- عينيكِ بتطلع قلوب.
- ...
- حد شاف قلب حنان يا جماعة؟
- ...
- يا ربي على ريحة الحب، أنا اتخنقت من الريحة.
- ...
- مسم، وتقولك ما بحبهوش، أومال لو بتحبيه هتعملي إيه، هتاخديه حضن مطارات!
انتبهت على صوت أسماء - بتقولي حاجة يا أسماء؟
ابتسمت - أنا! لا كنت بقول أستاذ أحمد جه متأخر النهاردة.
- أيوة شكله مش شبعان نوم.
- حبيبتي الله يعينك، كنتِ بتوصليه بعينك للمكتب بتاعه.
- إيه اللي بتقوليه ده يا أسماء! احترمي نفسك.
- ما تحترمي نفسك إنتِ وتعترفي.
- طب ممكن تركزي في شغلك؟
مش عارفة مصرة تخليني بحبه، إيه هحبه بالعافية!
هدى حطت الملفات على مكتبي وهي بتغمز - أستاذ أحمد عاوزك.
زعقت - وبعدين بقى؟ إيه اللي بتعملوه ده!
أخدت الملفات بعصبية وخرجت، قلبي كان بيدق، باخد نفسي بالعافية قبل ما أخبط، بصيت على نفسي في المراية اللي جمب مكتبه بالظبط، أنا ثابتة، أنا قوية، أنا مش حاسة تجاهه بأي حاجة.
سمعت صوته بيقول - اتفضل.
أنا انهارت!
أسد مالك في إيه!
دخلت وأنا ببتسم - هدى قالتلي إن حضرتك عاوزني.
- أيوة يا حنان تعالي.
ما تقوليش يا حنان دي أبوس دماغ الست والدتك، ماتنطقش اسمي خالص.
قعدت قدامه فاتكلم - بالنسبة لل..
يا ربي دا مش شبعان نوم فعلًا، يا ترى إيه خلاه ماينامش بدري، أكيد أرق، أو حاجة شغلاه، أو ممكن حاجة مزعلاه، بس أنا ماليش دعوة، هو مديري وبس.
- معايا؟
يا ريت أبقى معاك، احم .. قصدي يعني، وبعدين بقى في قلة الأدب بتاعتك دي!
رديت بهدوء - أيوة سامعة حضرتك.
- حنان التصميم ده لازم يكون موجود على مكتبي الاحد بالكتير، عاوز حاجة كده بره الصندوق، ولو طلع حلو هتاخدي يوم أجازة جدعنة مني كده.
طب ما تتجوزني جدعنة منك برضو، جواز! طب والله يا حنان لاضربك.
خرجت من المكتب وأنا متضايقة عاوزة أولع في أفكاري والله، بس مش هو اللي بيعاملني حلو! مش هو اللي قال مرة قدامهم حنان أشطر واحدة هنا؟ قال ولا مقالش!
يا سلام يا بت؟ وهو أي واحد هيقولك إنتِ شاطرة هتحبيه!
قعدت جنب أسماء بعصبية - بصي بقى، لو سمعت كلمة زيادة منك في الموضوع ده هضربك بالشبشب.
- مالك وشك أحمر كده ليه!
- وشي أنا!
- آه والله، هو مسك إيدك؟
خلعت الشوز ورفعتها - انطقي تاني، انطقي علشان تنزل على دماغك.
- خلاص اهدي اهدي، هو إنتوا تحبوا وبعدين تتعصبوا علينا!
بايخة!
أقول حاجة بصراحة؟ في حاجة جوايا غريبة بتحصل لما بشوفه، ومش علشان بيعاملني كويس، ومش علشان لطيف معايا أكتر من الكل، أنا مش صغيرة وفاهمة، قصدي فاهمة يعني إيه بنت كبيرة قلبها ينكمش كل ما تشوف ولد معين، كإنه بيصغر جوايا وبيتحامى في ضلوعي، إحساس يُخض، بيسبب وجع في المعدة أوقات، بس أنكر إنه جميل؟
لكن أنا ماينفعش أقول ده لنفسي، علشان هو مستحيل ياخد باله مني.
