
ماقولتش لأسماء على الحلم، بس أنا حلمت بتعابين كتير قدام الشركة اللي هنروحها، ماعرفتش أدخل بسببهم الشركة، قبلها برضو كنت حلمت بوجود تعابين بيني وبين الشخص اللي علاقتي انتهت معاه، والموضوع بعدها ماكملش.
- يا ستي فوقي بقى شوية وهننزل.
- مانمتش والله ومصدعة.
- كنتِ بتحلمي بإيه؟
قولت وأنا بوسع عيني وبتخن صوتي وبحاول أخوفها - بتعابين.
- خاف يا عيد.
- هي بتخوف فعلًا.
- نخلي حد يفسر لنا؟
- ما هو معروف التعابين أعداء وحاجة وحشة.
- مش شرط، هقول لأميرة، كانت فسرت لي حلم.
